ឯកឧត្តម កើត ឆែ បានអញ្ចើញចូលរួមជាអធិបតីក្នុងពិធីផ្សព្វផ្សាយស្តីពីការអនុវត្តរបបសន្តិសុខសង្គមផ្នែកថែទាំសុខភាព តាមរបបភាគទានដោយស្ម័គ្រចិត្តសម្រាប់អ្នកក្នុងបន្ទុកសមាជិក ប.ស.ស. ជាមន្ត្រីសាធារណៈ
==================
នារសៀលថ្ងៃទី៦ ខែឧសភា ឆ្នាំ២០២៤ ឯកឧត្តម កើត ឆែ អភិបាលរងរាជធានីភ្នំពេញ បានអញ្ចើញចូលរួមជាអធិបតីក្នុងនាមឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ ក្នុងពិធីផ្សព្វផ្សាយស្តីពី « ការអនុវត្តរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តសម្រាប់អ្នកក្នុងបន្ទុកសមាជិក ប.ស.ស. ជាមន្ត្រីសាធារណៈ ជូនថ្នាក់ដឹកនាំ និងមន្ត្រីរាជការ ក្រោមឱវាទរដ្ឋបាលរាជធានីភ្នំពេញ​ » ជាមួយឯកឧត្តម ស៊ុំ សោភ័ណ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ តំណាងដ៏ខ្ពង់ខ្ពស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងឯកឧត្តម ប៉ែន នរៈវុធ អគ្គនាយករង បេឡាជាតិសន្តិសុខសង្គម ប្រារព្ធឡើងនៅសាលប្រជុំ នៃសាលារាជធានីភ្នំពេញ។

នាឱកាសនេះ ឯកឧត្តម កើត ឆែ អភិបាលរងរាជធានីភ្នំពេញ បានថ្លែងអំណរគុណយ៉ាងជ្រាលជ្រៅចំពោះវត្តមានរបស់ឯកឧត្តម ស៊ុំ សោភ័ណ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ តំណាងដ៏ខ្ពង់ខ្ពស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងឯកឧត្តម ប៉ែន នរៈវុធ អគ្គនាយករង បេឡាជាតិសន្តិសុខសង្គម ដែលបានអញ្ជើញចូលរួមក្នុងពិធីផ្សព្វផ្សាយដ៏មានសារៈសំខាន់នេះ។

ជាមួយគ្នានេះ ឯកឧត្តម កើត ឆែ ក៏សូមគោរពថ្លែងអំណរគុណយ៉ាងជ្រាលជ្រៅចំពោះក្រសួងការងារ និងបណ្តុះបណ្តាលវិជ្ជាជីវៈ និងបេឡាជាតិសន្តិសុខសង្គម ដែលបានផ្តួចផ្តើមសហការបង្កើតឱ្យមានពិធីផ្សព្វផ្សាយនាថ្ងៃនេះឡើង ក្នុងន័យបង្កើនការយល់ដឹង ចែករំលែកព័ត៌មានអំពីក្របខណ្ឌច្បាប់ លិខិតបទដ្ឋានគតិយុត្តពាក់ព័ន្ធក្នុងវិស័យគាំពារសង្គម និងអត្ថប្រយោជន៍នានាទាក់ទងនឹងរបបសន្តិសុខសង្គមផ្នែកថែទាំសុខភាព ជូនដល់ក្រុមគោលដៅដែលជាថ្នាក់ដឹកនាំបុគ្គលិក-មន្ត្រីរាជការ នៃរដ្ឋបាលរាជធានីភ្នំពេញ សរុប ៣០៥នាក់ ដើម្បីពន្យល់ឱ្យយល់កាន់តែច្បាស់អំពីប័ណ្ណប.ស.ស. ក៏ដូចជាអត្ថប្រយោជន៍ នៃការប្រើប្រាស់ប័ណ្ណនេះ។

លើសពីនេះ ឯកឧត្តម កើត ឆែ បានស្នើដល់អ្នកចូលរួមទាំងអស់ត្រូវយកចិត្តទុកដាក់ចូលរួមឱ្យបានពេញលេញ ខិតខំត្រងត្រាប់ទទួលនូវចំណេះដឹង និងបទពិសោធន៍នានា តាមរយៈការធ្វើបទបង្ហាញរបស់លោក សុខ បូរ៉ា ប្រធាននាយកដ្ឋានតាវកលិកសន្តិសុខសង្គម និងជាវាគ្មិន ព្រមទាំងសហការី ហើយក្នុងករណីដែលមានចម្ងល់ ត្រូវលើកជាសំណួរដើម្បីស្នើសុំការបកស្រាយ និងត្រូវស្នើសុំឯកសារបន្ថែម ជាពិសេសគឺនាំយកចំណេះដឹង និងព័ត៌មានដែលទទួលបានក្នុងពិធីនេះ ទៅផ្សព្វផ្សាយបន្តជូនដល់បុគ្គលិក-មន្ត្រីរាជការក្រោមឱវាទ ឱ្យបានជ្រួតជ្រាបកាន់តែទូលំទូលាយថាបើយល់ច្បាស់ពីវិធីប្រើប្រាស់ប័ណ្ណប.ស.ស. គឺដូចយល់ច្បាស់ពីអត្ថប្រយោជន៍​ដែលខ្លួនកំពុងមាន។