ឯកឧត្តម អង្គ វង្ស វឌ្ឍានា និង ឯកឧត្តម កើត រិទ្ធ អញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវស្ពាន និងផ្លូវថ្មី ស្ថិតក្នុងឃុំជ្រៃ ស្រុកមោងឫស្សី
---------------------------
មោងឫស្សី៖ នាថ្ងៃទី៣០ ខែកញ្ញា ឆ្នាំ២០២៣, ស្ពានបេតុប្រវែង ១២ម៉ែត្រ ឆ្លងកាត់ស្ទឹងដូនទ្រី និងផ្លូវក្រាលគ្រួសធម្មជាតិមួយខ្សែប្រវែង ១៤០ម៉ែត្រ ដែលចំណាយថវិកាក្នុងការសាងសង់អស់ប្រមាណជាង ១៧០លានរៀល ស្ថិតក្នុងភូមិម្រះព្រៅ និងភូមិជ្រៃ ឃុំជ្រៃ ស្រុកមោងឫស្សី ខេត្តបាត់ដំបង ត្រូវបានសម្ពោធដាក់ឱ្យប្រើប្រាស់ជាផ្លូវការក្រោមអធិបតីភាពដ៏ខ្ពង់ខ្ពស់របស់ ឯកឧត្តម អង្គ វង្ស វឌ្ឍានា ប្រធានក្រុមការងារចុះជួយស្រុកមោងឫស្សី និង ឯកឧត្តម កើត រិទ្ធ អនុប្រធានទី១ នៃក្រុមការងារចុះជួយស្រុកមោងឫស្សី។ ពិធីនេះក៏មានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី ជាអនុប្រធាន សមាជិក សមាជិកានៃក្រុមការងារចុះជួយស្រុកមោងឫស្សី, ប្រធាន អនុប្រធាន សមាជិក សមាជិកានៃក្រុមការងារចុះជួយឃុំជ្រៃ ព្រមទាំងប្រជាពលរដ្ឋរស់នៅក្នុងឃុំជ្រៃ ដែលមានចំនួនសរុបប្រមាណ ៦០០ នាក់។

មានប្រសាសន៍សំណេះសំណាលក្នុងពិធីនេះ ក្នុងនាមឯកឧត្តមប្រធានក្រុមការងារ, ឯកឧត្តម កើត រិទ្ធ បានលើកឡើងថា ស្ពាន និងផ្លូវថ្មី ដែលត្រូវបានសម្ពោធដាក់ឱ្យប្រើប្រាស់ជាផ្លូវការនាពេលនេះ គឺជាសមិទ្ធផលថ្មីដ៏មានសារៈសំខាន់មួយដែលនឹងជួយសម្រួលបន្ថែមដល់ការធ្វើដំណើរ និងការដឹកជញ្ជូន ទាំងសម្រាប់ប្រជាពលរដ្ឋដែលរស់នៅក្នុងបណ្តាភូមិនានានៃឃុំជ្រៃផ្ទាល់ផង ទាំងប្រជាពលរដ្ឋនៃឃុំផ្សេងទៀតក្នុងស្រុកមោងឫស្សីផង។

សមិទ្ធផលដ៏ថ្លៃថ្លាថ្មីទាំងពីរនេះ ក៏ដូចជាសមិទ្ធផលដទៃផ្សេងទៀតដែលបានកើតមាននាពេលកន្លងមក អាចកើតឡើងបាន គឺដោយសារមានកម្លាំងរួបរួមសាមគ្គីគ្នា និងការគាំទ្រពីសំណាក់ប្រជាពលរដ្ឋក្នុងឃុំជ្រៃ ជាមួយនឹងក្រុមការងារចុះជួយឃុំជ្រៃ ដែលកត្តាសាមគ្គីភាព និងការគាំទ្រនេះ គឺជាកត្តាដ៏សំខាន់ក្នុងការរៀបចំបង្កើតឱ្យមានសមិទ្ធផលថ្មីៗបន្ថែមទៀត ដែលបម្រើផលប្រយោជន៍របស់ប្រជាពលរដ្ឋនៅពេលខាងមុខ។

ឆ្លៀតក្នុងឱកាសនេះ, ឯកឧត្តមក៏បានថ្លែងនូវអំណរគុណ និងកោតសរសើរដល់ ឯកឧត្តម ជិន ម៉ាលីន ប្រធានក្រុមការងារចុះជួយឃុំជ្រៃ និងឯកឧត្តម លោកជំទាវ លោក លោកស្រី ជាអនុប្រធាន និងសមាជិកក្រុមការងារចុះជួយឃុំជ្រៃ ដែលបានខិតខំយកចិត្តទុកដាក់យ៉ាងសស្រាកសស្រាំក្នុងការជួយដោះស្រាយរាល់ការលំបាកនានារបស់ប្រជាពលរដ្ឋ និងខិតខំធ្វើយ៉ាងណាឱ្យឃុំជ្រៃមានការអភិវឌ្ឍ សំដៅធ្វើឱ្យជីវភាពប្រជាពលរដ្ឋឃុំជ្រៃកាន់តែប្រសើរឡើង។

បន្ថែមពីនេះ, ឯកឧត្តម កើត រិទ្ធ ក៏បានគូសរំលេច ជូនអង្គពិធីនូវការងារអាទិភាពសំខាន់ៗមួយចំនួនរបស់រាជរដ្ឋាភិបាលក្រោមការដឹកនាំដ៏ខ្ពង់ខ្ពស់របស់ សម្តេចមហាបរវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ក្នុងនីតិកាលទី៧ នៃរដ្ឋសភានេះ ដែលក្នុងនោះរាជរដ្ឋាភិបាលនឹងផ្តល់អាទិភាពលើការអភិវឌ្ឍមូលដ្ឋាន ដែលរួមមាន ការអភិវឌ្ឍវិស័យកសិកម្ម ការពង្រឹងគុណភាពអប់រំរបស់កុមារ និងយុវជននៅមូលដ្ឋាន និងការពង្រឹងគុណភាពសេវាសុខាភិបាលនៅមូលដ្ឋាន ក៏ដូចជាការអភិវឌ្ឍវិស័យសំខាន់ៗផ្សេងទៀតដែលជាតម្រូវការរបស់ប្រជាពលរដ្ឋនៅមូលដ្ឋាន។