ឯកឧត្តម នាយឧត្តមសេនីយ៍ វង្ស ពិសេន បានអនុញ្ញាតឱ្យអនុព័ន្ធយោធាឥណ្ឌាប្រចាំកម្ពុជាចូលជួបសម្តែងការគួរសម និងពិភាក្សាការងារ

(ភ្នំពេញ)៖ នៅព្រឹកថ្ងៃទី២៧ ខែមីនា ឆ្នាំ២០២៤ ឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ បានអនុញ្ញាតឲ្យលោកវរសេនីយ៍ឯក ឌីរ៉ាត ខូតវាល នាយការិយាល័យអនុព័ន្ធយោធាឥណ្ឌាប្រចាំកម្ពុជា ដែលមាននិវេសនដ្ឋាននៅរដ្ឋធានីហាណូយ ប្រទេសវៀតណាម ចូលជួបសម្តែងការគួរសម និងពិភាក្សាការងារនៅអគ្គបញ្ជាការដ្ឋាន។

ក្នុងឱកាសនោះ ឯកឧត្តម នាយឧត្តមសេនីយ៍ វង្ស ពិសេន បានមានសេចក្តីសោមនស្សរីករាយដែលបានជួបពិភាក្សាជាមួយលោកវរសេនីយ៍ឯក ឌីរ៉ាត ខូតវាល ដើម្បីផ្លាស់ប្ដូរយោបល់ជុំវិញការពង្រឹងពង្រីកទំនាក់ទំនងកិច្ចសហប្រតិបត្តិការជាប្រពៃណី និងប្រវត្តិសាស្ត្ររវាងកងទ័ពនៃប្រទេសទាំងពីរ។

ឯកឧត្តម នាយឧត្តមសេនីយ៍ អគ្គមេបញ្ជាការ បានបញ្ជាក់ជូនពីស្ថានការមួយចំនួននៅកម្ពុជា ដែលឆ្លងកាត់សង្គ្រាមផ្ទៃក្នុងជាច្រើនទស្សវត្សរ៍ និងទើបទទួលបានសន្តិភាពពេញលេញក្នុងរយៈពេលជាង ២៦ ឆ្នាំមកនេះ ក្រោមការដាក់ចេញនយោបាយឈ្នះ ឈ្នះរបស់សម្ដេចអគ្គមហាសេនាបតីតេជោ ហ៊ុន សែន ធ្វើឲ្យកម្ពុជាមានការរីកចម្រើនលើគ្រប់វិស័យ។

ឯកឧត្តមក៏បានបញ្ជាក់ជូនពីព្រឹត្តិការណ៍សំខាន់ៗដែលកម្ពុជាសម្រេចបានក្នុងបណ្ដាឆ្នាំកន្លងមកនេះ រួមមាន៖ ការប្រយុទ្ធប្រឆាំងជំងឺកូវីដ-១៩ ដំណើរការស្ដារសេដ្ឋកិច្ចឡើងវិញ ការរៀបចំកិច្ចប្រជុំកំពូលអាស៊ានឆ្នាំ២០២២ ការរៀបចំការប្រកួតកីឡាស៊ីហ្គេម ប៉ារ៉ាហ្គេម ការបោះឆ្នោតជ្រើសតាំងតំណាងរាស្ត្រនីតិកាលទី៧ ការរៀបចំរាជរដ្ឋាភិបាលអាណត្តិថ្មី និងការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥។

ពាក់ព័ន្ធកិច្ចសហប្រតិបត្តិការរវាង កម្ពុជា-ឥណ្ឌា ឯកឧត្តម នាយឧត្តមសេនីយ៍ អគ្គមេបញ្ជាការ បានរំលឹកឡើងវិញពីទំនាក់ទំនងជាប្រវត្តិសាស្ត្រយ៉ាងជិតស្និទ្ធតាំងពីសតវត្សទី១ តាមរយៈឥទ្ធិពលនៃសាសនាហិណ្ឌូ និងព្រះពុទ្ធសាសនា ដូចដែលមានសិលាចារិកជាសក្ខីភាពនៅលើផ្ទាំងប្រាសាទអង្គរវត្ត ប្រាសាទតាព្រហ្ម និងប្រាសាទបាយ័ន។

ក្នុងនាមក្រសួងការពារជាតិ ឯកឧត្តមនាយឧត្តមសេនីយ៍ វង្ស ពិសេន បានថ្លែងអំណរគុណរដ្ឋាភិបាលប្រទេសឥណ្ឌា ដែលបានជួយពង្រឹងទំនាក់ទំនង កិច្ចសហប្រតិបត្តិការរវាងកងទ័ពប្រទេសទាំងពីរលើការបណ្ដុះបណ្ដាលធនធានមនុស្សក្នុងកងយោធពលខេមរភូមិន្ទ មានដូចជា ភាសាអង់គ្លេស ប្រឆាំងភេរវកម្ម លោតឆ័ត្រយោងជាដើម។

បន្ថែមពីនេះ កាលពីឆ្នាំ២០២៣ នាវារបស់កងទ័ពជើងទឹកឥណ្ឌា ចំនួន៣គ្រឿង ក៏បានចូលចតនិងទស្សនកិច្ចនៅកំពង់ផែស្វយ័ត ក្រុងព្រះសីហនុ នៃព្រះរាជាណាចក្រកម្ពុជា ដែលកិច្ចសហប្រតិបត្តិការទាំងនេះបានបង្ហាញពីការរឹតចំណងមិត្តភាព និងលើកកម្ពស់កិច្ចសហប្រតិបត្តិការកងទ័ពប្រទេសទាំងពីរផងដែរ។

ឯកឧត្តម បានស្នើដល់ភាគីឥណ្ឌា បន្តជួយបណ្តុះបណ្តាលធនធានមនុស្សក្នុងកងយោធពលខេមរភូមិន្ទ ផ្លាស់ប្តូរទស្សនកិច្ចគ្រប់កម្រិត ការផ្លាស់ប្តូរព័ត៌មានទប់ស្កាត់អំពើភេរវកម្ម ឧក្រិដ្ឋកម្មឆ្លងដែននានា កិច្ចសហប្រតិបត្តិការសង្គ្រោះគ្រោះមហន្តរាយ បេសកកម្មរក្សាសន្តិភាព ការដោះមីន កិច្ចសហប្រតិបត្តិការរវាងប្រភេទទ័ពនិងប្រភេទទ័ព និងការចូលចតនាវាជាដើម។

ជាកិច្ចឆ្លើយតប លោកវរសេនីយ៍ឯក ឌីរ៉ាត ខូតវាល បានថ្លែងអំណរគុណ ឯកឧត្តម នាយឧត្តមសេនីយ៍ អគ្គមេបញ្ជាការ ដែលបានអនុញ្ញាតឲ្យរូបលោកបានចូលជួបសម្ដែងការគួរសម និងពិភាក្សាការងារ ក្នុងពេលវេលាដ៏មានតម្លៃ ព្រមទាំងបានស្ដាប់ពីទំនាក់ទំនងជាប្រវត្តិសាស្រ្តរបស់ប្រទេសទាំងពីរ អំពីវប្បធម៌ អរិយធម៌ និងការពារជាតិ។

លោកវរសេនីយ៍ឯក ឌីរ៉ាត ខូតវាល បានគូសបញ្ជាក់ថា កិច្ចសហប្រតិបត្តិការរវាងកងទ័ពកម្ពុជាឥណ្ឌាបានចាប់ផ្ដើមតាំងពីទសវត្សរ៍ ៩០ ក្នុងពេលដែលឥណ្ឌាបានបញ្ជូនកម្លាំងមកកម្ពុជាដែលជាផ្នែកមួយរបស់អង្គការសហប្រជាជាតិ ដើម្បីរក្សាសន្តិភាព ហើយកិច្ចសហប្រតិបត្តិការជាក់ស្ដែង គឺចាប់ផ្ដើមពីឆ្នាំ២០០៧។

លោកវរសេនីយ៍ឯក ឌីរ៉ាត ខូតវាល បានបន្តថា ឆ្នាំ២០២៤នេះ ឥណ្ឌា បានត្រៀមជួយបណ្ដុះបណ្ដាលជំនាញផ្សេងៗដល់កងយោធពលខេមរភូមិន្ទ ជាច្រើនវគ្គ និងបានស្នើសុំកិច្ចសហការពីឯកឧត្តមអគ្គមេបញ្ជាការ ពិនិត្យលទ្ធភាពបញ្ជូនសិក្ខាកាមឲ្យចូលសិក្សាវគ្គទាំងនេះ ដើម្បីបង្កើនកិច្ចសហប្រតិបត្តិការរវាងកងទ័ពប្រទេសទាំងពីរ។

ឯកឧត្តម នាយឧត្តមសេនីយ៍ វង្ស ពិសេន បានស្វាគមន៍ចំពោះការយកចិត្តទុកដាក់របស់ភាគីឥណ្ឌា លើការបន្តជួយបណ្ដុះបណ្ដាលធនធានមនុស្ស ក៏ដូចជាការពង្រឹងកិច្ចសហប្រតិបត្តិការរវាងកងទ័ពប្រទេសទាំងពីរ ដោយបានធ្វើការប្រុងប្រៀបជាស្រេចដើម្បីសហការរាល់ការបង្កលក្ខណៈរបស់ភាគីឥណ្ឌា៕