រដ្ឋបាលខេត្តកណ្តាល រៀបចំបើកវេទិកាថ្នាក់ខេត្ត ស្តីពីកំណែទម្រង់វិមជ្ឈការ និងវិសហមជ្ឈការ ដើម្បីចូលរួមសម្រេចបានចក្ខុវិស័យកម្ពុជា ឆ្នាំ២០៥០
===============
ខេត្តកណ្តាល៖ ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ
ឯកឧត្តម នូ សាខន ប្រធានក្រុមប្រឹក្សាខេត្ត និងឯកឧត្តម គួច ចំរើន អភិបាល នៃគណៈអភិបាលខេត្តកណ្តាល នាព្រឹកថ្ងៃទី១១ ខែវិច្ឆិកា ឆ្នាំ២០២៤នេះ បានអញ្ជើញជាអធិបតីក្នុងពិធីបើកវេទិកាថ្នាក់ខេត្ត ស្តីពីកំណែទម្រង់វិមជ្ឈការ និងវិសហមជ្ឈការ ដើម្បីចូលរួមសម្រេចបានចក្ខុវិស័យកម្ពុជា ឆ្នាំ២០៥០ នៅសាលាខេត្តកណ្តាល ដោយមានការចូលរួមពីឯកឧត្តម-លោកជំទាវ សមាជិកក្រុមប្រឹក្សាខេត្តអភិបាលរងខេត្ត អាជ្ញាធរក្រុង-ស្រុកទាំង១៣ និងមន្ទីរជុំវិញខេត្តផងដែរ។

ថ្លែងក្នុងពិធីនេះ ឯកឧត្តម នូ សាខន បានបញ្ជាក់ថា វេទិកាថ្នាក់ខេត្តនាពេលនេះពិតជាមានសារសំខាន់ និងមានភាពចាំបាច់ណាស់ ព្រោះវេទិកានេះបានផ្តល់ឱកាសជូន ឯកឧត្តម លោកជំទាវ លោក លោកស្រី សមាជិក សមាជិកានៃអង្គវេទិកា ពិសេសថ្នាក់ដឹកនាំមូលដ្ឋានចូលរួមពិនិត្យ ពិភាក្សា ឆ្លុះបញ្ចាំង កំណត់ដំណោះស្រាយលើបញ្ហាប្រឈមដែលយើងបានជួបប្រទះលើការអនុវត្តការងារកំណែទម្រង់វិមជ្ឈការ និងវិសហមជ្ឈការ ជាពិសេសលើប្រធានបទទាំង៨ ហើយវេទិកាថ្នាក់ខេត្តនេះ ក៏បានផ្តល់ជា កាលានុវត្តភាព ដែលអនុញ្ញាតឲ្យយើងនាំយកបញ្ហាប្រឈមទាំងឡាយណាដែលហួសពីសមត្ថភាពរដ្ឋបាលខេត្ត អាចដោះស្រាយបាន បញ្ជូនបន្តទៅក្រសួងស្ថាប័នថ្នាក់ជាតិធ្វើការពិនិត្យលទ្ធភាពដោះស្រាយបន្ត។

ឯកឧត្តម នូ សាខន បានបញ្ជាក់បន្ថែមថា ការធ្វើកំណែទម្រង់វិមជ្ឈការ និងវិសហមជ្ឈការ គឺមានគោលបំណងសំខាន់ក្នុងការចូលរួមថែរក្សានូវសុខសន្តិភាព ស្ថិរភាពនយោបាយនៅមូលដ្ឋាន បង្កើតឲ្យមានមូលដ្ឋានគ្រឹះប្រជាធិបតេយ្យ អភិបាលកិច្ចមូលដ្ឋាន សំដៅលើកកម្ពស់ ការផ្ដល់សេវាជូនប្រជាពលរដ្ឋ ការអភិវឌ្ឍន៍សេដ្ឋកិច្ចឆ្លើយតបតម្រូវការរបស់ប្រជាពលរដ្ឋបានចំគោលដៅ សំដៅដល់ការចូលរួមអភិវឌ្ឍសេដ្ឋកិច្ចជាតិប្រកបដោយនិរន្តភាព កាត់បន្ថយភាពក្រីក្រ និងលើកកម្ពស់គុណភាពជីវិត ពិសេសគឺដើម្បីចូលរួមអនុវត្តកម្មវិធីនយោបាយ និងយុទ្ធសាស្រ្តបញ្ចកោណដំណាក់កាលទី១ សំដៅកសាងមូលដ្ឋានគ្រឹះ ឆ្ពោះទៅសម្រេចបានចក្ខុវិស័យកម្ពុជាឆ្នាំ២០៣០ ក្លាយជាប្រទេសមានចំណូលមធ្យមកម្រិតខ្ពស់ និងឆ្នាំ២០៥០ ក្លាយជាប្រទេសមានចំណូលខ្ពស់។

ឯកឧត្តម នូ សាខន បានបញ្ជាក់ផងដែរថា វេទិកានេះនឹងប្រព្រឹត្តទៅក្នុងរយៈពេលមួយថ្ងៃកន្លះ ដោយចាប់ផ្តើមពីព្រឹកថ្ងៃទី១១ និងបញ្ចប់នៅព្រឹកថ្ងៃទី១២ ខែវិច្ឆិកាស្អែកនេះ ដែលនឹងមានការធ្វើបទបង្ហាញនូវរបាយការណ៍វឌ្ឍនភាព និងបញ្ហាប្រឈម នៃការអនុវត្តកំណែទម្រង់វិម្ឈការ និងវិហមជ្ឈការរបស់រដ្ឋបាលខេត្តកណ្តាលក្នុងរយៈពេល៣ឆ្នាំ (២០២១- ២០២៣) និង៦ខែដើមឆ្នាំ២០២៤ ការធ្វើបទអន្តរាគមន៍របស់រដ្ឋបាលឃុំ/សង្កាត់ចំនួន០៣ បទអន្តរាគមន៍របស់រដ្ឋបាលស្រុកចំនួន០៣ បទអន្តរាគមន៍របស់មន្ទីរអង្គភាពចំនួន០៤ បទអន្តរាគមន៍របស់អង្គការ និងសមាគមន៍ចំនួន០៣ ដោយមានការពិនិត្យ ពិភាក្សា និងការដាក់ចេញវិធានការសម្រាប់ការដោះស្រាយបញ្ហាប្រឈមតាមករណីដែលស្នើឡើងដោយរដ្ឋបាលឃុំ សង្កាត់ រដ្ឋបាលក្រុង ស្រុក និងរដ្ឋបាលខេត្ត ព្រមទាំងមានការកំណត់បញ្ហាប្រឈមគន្លឹះៗដែលត្រូវស្នើសុំការធ្វើអន្តរាគមន៍ដោះស្រាយពីរាជរដ្ឋាភិបាល និងក្រសួងស្ថាប័នពាក់ព័ន្ធ ដែលជាការផ្តល់ឱកាសឲ្យសមាជិក សមាជិកា បានចូលរួមមតិយោបល់បានយ៉ាងទូលំទូលាយ។

ជាមួយគ្នានេះដែរ ឯកឧត្តមប្រធានក្រុមប្រឹក្សាខេត្ត បានស្នើដល់សមាជិក សមាជិកានៃអង្គវេទិកាចូលរួមស្តាប់ការធ្វើបទបង្ហាញ និងចូលរួមពិភាក្សាឲ្យបានល្អិតល្អន់ ស៊ីជម្រៅ និយាយត្រង់ក្នុងន័យស្ថាបនាដើម្បីជាធាតុចូលសម្រាប់ជាមូលដ្ឋាន ក្នុងការពិភាក្សារៀបចំគោលនយោបាយ គោលការណ៍ណែនាំបន្ថែម ក្នុងការអនុវត្តកំណែទម្រង់វិមជ្ឈកម្ម និងវិសមជ្ឈ ឱ្យទទួលបានជោគជ័យ សម្រេចបានចក្ខុវិស័យកម្ពុជាឆ្នាំ២០៥០ ព្រមទាំងដើម្បីកែច្នៃការងាររបស់យើងឲ្យកាន់តែមានលទ្ធផលល្អ និងមានប្រសិទ្ធភាព សំដៅបង្កើនជំនឿទុកចិត្តពីប្រជាពលរដ្ឋ និងអ្នកទទួលសេវាលើការដឹកនាំរបស់អាជ្ញាធរ និងសមត្ថកិច្ចជំនាញ ជាពិសេសការផ្តល់ទំនុកចិត្ត និងការគាំទ្ររបស់ប្រជាពលរដ្ឋលើមាគ៌ាដឹកនាំរបស់រាជរដ្ឋាភិបាលកម្ពុជាដែលមាន សម្តេចមហាបវរធិបតី ហ៊ុន ម៉ាណែត ជាប្រមុខរាជរដ្ឋាភិបាល។