ឯកឧត្តម គួច ចំរើន ៖ រាជរដ្ឋាភិបាលអាណត្តិទី៧ នៃគោលនយោបាយប័ញ្ចកោណតំណាក់កាលទី១ បានដាក់ចេញនូវផែនការយុទ្ធសាស្ត្រចំនួន៦ ផ្លូវ ទឹក ភ្លើង ធនធានមនុស្ស ឌីជីថល និងបង្រឹងវិស័យកសិកម្ម
================
នៅថ្ងៃអង្គារ ៩កើត ខែកត្តិក ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី២១ ខែវិច្ឆិកា ឆ្នាំ២០២៣ ឯកឧត្តម វង្ស ផាណាត ប្រធានក្រុមប្រឹក្សាខេត្ត និងឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ អញ្ជើញបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តព្រះសីហនុ អាណត្តិទី៣ ឆ្នាំ២០២៣ នៅវត្តព្រៃនប់ ស្រុកព្រៃនប់ ខេត្តព្រះសីហនុ ដោយមានការចូលរួមពីឯកឧត្តម លោកជំទាវ សមាជិក សមាជិកា ក្រុមប្រឹក្សាខេត្ត លោកអភិបាលរងខេត្ត លោកអភិបាលស្រុក លោក លោកស្រីជាមេឃុំ សមាជិក សមាជិកាក្រុមប្រឹក្សាឃុំ និងប្រជាពលរដ្ឋ។

វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តព្រះសីហនុ អាណត្តិទី៣ ឆ្នាំ២០២៣ នៅស្រុកព្រៃនប់ មានសំណួរ និងសំណូមពរសរុបចំនួន ១៨ ក្នុងនោះប្រជាពលរដ្ឋបានលើកឡើងដោយផ្ទាល់ជាសំណួរ និងសំណូមពរចំនួន ៣នាក់ និងលើកតាមរយៈសំបុត្រមានចំនួន ១៥សំបុត្រ។

ក្នុងឱកាសនោះឯកឧត្តម គួច ចំរើន អភិបាលខេត្តព្រះសីហនុ បានធ្វើការឆ្លើយតបនឹងសំណូមពររបស់ប្រជាពលរដ្ឋម្តងមួយៗ ដើម្បីដោះស្រាយឱ្យមានតម្លាភាព គណនេយ្យភាព ឆ្លើយតបទៅនឹងកង្វល់របស់ប្រជាពលរដ្ឋនៅក្នុងមូលដ្ឋាន ម្យ៉ាងទៀតវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត មានគោលបំណង ដើម្បីផ្សព្វផ្សាយអំពីតួនាទី ភារកិច្ចរបស់ក្រុមប្រឹក្សាខេត្ត និងគណៈអភិបាលខេត្ត ព្រមទាំងលទ្ធផលដែលសម្រេចបានសំខាន់ៗរបស់រដ្ឋបាលខេត្តតាមរយៈការអនុវត្តនូវសកម្មភាពនានា​ និងធ្វើការពិភាក្សា ពិគ្រោះយោបល់ជាមួយបងប្អូនប្រជាពលរដ្ឋ ដើម្បីរកនូវបញ្ហាអាទិភាពសំខាន់ៗ​សម្រាប់យកទៅធ្វើការពិចារណា​ ដោះស្រាយ និងអនុវត្តបន្តក្នុងការលើកកម្ពស់ជីវភាពរស់នៅរបស់ប្រជាពលរដ្ឋនៅមូលដ្ឋានឱ្យកាន់តែល្អប្រសើរបន្ថែមទៀត។

ឯកឧត្តម អភិបាលខេត្ត បានបញ្ជាក់ថា បច្ចុប្បន្នបញ្ហាគ្រោះថ្នាក់ចរាចរណ៍ជារឿងមួយសំខាន់ទាមទារឱ្យយើងត្រូវរួមគ្នាចូលរួមគោរពច្បាប់ចរាចរណ៍ ពាក់មួកសុវត្ថិភាព ខ្សែក្រវ៉ាត់ជាដើម។ គិតត្រឹមថ្ងៃទី១៨ ខែវិច្ឆិកា ឆ្នាំ២០២៣នេះ នៅខេត្តព្រះសីហនុ គ្រោះថ្នាក់ចរាចរណ៍កើតឡើងចំនួន ១៥០ករណី បណ្តាលឱ្យមនុស្សស្លាប់ចំនួន ១០៩នាក់ ស្រី ៧នាក់ ក្នុងនោះស្រុកព្រៃនប់មានគ្រោះថ្នាក់ចរាចរណ៍កើតឡើងចំនួន ៥៦ករណី ស្លាប់មនុស្សចំនួន ៥២នាក់ ស្រី ៥នាក់ និងរបួសស្រាល ៣២នាក់ ស្រី ៧នាក់ និងរបួសធ្ងន់ ២៤នាក់ ស្រី ៧នាក់ និងក្រុងព្រះសីហនុមានគ្រោះថ្នាក់ចរាចរណ៍ចំនួន៧១ករណី ស្លាប់មនុស្សចំនួន ៤០នាក់ ស្រី៦នាក់។

ហើយថ្មីៗនេះ គ្រោះថ្នាក់ចរាចរណ៍បង្កដោយសត្វគោដើរឆ្លងផ្លូវបណ្តាល់ឱ្យកម្មករចេញពីធ្វើការបុកជាមួយគោ ស្លាប់ចំនួន ២នាក់ ដូច្នេះគណៈបញ្ជាការឯកភាពស្រុក និងមេឃុំ ត្រូវបង្កើនការយកចិត្តទុកដាក់ធ្វើការអប់រំម្ចាស់សត្វគោ ក្របីទាំងអស់ត្រូវមានការប្រុងប្រយ័ត្នមិនត្រូវព្រលេងសត្វរបស់ខ្លួនដើឆ្លងកាត់ផ្លូវដោយគ្មានម្ចាស់គ្រប់គ្រងនោះទេ ហើយការព្រលេងសត្វចោល បង្កជាគ្រោះថ្នាក់ដល់អ្នកធ្វើដំណើរ និងបំផ្លាញ់ផលដំណាំរបស់ប្រជាពលរដ្ឋក្នុងមូលដ្ឋាន។ ការប្រើប្រាស់គ្រឿងញៀនក៏ជាកង្វល់ប្រឈមរបស់យើងទាំងអស់គ្នា ត្រូវរួមគ្នាបង្ការ ទប់ស្កាត់ និងកាត់បន្ថយការប្រើប្រាស់ ការជួញដូរ យើងត្រូវធ្វើការត្រួតពិនិត្យលើអ្នកបើកបរ យានយន្តគ្រប់ប្រភេទ ពិសេសរថយន្តធុនធំ ដើម្បីរកអាវុធជាតិផ្ទុះ និងគ្រឿងញៀន ក្នុងនោះត្រូវធ្វើរដ្ឋបាលចំហរនៅតាមចំណុចដែលមានការសង្ស័យជាប្រចាំ។

ឯកឧត្តម អភិបាលខេត្ត បានបន្តថា រាជរដ្ឋាភិបាលអាណត្តិទី៧ នៃគោលនយោបាយប័ញ្ចកោណតំណាក់កាលទី១ បានដាក់ចេញនូវផែនការយុទ្ធសាស្ត្រចំនួន៦ មានដូចជា ផ្លូវ ទឹក ភ្លើង ធនធានមនុស្ស ឌីជីថល និងបង្រឹងវិស័យកសិកម្ម ដែលបានដាក់ឱ្យអនុវត្តនៅរាជធានី ខេត្តចំនួន១៩ ដោយឡែកខេត្តព្រះសីហនុមិនទាន់បានដាក់ជាខេត្តអាទិភាពចូលក្នុងយុទ្ធសាស្ត្រទាំង ៦នេះទេ រង់ចាំតំណាក់កាលទីពីរបន្តទៀត។ ចំពោះ បណ្ណ ប.ស.ស ជាអាទិភាពរបស់រាជរដ្ឋាភិបាលអាណត្តិទី៧ សម្រាប់ឱ្យប្រជាពលរដ្ឋក្រីក្រ កម្មករ កម្មការិនីធ្វើការតាមបណ្តារោងចក្រ សហគ្រាស ព្រោះវាមានអត្ថប្រយោជន៍ក្នុងការថែទាំសុខភាព ហើយក្រុមប្រឹក្សាឃុំ សង្កាត់របស់យើងត្រូវធ្វើជាគំរូសម្រាប់ធ្វើការពន្យល់ដល់ប្រជាពលរដ្ឋឱ្យចេះប្រើប្រាស់បណ្ណ ប.ស.ស ដែលជា (បណ្ណមូលនិធិសមធម៌សុខាភិបាល) នៅតាមឃុំ សង្កាត់របស់ខ្លួន។