កាកបាទក្រហមកម្ពុជា ចុះផ្សព្វផ្សាយដល់និស្សិតចំនួន ១៧០នាក់ នៃសាកលវិទ្យាល័យកម្ពុជា ស្តីពីទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៤ ក្រោមប្រធានបទ “រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ”។

បន្ទាប់ពីដំណើរការអស់រយៈពេល១៥ថ្ងៃ នៃយុទ្ធនាការផ្សព្វផ្សាយស្តីពី ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៤ ក្រោមប្រធានបទ “រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ” នៅថ្ងៃទី២០ ខែមីនា ឆ្នាំ២០២៤នេះ កាកបាទក្រហមកម្ពុជា ដែលមាន សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានបន្តធ្វើការផ្សព្វផ្សាយដល់និស្សិតចំនួន ១៧០នាក់ នៃសាកលវិទ្យាល័យកម្ពុជា ក្រោមអធិបតីភាពលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងឯកឧត្តមបណ្ឌិត អ៊ី រតនា សាកលវិទ្យាធិការរងទទួលបន្ទុកសិក្សានៃសាកលវិទ្យាល័យកម្ពុជា។

ថ្លែងក្នុងឱកាសនោះ លោកជំទាវអគ្គលេខាធិការរងទី១ បានសម្តែងនូវក្តីសោមនស្សរីករាយដោយបានចូលរួមកម្មវិធីផ្សព្វផ្សាយនាថ្ងៃនេះ និងថ្លែងអំណរគុណយ៉ាងជ្រាលជ្រៅចំពោះគណៈគ្រប់គ្រងសាកលវិទ្យាល័យកម្ពុជា ដែលបានផ្តល់ការគាំទ្រ និងផ្តល់ឱកាសដល់និស្សិត បានចូលរួមកម្មវិធីផ្សព្វផ្សាយរបស់កាកបាទក្រហមកម្ពុជា។

លោកជំទាវ បានគូសបញ្ជាក់ពីសារបាននៃការប្រារព្ធទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ដែលជាការរំលឹកដល់ការបង្កើតចលនាអន្តរជាតិកាកបាទក្រហមនិងអឌ្ឍចន្ទក្រហម (ហៅកាត់ថា ចលនាអន្តរជាតិ) ដែលត្រូវបានបង្កើតឡើងនៅឆ្នាំ១៨៦៣។ ហេតុដូចនេះ ក្នុងនាមកាកបាទក្រហមកម្ពុជា ដែលជាជំនួយការឱ្យអាជ្ញាធរសាធារណៈក្នុងវិស័យមនុស្សធម៌ ដែលត្រូវបានបង្កើតឡើងកាលពីថ្ងៃទី ១៨ ខែកុម្ភៈ ឆ្នាំ១៩៥៥ និងជាសមាជិកទី៨៥ របស់សហព័ន្ធអន្តរជាតិកាលពីឆ្នាំ១៩៦០ ដែរនោះ ក៏ត្រូវមានភារកិច្ចចូលរួមប្រារព្ធទិវា ៨ ឧសភានេះជារៀងរាល់ឆ្នាំផងដែរ។

សម្រាប់កាកបាទក្រហមកម្ពុជា ការប្រារព្ធទិវា៨ឧសភា បានរៀបចំជាមិទ្ទីងថ្នាក់ជាតិ ចាប់ផ្តើមតាំងពីឆ្នាំ១៩៩៩ ដែលមានគោលបំណងផ្សព្វផ្សាយពីអ្វីដែលកាកបាទក្រហមកម្ពុជា បាននិងកំពុងធ្វើ, បង្ហាញពីសមិទ្ធផល និងវឌ្ឍនភាពរបស់កាកបាទក្រហមកម្ពុជា និងបន្តអំពាវនាវដល់សប្បុរសជនគ្រប់មជ្ឈដ្ឋាន ដើម្បីកៀរគររកមូលនិធិសម្រាប់ទ្រទ្រង់ដល់សកម្មភាពមនុស្សធម៌របស់សមាគមជាតិ។

ផ្អែកលើសកម្មភាពរយៈពេល ១ព្រឹកនេះ លោកជំទាវ បានសង្កេតឃើញថា ក្មួយៗនិស្សិតទាំងអស់មានការចាប់អារម្មណ៍ និងយល់ដឹងខ្ពស់ពីបញ្ហាសុខភាព ជាពិសេសការប្តេជ្ញាចិត្តរបស់ក្មួយៗក្នុងការផ្សព្វផ្សាយបន្តក្នុងនាមជាមិត្តអប់រំមិត្ត។ លោកជំទាវ សង្ឃឹមជឿជាក់ថា យើងម្នាក់ៗនឹងចូលរួមអនុវត្តដើម្បីឱ្យខ្លួនយើងមានសុខភាពល្អ និងក្លាយជាទូតសុឆន្ទៈក្នុងការចូលរួមចែករំលែកសារគន្លឹះទាំងនេះ ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ ជូនដល់ប្រជាជនយើង។

ឯកឧត្តមបណ្ឌិត អ៊ី រតនា បានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានផ្តល់ឱកាសដល់និស្សិតនៃសាកលវិទ្យាល័យកម្ពុជា បានចូលរួមវគ្គផ្សព្វផ្សាយនេះ និងសូមវាយតម្លៃខ្ពស់ចំពោះខ្លឹមសារផ្សព្វផ្សាយដ៏មានសារៈសំខាន់ ដែលនឹងផ្តល់នូវចំណេះដឹង បំណិនជីវិតបន្ថែម ដល់ប្អូនៗនិស្សិត ពីលើអ្វីដែលប្អូនៗបាននិងកំពុងសិក្សាជំនាញនៅក្នុងសាកលវិទ្យាល័យ។ជំនួសមុខឱ្យលោកជំទាវ ឃឹម រ៉ានី សាកលវិទ្យាធិការស្តីទី និងជាប្រធានកិត្តិយសក្លឹបយុវជនកាកបាទក្រហមកម្ពុជា ប្រចាំសាកលវិទ្យាល័យកម្ពុជា និងក្នុងនាមទីប្រឹក្សា, ឯកឧត្តមបណ្ឌិត សូមគាំទ្រយ៉ាងពេញទំហឹង និងលើកកម្ពស់សកម្មភាពទាំងឡាយរបស់យុវជនកាកបាទក្រហមកម្ពុជា ដើម្បីចែករំលែកក្តីស្រឡាញ់ និងការលះបង់ពេលវេលាកម្លាំងកាយចិត្ត ដើម្បីសង្គមជាតិយើង។

សូមបញ្ជាក់ថា ចុងបញ្ចប់នៃកម្មវិធី លោកជំទាវ អគ្គលេខាធិការរងទី១ បានប្រគល់ប័ណ្ណសរសើរ និងថ្លែងអំណរគុណរបស់ សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ជូនគណៈគ្រប់គ្រងសាកលវិទ្យាល័យកម្ពុជា និងជូនកាដូអនុស្សាវរីយ៍ដល់និស្សិតចំនួន ១០នាក់ ដែលបានឡើងឆ្លើយសំណួរក្នុងកម្មវិធីផ្សព្វផ្សាយខាងលើនេះផងដែរ៕