លោកឧត្តមសេនីយ៍ទោ សុខ សំបូរ បានអញ្ចើញចូលរួមអមជាមួយឯកឧត្តម ឧត្តមសេនីយ៍ឯក ជីវ ផល្លី ទទួលជួបពិភាក្សាការងារជាមួយ គណៈប្រតិភូឥណ្ឌូនេស៊ី នៅអគ្គស្នងការដ្ឋាននគរបាលជាតិ
================
ភ្នំពេញ៖នារសៀលថ្ងៃទី១២ ខែមិថុនា ឆ្នាំ២០២៤ នៅអគ្គស្នងការដ្ឋាននគរបាលជាតិ លោកឧត្តមសេនីយ៍ទោ សុខ សំបូរ ប្រធាននាយកដ្នានប្រយុទ្ធប្រឆាំងអំពើជួញដូរមនុស្សនិងការពារនីតិជន បានអញ្ចើញចូលរួមអមជាមួយឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ទទួលជួបពិភាក្សាការងារជាមួយ គណៈប្រតិភូឥណ្ឌូនេស៊ី ដឹកនាំដោយលោកស្រី នូ រូកម៉ា ហ៊ីដាយ៉ាហ៍ (Nur Rokhmah Hidayah) ជំនួយការរងសម្រាប់កិច្ចសហប្រតិបត្តិការអាស៊ីនិងអាហ្រ្វិចក្រសួងសហប្រតិបត្តិការសម្រាប់កិច្ចការច្បាប់ និងសន្តិសុខនៃសាធារណរដ្ឋឥណ្ឌូនេស៊ី អមដោយសមត្ថកិច្ចពាក់ព័ន្ធ នៃប្រទេសឥណ្ឌូនេស៊ី ស្ដីពីការអនុវត្ត MOU លើការងារប្រឆាំងឧក្រិដ្ឋកម្មឆ្លងដែនរវាងកម្ពុជា-ឥណ្ឌូនេស៊ី ។

ជាកិច្ចចាប់ផ្តើម លោកស្រី នូ រូកម៉ា ហ៊ីដាយ៉ាហ៍ (Nur Rokhmah Hidayah) បានថ្លែងអំណរគុណដល់សមត្ថកិច្ចកម្ពុជា ដែលបានអន្តរាគមន៍ជួយប្រជាពលរដ្ឋ និងជនរងគ្រោះឥណ្ឌូនេស៊ីកន្លងមក និងការផ្សព្វផ្សាយព័ត៌មានពីការជួញដូរមនុស្សនៅកម្ពុជាធ្ងន់ធ្ងរ តែស្ថានភាពពិតមិនធ្ងន់ធ្ងរដូចការផ្សាយ។ លោកស្រី នូ រូកម៉ា ហ៊ីដាយ៉ាហ៍ (Nur Rokhmah Hidayah) បន្តថា លោកស្រីក៏បានស្នើអញ្ជើញនគរបាលជំនាញកម្ពុជាទៅចូលរួមសិក្ខាសាលាស្តីពីការប្រឆាំអំពើជួញដូរមនុស្សឆ្លងដែន នៅប្រទេសឥណ្ឌូនេស៊ីក្នុងខែកញ្ញា ឆ្នាំ២០២៤។

ជាកិច្ចឆ្លើយតប ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ មានប្រសាសន៍ថា កម្ពុជាជាប្រទេសរងគ្រោះ ដោយការផ្សព្វផ្សាយព័ត៌មានមិនពិតកន្លងមក តែកម្ពុជាមានយន្តការប្រយុទ្ធប្រឆាំងអំពើជួញដូរមនុស្សពីថ្នាក់ជាតិរហូតដល់ថ្នាក់ក្រោមជាតិ និងការអនុវត្តច្បាប់ផ្អែកលើច្បាប់ជាតិ និងច្បាប់អន្តរជាតិ (ពិធីសារប៉ាឡឺម៉ូ) មានអង្គភាពឯកទេសប្រឆាំងការជួញដូរមនុស្ស មានហតឡាញសម្រាប់ទទួលបណ្តឹងពីស្ថានទូត និងជនបរទេស (មានហតឡាញ1288 និង117) ទទួលព័ត៌មានអន្តរាគមន៍ និងឆ្លើយតបប្រកប។

ឯកឧត្តម ឧត្តមសេនីយ៍ឯក អគ្គស្នងការរងនគរបាលជាតិ ក៏បានស្នើឲ្យភាគីឥណ្ឌូនេស៊ីធ្វើលិខិតផ្លូវការមក ឯកឧត្តម នាយឧត្តមសេនីយ៍ អគ្គស្នងការនគរបាលជាតិ ស្តីពីការ ចូលរួមសិក្ខាសាលានាពេលខាងមុខនេះ។
ភាគីទាំងពីរ បានចែករំលែចំណេះដឹងផ្នែកច្បាប់ ការអនុវត្តនីតិវិធី បទពិសោធន៍ បញ្ហាប្រឈម ករណីសិក្សា ការកំណត់អត្តសញ្ញាណជនរងគ្រោះដោយអំពើជួញដូរមនុស្ស លំហូរនីតិវិធីនៃការការពារជនរងគ្រោះ ការផ្តល់សេវាសង្គម និងសេវាផ្នែកច្បាប់ដល់ជនរងគ្រោះ និងលំហូរនីតិវិធីការពារជនរងគ្រោះរហូតដល់ការធ្វើសមាហរណកម្មជនរងគ្រោះទៅសហគមន៍ ឬការបញ្ជូនត្រឡប់ទៅប្រទេសកំណើតវិញតាមការស្នើសុំពីជនរងគ្រោះជាជនបរទេស ដោយគោរពសិទ្ធិ ការសម្រេចចិត្ត និងឧត្តមប្រយោជន៍របស់ជនរងគ្រោះ ព្រមទាំងចាត់វិធានការបង្ការទប់ស្កាត់អំពើជួញដូមនុស្សឆ្លងដែន៕