ឯកឧត្តម ប៉ា សុជាតិវង្ស និងលោកជំទាវ បានអញ្ជើញចូលរួមកាន់បិណ្ឌ​វេនទី​៩ នៅវត្ដនិរោធរង្សី សង្កាត់និរោធ ខណ្ឌច្បារអំពៅ
===================
នៅព្រឹកថ្ងៃអាទិត្យ ៩រោច ខែភទ្របទ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី់០៨ ខែតុលា ឆ្នាំ២០២៣ ឯកឧត្តម ប៉ា សុជាតិវង្ស ប្រធានគណៈកម្មការទី៧ នៃរដ្ឋសភា និងជាតំណាងរាស្ត្រមណ្ឌលរាជធានីភ្នំពេញ និងលោកជំទាវ ព្រមទាំងក្រុមគ្រួសារ និងពុទ្ធបរិស័ទ បានអញ្ជើញចូលរួមកាន់បិណ្ឌ​វេនទី​៩ នៅវត្ដនិរោធរង្សី សង្កាត់និរោធ ខណ្ឌច្បារអំពៅ រាជធានីភ្នំពេញ។

នៅ​ក្នុង​ពិធី​កាន់បិណ្ឌ​ទី​៩នេះ ឯកឧត្តម ប៉ា សុជាតិវង្ស និងលោកជំទាវ ព្រមទាំងក្រុមគ្រួសារ និងពុទ្ធបរិស័ទ​ទាំងអស់​ បាន​អញ្ជើញ​ប្រតិបត្ដិ​ព្រះធម៌​ សូត្រ​មន្ដ​ចម្រើន​ព្រះ​បរិត្ដ​ រាប់បាត្រ ប្រគេន​ព្រះសង្ឃ​ ​បង្សុកូល​ ឧទ្ទិស​កុសល​​​​ផល​បុណ្យ​ជូនដល់វិញ្ញាណក្ខន្ធបុព្វការីជន មានមាតាបិតា ជីដូនជីតា ញាតកាទាំង៧សណ្ដាន និងជូន​ដល់​វិញ្ញាណ​ក្ខ​ន្ធ​ឥស្សរជន និងយុទ្ធជនដែលបានពលីជីវិតដើម្បីជាតិមាតុភូមិ ដែលបានទទួលមរណកាល​ទៅកាន់លោកខាងមុខ សូមឱ្យជួបប្រកបតែវិបុលសុខគ្រប់ប្រការ និងទៅកាន់សុខគតិភពកុំបី​ឃ្លៀង​ឃ្លាតឡើយ។

ជាការចូលរួមចំណែកក្នុងការកសាងសមិទ្ធិផលនានា ក្នុងទីអារាមវត្តនិរោធរង្សី ឯកឧត្តម ប៉ា សុជាតិវង្ស និងលោកជំទាវ ព្រមទាំងក្រុមគ្រួសារ និងពុទ្ធបរិស័ទទាំងអស់ ដែលចូលរួមកាន់បិណ្ឌវេនទី៩ ក៏បានប្រមូលបច្ច័យ តាមរយៈទឹកចិត្តសទ្ធាជ្រះថ្លា ប្រគេនដល់ព្រះចៅអធិការវត្ត ចំនួន៣០លានរៀល ទុកសម្រាប់កសាងសមិទ្ធិផលដែលបម្រើឲ្យវិស័យព្រះពុទ្ធសាសនា ដែលជាសាសនារបស់រដ្ឋ បានកាន់តែរីកចម្រើនរុងរឿងជារៀងរហូត។

ជាមួយគ្នានេះ បានប្រគេនបច្ច័យសម្រាប់ព្រះសង្ឃ១១៤អង្គ ក្នុង១អង្គ សាដក១ និងថវិកា ចំនួន២ម៉ឺនរៀល និងព្រះចៅអធិការវត្តចំនួន១០មុឺនរៀល និងសាដកចំនួន១។ ដោយឡែក សម្រាប់យាយជី តាជី ៣០នាក់ ក្នុងម្នាក់ៗ ក្រណាត់ស១ដុំ និងថវិកា២ម៉ឺនរៀល។

ជាមួយគ្នានោះ ដើម្បីចូលរួមចំណែក និងលើកកម្ពស់វិស័យព្រះពុទ្ធសាសនា នៅ​ក្នុង​ពិធី​កាន់បិណ្ឌ​វេនទី​៩នេះ ឯកឧត្តម ប៉ា សុជាតិវង្ស និងលោកជំទាវ ព្រមទាំងក្រុមគ្រួសារ និងពុទ្ធបរិស័ទ​ទាំងអស់ បាននាំយកនូវទេយ្យទាន ទេយ្យវត្ថុ និងគ្រឿងឧបភោគ បរិភោគ ប្រគេនជូនវត្តនិរោធរង្សី រួមមាន៖ អង្ករចំនួន២០០គីឡូក្រាម ស្ករសចំនួន១០០គីឡូក្រាម មី២កេសធំ ត្រីខ២កេសធំ ទឹកដោះគោខាប់ចំនួន២កេស ទឹកក្រូចចំនួន២០កេស ទឹកបរិសុទ្ធចំនួន៥០កេស ផ្លែឈើ២កន្ត្រក និងបច្ច័យចង្ហាន់ចំនួន២លានរៀល។