លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងសហការី បានអញ្ជើញជួបសំណេះសំណាលសួរសុខទុក្ខ និងចែកអំណោយមនុស្សធម៌ ដល់ប្រជាជនងាយរងគ្រោះ ចំនួន២៧៤គ្រួសារ នៅក្នុងស្រុកបន្ទាយអំពិល ខេត្តឧត្តរមានជ័យ
ក្នុងដំណើរបេសកកម្មមនុស្សធម៌លេីទឹកដីខេត្តឧត្តរមានជ័យ នាថ្ងៃទី១២ ខែមីនា ឆ្នាំ២០២៤ នេះ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងសហការី រួមជាមួយថ្នាក់ដឹកនាំ មន្ត្រី អ្នកស្ម័គ្រចិត្ត និងយុវជននៃសាខាកាកបាទក្រហមកម្ពុជា ខេត្តឧត្តរមានជ័យ បានអញ្ជើញជួបសំណេះសំណាលសួរសុខទុក្ខ និងចែកអំណោយមនុស្សធម៌ជួយសម្រាលការលំបាកដល់ប្រជាជនងាយរងគ្រោះបំផុតចំនួន ២៧៤គ្រួសារ រស់នៅក្នុងភូមិចំនួន ៥៨ភូមិ នៃឃុំអំពិល និងឃុំបេង ស្រុកបន្ទាយអំពិល ខេត្តឧត្តរមានជ័យ។ ក្រុមការងារក៏បានជួបសំណេះសំណាលសួរសុខទុក្ខ និងអប់រំផ្សព្វផ្សាយពីសារអប់រំសុខភាពដល់ស្ត្រីជាមាតាដែលទើបសម្រាលកូន និងមានផ្ទៃពោះ ចំនួន ៥០នាក់ នៅក្នុងមណ្ឌលសុខភាពគោកមនសែនជ័យ និងមណ្ឌលសុខភាពវល្លិ៍យាវ ផងដែរ។
ក្នុងឱកាសជួបសំណេះសំណាលជាមួយប្រជាជនទាំងអស់ លោកជំទាវអគ្គលេខាធិការរងទី១ ក៏បានពាំនាំនូវក្តីនឹករលឹក ការផ្តាំផ្ញើសួរសុខទុក្ខពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះលោកយាយលោកតា ស្ត្រីជាមាតា និងបងប្អូនប្រជាជនទាំងអស់។ ទន្ទឹមនឹងនេះ ក្នុងឱកាសនៃយុទ្ធនាការខួបទី១៦១ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៤ ក្រោមប្រធានបទ “រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ”, លោកជំទាវ បានអំពាវនាវដល់លោកយាយលោកតា និងប្រជាជនទាំងអស់ សូមយកចិត្តទុកដាក់គិតគូរពីការថែទាំសុខភាព ធ្វើយ៉ាងណាដើម្បីឱ្យខ្លួនយើងម្នាក់ៗមានសុខភាពល្អ ដោយប្រកាន់ខ្ជាប់នូវឥរិយាបថ “ទម្លាប់រស់នៅល្អ, ស្រឡាញ់ខ្លួន ស្ងួនចំណី, ការពារប្រសើរជាងព្យាបាល” កាត់បន្ថយការទទួលទានអាហារដែលមានជាតិប្រៃ ស្ករ ឬភេសជ្ជៈផ្អែម និងមានជាតិខ្លាញ់-ប្រេងច្រើន ដើម្បីបង្ការជំងឺលើសសម្ពាធឈាម គ្រោះថ្នាក់សរសៃឈាមខួរក្បាល បង្ការការលើសទម្ងន់ ធាត់ ជំងឺទឹកនោមផ្អែម និងជំងឺបេះដូងសរសៃឈាមជាដើម ដោយត្រូវទទួលទានបន្លែ ផ្លែឈើ និងពិសាជាតិទឹកឱ្យបានច្រើន។
បន្ថែមពីនេះ សូមប្រជាជនទាំងអស់ចូលរួមចំណែកកាត់បន្ថយការប្រើប្រាស់ថង់ប្លាស្ទិក, កុំវេចខ្ចប់របស់ក្តៅក្នុងប្រអប់ប្លាស្ទិក ដោយប្រើស្លឹកចេក ស្លឹកឈូក ឬក្រដាសសម្រាប់វេចខ្ចប់ជំនួសវិញ, សម្អាតបរិស្ថានឱ្យបានស្អាត, ទុកដាក់និងបែងចែកសម្រាមឱ្យបានត្រឹមត្រូវ និងមិនត្រូវដុតសម្រាមប្លាស្ទិកជាដាច់ខាត និងចូលរួមដាំដំណាំគ្រួសារឱ្យបានច្រើន។ ជាងនេះទៅទៀត ក្នុងពេលបច្ចុប្បន្នដែលកំពុងមានអាកាសធាតុក្តៅខ្លាំង សូមនាំគ្នាប្រុងប្រយ័ត្ននិងមានវិធានការដូចជា៖ ការធ្វើយ៉ាងណារក្សាជាតិទឹកក្នុងខ្លួន, ស្លៀកពាក់សមរម្យ, ជៀសវាងការប៉ះកម្តៅខ្លាំង, សម្រាកក្នុងបរិយាកាសត្រជាក់, ប្រើប្រាស់សម្ភារការពារ, តាមដានបុគ្គលដែលងាយរងគ្រោះ, កុំទុកនរណាម្នាក់នៅក្នុងឡានចត និងត្រូវដឹងពីសញ្ញាព្រមាននានាជាដើម។
សូមបញ្ជាក់ថា គ្រួសារងាយរងគ្រោះបំផុតទាំង ២៧៤គ្រួសារ ក្នុងគ្រួសារនីមួយៗទទួលបាន៖ អង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកត្រី ១យួរ, ឃីត (មុង ភួយ សារុង ក្រមា) ១កញ្ចប់ និងថវិកា ២ម៉ឺនរៀល។ ដោយឡែក ស្ត្រីជាមាតាចំនួន ៥០នាក់ ក្នុងម្នាក់ៗទទួលបាន៖ អង្ករសុខភាព ២កញ្ចប់ (ស្មើនឹង ១គីឡូក្រាម), ឃីត (មុង ភួយ សារុង ក្រមា) ១កញ្ចប់, សាប៊ូដុសខ្លួន ៤ដុំ និងថវិកា ៥ម៉ឺនរៀល៕
