លោកជំទាវ ម៉ាណ ណាវី ទីប្រឹក្សាជាន់ខ្ពស់នៃរដ្ឋសភា សម្រាប់នីតិកាលទី៧ ព្រមជាមួយគណៈប្រតិភូសិង្ហបុរី ដែលដឹកនាំដោយលោក លោកមហាំម៉ាត់ ពិន អិសកាន់ដា នាយកសាលាអន្តរជាតិ បានពាំនាំអំណោយដ៏ថ្លៃថ្លាជូនប្រជាពលរដ្ឋ៤២១ គ្រួសារ មកពីភូមិចំនួន៣ ស្ថិតក្នុងខេត្តព្រៃវែង។ សុខដុមនីយកម្មសាសនា និងជាតិសាសន៍នៅកម្ពុជា ជាចលករយ៉ាងសំខាន់ក្នុងការជំរុញការអភិវឌ្ឍគ្រប់វិស័យ

នៅព្រឹកថ្ងៃពុធទី១៨ ខែតុលា ឆ្នាំ២០២៣នេះ លោកជំទាវ ម៉ាណ ណាវី ទីប្រឹក្សាជាន់ខ្ពស់នៃរដ្ឋសភា សម្រាប់នីតិកាលទី៧ ព្រមជាមួយគណៈប្រតិភូសិង្ហបុរីដែលដឹកនាំដោយលោក លោកមហាំម៉ាត់ ពិន អិសកាន់ដា នាយកសាលាអន្តរជាតិ បានពាំនាំអំណោយដ៏ថ្លៃថ្លាជូនប្រជាពលរដ្ឋ៤២១ គ្រួសារ មកពីភូមិចំនួន៣ ស្ថិតក្នុងខេត្តព្រៃវែង។

ប្រជាពលរដ្ឋទាំង៣ភូមិនោះរួមមាន ភូមិស្ទឹងស្លូត ឃុំអ្នកលឿងក្រោម ស្រុកពាមរ, ភូមិខ្មែឥស្លាម ឃុំកំពង់ត្របែក ស្រុកកំពង់ត្របែក និង ភូមិអណ្តូង ឃុំជើងភ្នុំ ស្រុកបាភ្នុំ ខេត្តព្រៃវៃង សរុបជាអង្ករចំនួន ១៣តោន និងមានកញ្ចប់អាហារ ១៧០ កញ្ចប់ សរុបថវិកាប្រមាណ ១១,០០០ ដុល្លាអាមេរិក។

ថ្លែងក្នុងពិធីចែកអំណោយនេះ លោកជំទាវគណៈអធិបតីបានធ្វើការកត់សម្គាល់អំពីលទ្ធផលនៃកិច្ចខិតខំប្រឹងប្រែងរបស់រាជរដ្ឋាភិបាលក្រោមការដឹកនាំដោយសម្តេចអគ្គមហាសេនាបតីតេជោ ហ៊ុន សែន និងមានការបន្តវេនដោយ សម្តេចធិបតី ហ៊ុន ម៉ាណែត ក្នុងការដាក់ចេញនូវគោលនយោបាយបង្កើតឱ្យមានសុខដុមនីយកម្មជាតិសាសន៍ និងសាសនានៅកមម្ពុជារយៈពេលជិតបីទស្សវត្តកន្លងមកនេះ។ កិច្ចខិតខំប្រឹងប្រែងនេះបានធ្វើឱ្យកម្ពុជាទទួលបានសុខដុមនីយកម្មនៃជាតិសាសន៍ និងសាសនា បើទោះបីកម្ពុជាមានជនជាតិ និងសាសនាផ្សេងគ្នាក៏ដោយ ដែលទាំងនេះជាហេតុធ្វើនៅឱ្យសង្គមកម្ពុជាកាន់តែមានរីកចម្រើនប្រកបដោយសន្តិភាពលើគ្រប់វិស័យ។

កម្ពុជាធ្លាប់បានហែលឆ្លងរួចរយៈរាប់រយឆ្នាំនៃជម្លោះផ្ទៃក្នុង ជាពិសេសការកាប់សម្លាប់រង្គាលមនុស្សប្រមាណ២លាននាក់ ក្នុងរបបប្រល័យពូជសាសន៍ខ្មែរក្រហមដែលបានកើតឡើងពីឆ្នាំ ១៩៧៥ ដល់ឆ្នាំ ១៩៧៩ ដែលប្រវត្តិសាស្ត្រទាំងនេះបានធ្វើឱ្យប្រជាជនកម្ពុជាទាំងមូល ផ្តល់តំលៃ និងយកចិត្តទុកដាក់ខ្លាំងចំពោះសុខដុមនីយកម្ម និងសន្តិភាព។ តាមរយៈលទ្ធផលទាំងនេះបានធ្វើឱ្យកម្ពុជាក្លាយជាឧទាហរណ៍ និងគំរូជាក់ស្តែងនៃសុខដុមនីយកម្មជាតិសាសន៍ និងសាសនា នៅក្នុងតំបន់ និងលើឆាកអន្តរជាតិ។
ក្នុងកម្មវិធីចែកអំណោយនេះដែរ ក៏មានវត្តមានឯកឧត្តម មហាំម៉ាត់ យូណេះ អនុរដ្ឋលេខាធិការក្រសួងទេសចរណ៍ ឯកឧត្តម យ៉េប រ៉ហ្វិក ទីប្រឹក្សារាជរដ្ឋាភិបាល និងគណៈអភិបាលស្រុកផងដែរ។