លោកជំទាវ ម៉ែន នារីសោភ័គ អគ្គលេខាធិការស្តីទី កាកបាទក្រហមកម្ពុជា បានអញ្ជើញជួបសំណេះសំណាលជាមួយក្រុមនិស្សិតជ័យលាភីអាហារូបករណ៍ រដ្ឋាភិបាលអូស្ត្រាលី ក្រោយឧត្តមសិក្សា (Australia Awards Scholarship) សម្រាប់ឆ្នាំសិក្សាឆ្នាំ២០២៤
==============
នៅរសៀលថ្ងៃទី ២៨ ខែធ្នូ ឆ្នាំ២០២៣នេះ លោកជំទាវ ម៉ែន នារីសោភ័គ អគ្គលេខាធិការស្តីទី កាកបាទក្រហមកម្ពុជា បានអញ្ជើញជួបសំណេះសំណាលជាមួយក្រុមនិស្សិតជ័យលាភីអាហារូបករណ៍ រដ្ឋាភិបាលអូស្ត្រាលី ក្រោយឧត្តមសិក្សា (Australia Awards Scholarship) សម្រាប់ឆ្នាំសិក្សាឆ្នាំ២០២៤ ចំនួន ២២នាក់ ដែលជំនួបនេះប្រព្រឹត្តទៅនៅទីស្នាក់ការកណ្តាលកាកបាទក្រហមកម្ពុជា។

ក្នុងឱកាសនោះ លោកជំទាវអគ្គលេខាធិការស្តីទី បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខចំពោះក្មួយៗទាំងអស់ និងសូមចូលរួមអបអរសាទរចំពោះជ័យលាភីទាំងអស់ដែលបានប្រឡងជាប់អាហារូបករណ៍ទៅបន្តការសិក្សាក្នុងគ្រឹះស្ថានសិក្សាល្បីៗនៅប្រទេសអូស្រ្ដាលី។ លោកជំទាវ បានគូសបញ្ជាក់ថា ៖ «ការទទួលបានអាហារូបករណ៍ទៅសិក្សានៅប្រទេសអូស្រ្តាលី ដែលមានស្តង់ដាអប់រំខ្ពស់លំដាប់ទី៣ នៅលើពិភពលោកនេះ មិនត្រឹមតែជាមោទកភាពសម្រាប់ខ្លួននិស្សិតនិងក្រុមគ្រួសារប៉ុណ្ណោះទេ តែជាមោទនភាពសម្រាប់សង្គមជាតិទាំងមូលផងដែរ។ ម្យ៉ាងវិញទៀត, ក្មួយនិស្សិតដែលទទួលបានអាហារូបករណ៍នាពេលនេះ ជាធនធានមនុស្សដ៏សំខាន់ក្នុងការចូលរួមអភិវឌ្ឍន៍ប្រទេសជាតិ ស្របតាមយុទ្ធសាស្រ្តបញ្ចកោណរបស់រាជរដ្ឋាភិបាល ដែលបានផ្តល់អាទិភាពក្នុងការកសាងមូលធនមនុស្សជាស្នូលដ៏សំខាន់។»

លោកជំទាវអគ្គលេខាធិការស្តីទី បានជម្រាបជូនក្មួយៗនិស្សិតទាំងអស់ពីប្រវត្តិ និងបេសកកម្មរបស់កាកបាទក្រហមកម្ពុជា ដែលជាជំនួយការឱ្យអាជ្ញាធរសាធារណៈក្នុងវិស័យមនុស្សធម៌ ទៅតាមដំណាក់កាលសំខាន់ៗនៃរបត់នយោបាយរបស់ព្រះរាជាណាចក្រកម្ពុជា ចាប់តាំងពីថ្ងៃចាប់បដិសន្ធិកាកបាទក្រហមកម្ពុជា នៅថ្ងៃទី ១៨ ខែកុម្ភៈ ឆ្នាំ១៩៥៥ រហូតមានការទទួលស្គាល់ពីគណៈកម្មាធិការអន្តរជាតិកាកបាទក្រហម (ICRC) និងចូលជាសមាជិកទី ៨៥របស់សហព័ន្ធអន្តរជាតិនៃសមាគមកាកបាទក្រហម និងអឌ្ឍចន្ទក្រហម (IFRC)។ លោកជំទាវ បានបន្តថា ៖ «នៅឆ្នាំ១៩៧៥ មកដល់ឆ្នាំ១៩៧៩ កាកបាទក្រហមកម្ពុជា ពុំមានអត្ថិភាពនៅក្នុងប្រទេសនោះទេ ដោយសាររបបប្រល័យពូជសាសន៍ ប៉ុល ពត។ បន្ទាប់ពីរំដោះប្រទេសមកវិញ ១៩៧៩-១៩៩២ កាកបាទក្រហមកម្ពុជា ត្រូវបាត់បង់អស្សណៈរបស់ខ្លួន ព្រោះកាកបាទក្រហមកម្ពុជាបានបាត់បង់គោលការណ៍ឯកភាព ដោយមានកាកបាទក្រហមកម្ពុជា ចំនួន៤ក្រុម។ មកដល់ឆ្នាំ១៩៩២-១៩៩៤ ព្រះករុណា ព្រះបាទសម្តេច ព្រះបាទនរោត្តម សីហនុ ព្រះវររាជបិតាជាតិខ្មែរ ព្រះបរមរតនកោដ្ឋ បានបង្រួបបង្រួមកាកបាទក្រហមកម្ពុជា ទាំង៤ក្រុម ទៅជាកាកបាទក្រហមកម្ពុជាតែមួយវិញ និងបានប្រារព្ធមហាសន្និបាតកាកបាទក្រហមកម្ពុជាអាណត្តិទី១ នៅឆ្នាំ១៩៩៤។»

លោកជំទាវអគ្គលេខាធិការស្តីទី បានគូសបញ្ជាក់ថា ៖ «សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ត្រូវបានជាប់ឆ្នោត ជាប្រធានកាកបាទក្រហមកម្ពុជា ដោយមហាសន្និបាតកាកបាទក្រហមកម្ពុជា ចាប់តាំងពីអាណត្តិទី២ ឆ្នាំ១៩៩៨ រហូតដល់បច្ចុប្បន្ននេះ។ ក្រោមការដឹកនាំរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដោយផ្សារភ្ជាប់ជាមួយនយោបាយ ឈ្នះ ឈ្នះ រយៈពេល ២៥ឆ្នាំ (១៩៩៨ - ២០២៣) កន្លងមកនេះ កាកបាទក្រហមកម្ពុជា បានវិវត្តខ្លួនដោយមានសាខាទាំង ២៥ រាជធានីខេត្ត បានដាក់ចេញនូវទិសវិមជ្ឈការ-សហវិមជ្ឈការ ធ្វើឱ្យកាកបាទក្រហមកម្ពុជា មានលទ្ធភាព និងសមត្ថភាពអាចជួយខ្លួនឯងបាន និងមានកេរ្តិ៍ឈ្មោះល្បីល្បាញទាំងថ្នាក់ជាតិនិងឆាកអន្តរជាតិ។» លោកជំទាវ ក៏បានលើកឡើងពីសកម្មភាពការងាររបស់ សម្តេចកិត្តិព្រឹទ្ធបណ្ឌិត ទាក់ទងទៅនឹងការងារទប់ស្កាត់ការចម្លងមេរោគអេដស៍ លុបបំបាត់ការរើសអើងចំពោះអ្នកជំងឺអេដស៍ និងការលើកកម្ពស់សុខភាពស្ត្រី កុមារ និងទារក រហូតដល់អង្គការសហប្រជាជាតិ បានប្រគល់គោមងារចំនួនពីរ ជូន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា (១៧ វិច្ឆិកា ២០០៦) និងជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការអង្គការសហប្រជាជាតិដើម្បីសុខភាពស្ត្រីនិងកុមារ (២១ កុម្ភៈ ២០១១) ផងដែរ។

ជាចុងក្រោយ លោកជំទាវអគ្គលេខាធិការស្តីទី បានផ្តាំផ្ញើនិងលើកទឹកចិត្តក្មួយៗនិស្សិតទំាងអស់ខិតខំសិក្សារៀនសូត្រ ប្រកាន់ខ្ជាប់នូវសីលធម៌ មានវិន័យល្អក្នុងការរស់នៅនិងសិក្សា។ បន្ថែមពីនេះត្រូវចេះគោរពស្រឡាញ់គ្នា ចេះយកអាសារជួយទុក្ខធុរៈគ្នា ចេះលើកទឹកចិត្តឱ្យគ្នាទៅវិញទៅមក ដូចពាក្យចាស់ថា «នៅផ្ទះម្តាយទីទៃនៅព្រៃម្តាយតែមួយ»។ ជាមួយគ្នានេះ លោកជំទាវ បានលើកឡើងថាក្មួយៗនិស្សិតទំាងអស់ ជាតំណាងឱ្យជាតិខ្មែរទំាងមូល ដើរតួនាទីជាអ្នកការទូត ចូលរួមចំណែកផ្សាភ្ជាប់ទំនាក់ទំនងរវាងប្រជាជន បង្កើនមិត្តភាពជាមួយប្រទេសដទៃ ក៏ដូចជាលើកកម្ពស់កិត្យានុភាពជាតិនៅលើឆាកអន្តរជាតិ។ ហេតុដូចនេះ ក្នុងនាមយើងជាតំណាងឱ្យខ្មែរ ត្រូវចូលរួមផ្សព្វផ្សាយពីវប្បធម៌ ប្រពៃណីជាតិ ជាពិសេសភ្ជាប់ទំនាក់ទំនងជាមួយប្រជាជនបណ្តាប្រទេសនានា មិនថាតែប្រជាជនអូស្រ្តាលីនោះទេ គឺធ្វើយ៉ាងណាដើម្បីឱ្យគេស្គាល់កម្ពុជាកាន់តែច្បាស់ យល់ដឹងពីសភាពការណ៍ពិតនៅក្នុងប្រទេស ដែលកំពុងមានសុខសន្តិភាព ស្ថិរភាពសង្គម ហើយកម្ពុជាបានកំពុងបើកប្រទេសស្វាគមន៍អ្នកទេសចរ និងអ្នកវិនិយោគមកពីគ្រប់ទិសទីនៃពិភពលោក។

ជាកិច្ចឆ្លើយតប តំណាងបេក្ខជនជ័យលាភីអាហារូកណ៍រដ្ឋាភិបាលអូស្ត្រាលី ឆ្នាំ២០២៤ បានសម្តែងនូវក្តីសោមន្សរីករាយ និងសូមថ្លែងអំណរគុណយ៉ាងជ្រាលជ្រៅចំពោះ លោកជំទាវអគ្គលេខាធិការស្តីទី ដែលបានអនុញ្ញាតឱ្យបានជួបសម្តែងការគួរសម និងជ្រួតជ្រាបកាន់តែច្បាស់អំពីប្រវត្តិ និងសមិទ្ធផលរបស់កាកបាទក្រហមកម្ពុជា ក្រោមការដឹកនាំរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានជំរុញអភិវឌ្ឍស្ថាប័ន ក្នុងការធ្វើវិមជ្ឈការ និងវិសហមជ្ឈការ ដើម្បីឱ្យសាខាកាកបាទក្រហមទាំង២៥មានភាពរឹងមាំ និងមានលទ្ធភាពក្នុងការជួយសម្រាលការលំបាកប្រជាពលរដ្ឋបានទាន់ពេលវេលា។ ជាទីបញ្ចប់ ក្រុមបេក្ខជននិសិ្សតអាហារូបករណ៍ទាំងអស់ សូមបួងសួងដល់វត្ថុស័ក្តិសិទ្ធិក្នុងលោកប្រទានពរជ័យជូន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសហការីទាំងអស់នៃកាកបាទក្រហមកម្ពុជា សូមជួបប្រទះតែនឹងព្រះពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕