ឯកឧត្តម ឧបនាយករដ្ឋមន្រ្តី កើត រិទ្ធ អញ្ជើញជាអធិបតីដ៏ខ្ពង់ខ្ពស់បំពាក់អាវផាយដល់ក្រឡាបញ្ជីកម្មសិក្សា ជំនាន់ទី៨ នៅបណ្ឌិត្យសភាភូមិន្ទយុត្តិធម៌កម្ពុជា
=============
បណ្ឌិត្យសភាភូមិន្ទយុត្តិធម៌កម្ពុជា៖ នៅព្រឹកថ្ងៃសុក្រ ១១ រោច ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៨ ខែធ្នូ ឆ្នាំ២០២៣ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានក្រុមប្រឹក្សាភិបាលនៃបណ្ឌិត្យសភាភូមិន្ទយុត្តិធម៌កម្ពុជា បានអញ្ជើញជាអធិបតីដ៏ខ្ពង់ខ្ពស់បំពាក់អាវផាយដល់ក្រឡាបញ្ជីកម្មសិក្សា ជំនាន់ទី៨ សរុបចំនួន ៩៨ រូប ដែលនឹងទៅបម្រើការងារនៅតាមសាលាឧទ្ធរណ៍តំបន់, មហាអយ្យការអមសាលាឧទ្ធរណ៍តំបន់, សាលាដំបូង និងអយ្យការអមសាលាដំបូងរាជធានី-ខេត្តនានា។

ពិធីនេះក៏មានការអញ្ជើញចូលរួមជាគណៈអធិបតីពីសំណាក់ ឯកឧត្តម និងលោកជំទាវ ជាអនុប្រធាន និងសមាជិកនៃក្រុមប្រឹក្សាភិបាលនៃបណ្ឌិត្យសភាភូមិន្ទយុត្តិធម៌កម្ពុជា ព្រមទាំងមានការអញ្ជើញចូលរួមជាកិត្តិយសពីសំណាក់ ឯកឧត្តម លោកជំទាវ លោក លោកស្រី ជាថ្នាក់ដឹកនាំនៃក្រសួងយុត្តិធម៌ និងបណ្ឌិត្យសភាភូមិន្ទយុត្តិធម៌កម្ពុជាផងដែរ។

ថ្លែងក្នុងពិធីនេះ, ឯកឧត្តមឧបនាយករដ្ឋមន្ត្រី បានចាប់ផ្តើមដោយការអបអរសាទរដល់ក្រឡាបញ្ជីកម្មសិក្សា ទាំង ៩៨ រូប ដែលនឹងត្រូវទៅបំពេញការងារក្នុងវិជ្ជាជីវៈជាក្រឡាបញ្ជី។ ឆ្លៀតក្នុងឱកាសនេះ, ឯកឧត្តមឧបនាយករដ្ឋមន្ត្រី បានបញ្ជាក់ថា ការគ្រងឯកសណ្ឋានជា “អាវផាយ” ឬ “រ៉ូប” នេះ គឺជាការចាប់ផ្តើមនៃរបត់ជីវិតថ្មីសម្រាប់ក្រឡាបញ្ជីកម្មសិក្សា។

ទន្ទឹមនេះ, ឯកឧត្តមឧបនាយករដ្ឋមន្ត្រីក៏បានគូសរំលេចដល់ក្រឡាបញ្ជីកម្មសិក្សាទាំងអស់នូវទិសដៅការងារកែទម្រង់ប្រព័ន្ធយុត្តិធម៌ ផ្អែកតាមការប្រគល់ភារកិច្ចរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការអនុវត្តវិធានការគន្លឹះទី៥ ដែលបានដាក់ចេញដោយ សម្តេចធិបតីនាយករដ្ឋមន្ត្រី ក្នុងសម័យប្រជុំពេញអង្គគណៈរដ្ឋមន្ត្រីលើកទី១ សំដៅពង្រឹង និងលើកកម្ពស់គុណភាព និងប្រសិទ្ធភាពនៃប្រព័ន្ធយុត្តិធម៌កម្ពុជា ក៏ដូចជា ការដាក់ចេញនូវយុទ្ធនាការចំនួន២ ដែលក្រសួងយុត្តិធម៌គ្រោងនឹងដាក់ចេញនាពេលខាងមុខ គឺ៖

១- ការជំរុញ និងការពន្លឿនការដោះស្រាយវិវាទនៅតុលាការ, និង ២-ការត្រួតពិនិត្យ និងការដោះស្រាយភាពមិនប្រក្រតីនៅតាមតុលាការ ដើម្បីឱ្យក្រឡាបញ្ជីកម្មសិក្សាទាំងអស់ត្រៀមលក្ខណៈ ដើម្បីចូលរួមក្នុងដំណើរការនៃការធ្វើឱ្យប្រព័ន្ធតុលាការប្រែមុខមាត់នេះ។

មុននឹងបញ្ចប់, ឯកឧត្តមឧបនាយករដ្ឋមន្ត្រី បានផ្តល់នូវអនុសាសន៍ណែនាំដ៏ខ្ពង់ខ្ពស់ ក៏ដូចជា គោលការណ៍ការងារមួយចំនួន ដល់ក្រឡាបញ្ជីកម្មសិក្សា ទាំង ៩៨ រូប ដែលត្រូវប្រកាន់យក នៅពេលទៅបំពេញការងារនៅតាមសាលាឧទ្ធរណ៍តំបន់, មហាអយ្យការអមសាលាឧទ្ធរណ៍តំបន់, សាលាដំបូង និងអយ្យការអមសាលាដំបូងរាជធានី-ខេត្តនានា ដូចខាងក្រោម៖

ទី១-ត្រូវធ្វើខ្លួនជាបង្អែកដ៏កក់ក្តៅសម្រាប់ប្រជាពលរដ្ឋ ជាពិសេស ប្រជាពលរដ្ឋដែលទទួលរងការរំលោភបំពានដោយអយុត្តិធម៌ ដែលទៅប្រើប្រាស់សេវាយុត្តិធម៌ ដើម្បីលើកកម្ពស់កិត្តិយសរបស់អង្គភាពខ្លួន និងជាកិត្តិយសរបស់ខ្លួនផ្ទាល់។ ទន្ទឹមនេះ, ក្នុងការអនុវត្តច្បាប់ និងក្នុងការអនុវត្តការងាររបស់ខ្លួន, ត្រូវប្រកាន់យកឱ្យបានជាដាច់ខាតនូវភាពត្រឹមត្រូវ និងសច្ចធម៌ ក្នុងការស្វែងរកយុត្តិធម៌ជូនប្រជាពលរដ្ឋ ពោលគឺ “នៅចំពោះមុខចៅក្រម គឺនិយាយពីច្បាប់! នៅចំពោះមុខច្បាប់ គឺនិយាយពីយុត្តិធម៌! នៅចំពោះមុខយុត្តិធម៌ គឺនិយាយពីភាពត្រឹមត្រូវ! នៅចំពោះមុខភាពត្រឹមត្រូវ គឺនិយាយពីសច្ចធម៌!”

ទី២-ត្រូវខិតខំពង្រឹង និងអភិវឌ្ឍសមត្ថភាពរបស់ខ្លួន និងត្រូវខិតខំបំពេញការងារឱ្យអស់ពីសមត្ថភាព និងឱ្យល្អបំផុត ប្រកបដោយការទទួលខុសត្រូវ។

ទី៣-“កុំធ្វើជាមន្ត្រីពើងទ្រូង!” ត្រូវប្រើប្រាស់នូវចំណេះដឹង, សមត្ថភាព និងទេពកោសល្យរបស់ខ្លួន ក្នុងការអនុវត្តតួនាទី ដើម្បីសម្រេចឱ្យបាននូវលទ្ធផលការងារ ប្រកបដោយប្រសិទ្ធភាព និងក្រមសីលធម៌ ។ ទន្ទឹមនេះ, ត្រូវមានឥស្សរភាពក្នុងការបំពេញការងាររបស់ខ្លួន ដោយត្រូវគោរព, ឱ្យតម្លៃ និងផ្តល់កិច្ចសហការល្អដល់សហការីនៅក្នុងអង្គភាពរបស់ខ្លួន ក៏ដូចជា មន្ត្រីនគរបាលយុត្តិធម៌ និងមន្ត្រីអនុវត្តច្បាប់ផ្សេងទៀតដែលមានការពាក់ព័ន្ធ។

ទី៤-ក្នុងនាមជាមន្ត្រីយុត្តិធម៌ និងជាមន្រ្តីអនុវត្តច្បាប់ ត្រូវខិតខំសាងកេរ្តិ៍ឈ្មោះរបស់ខ្លួនឱ្យក្លាយជាមន្ត្រីយុត្តិធម៌គំរូ និងគួរឱ្យគោរពនៅពេលបំពេញការងារ និងត្រូវធ្វើខ្លួនជាសេនាការពារ ដែលមិនអាចខ្វះបាន ដើម្បីធានាបាននូវស្ថិរភាព សន្តិសុខ និងសណ្តាប់ធ្នាប់សាធារណៈ ដែលជាគ្រឹះនៃការអភិវឌ្ឍសង្គមជាតិប្រកបដោយចីរភាព។

ជាចុងបញ្ចប់, ឯកឧត្តមឧបនាយករដ្ឋមន្ត្រី បានជូនពរដល់ក្រឡាបញ្ជីកម្មសិក្សាទាំង ៩៨ នាក់ ទៅបំពេញការងារនៅតាមអង្គភាពដែលខ្លួននឹងទៅបំពេញការងារ ប្រកបដោយជោគជ័យ និងទទួលបាននូវកេរ្តិ៍ឈ្មោះល្អក្នុងអាជីពរបស់ខ្លួន។