លោកឧត្តមសេនីយ៍ទោ សុក សំបូរ អញ្ចើញចូលរួមកិច្ចប្រជុំបូកសរុបសភាពការណ៍ប្រចាំខែ និងលើកទិសដៅបន្ត របស់នាយកដ្ឋានប្រឆាំងការជួញដូរមនុស្សនិងការពារអនីតិជន
==============
ភ្នំពេញ៖នៅព្រឹកថ្ងៃទី២៥ ខែមិថុនា ឆ្នាំ២០២៤ លោកឧត្តមសេនីយ៍ទោ សុក សំបូរ ប្រធាននាយកដ្ឋាននាយកដ្ឋានប្រឆាំងការជួញដូរមនុស្ស និងការពារអនីតិជន បានអញ្ចើញចូលរួមក្នុងកិច្ចប្រជុំបូកសរុបសភាពការណ៍ប្រចាំខែនិងលើកទិសដៅបន្ត របស់នាយកដ្ឋានប្រឆាំងការជួញដូរមនុស្សនិងការពារអនីតិជន ក្រោមអធិបតីភាពឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នៅអគ្គស្នងការដ្ឋាននគរបាលជាតិ ។

កិច្ចប្រជុំនេះ មានការចូលរួមពី លោកឧត្តមសេនីយ៍ទោ អនុប្រធាននាយកដ្ឋានកណ្តាលនគរបាលយុត្តិធម៌ លោកឧត្តមសេនីយ៍-វរសេនីយ៍ អនុប្រធាននាយកដ្ឋាន លោកនាយ-នាយរងការិយាល័យ លោកនាយ-នាយរងផ្នែក និងមន្រ្តី នៃនាយកដ្ឋានប្រឆាំងការជួញដូរមនុស្ស និងការពារអនីតិជន សរុបចំនួន១៥២រូប។

បន្ទាប់ពីបានស្តាប់ការធ្វើបទបង្ហាញរបស់លោក-លោកស្រីឧត្តមសេនីយ៍អនុប្រធាននាយកដ្ឋានទទួលដឹកនាំការិយាល័យនីមួយៗ និងសេចក្តីរាយការណ៍របស់លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជនរួចមក ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ ក៏បានឯកភាពគាំទ្រតាមជំនាញបច្ចេកទេស និងបញ្ហាប្រឈមមួយចំនួនរបស់នាយកដ្ឋាន ។

ឯកឧត្តម ឧត្តមសេនីយ៍ឯក ជីវ ផល្លី មានប្រសាសន៍ថា កិច្ចប្រជុំប្រចាំខែនាព្រឹកនេះ គឺដើម្បីពិនិត្យលទ្ធផល និងដកពិសោធន៍ ក៏ដូចជាបញ្ហាប្រឈមសម្រាប់ពិភាក្សាគ្នាហើយរកដំណោះស្រាយ ក្នុងការដាក់ទិសដៅសម្រាប់ការអនុវត្តការងារប្រយុទ្ធប្រឆាំងអំពើជួញដូរមនុស្សគ្រប់ទម្រង់ ព្រមទាំងអំពើហិង្សាក្នុងគ្រួសារ និងរំលោភសេពសន្ធវៈ ។

ឯកឧត្តមបន្តថា កិច្ចប្រជុំនេះ មានសារសំខាន់ណាស់ សម្រាប់លោកប្រធាន-អនុប្រធាននាយកដ្ឋាន លោកនាយ នាយរងការិយាល័យ និងមន្រ្តីទាំងអស់ នៅក្នុងនាយកដ្ឋាន គឺដើម្បីពិនិត្យនូវលទ្ធផលការងារដែលយើងបានអនុវត្តនាពេលកន្លងទៅ និងយើងត្រូវរកបញ្ហាប្រឈមមកដោះស្រាយ ព្រមទាំងសម្រាប់អនុវត្តទិសដៅបន្ត ក្នុងគោលបំណងឲ្យអស់លោក-លោកស្រី មានការយល់ដឹង និងអនុវត្តប្រកបដោយការទទួលខុសត្រូវ និងមានប្រសិទ្ធភាពនៅពេលខាងមុខ។

ឯកឧត្តមអគ្គស្នងការរងបន្តទៀតថា ប្រធាននាយកដ្ឋាន ត្រូវពង្រឹងការងាររដ្ឋបាលគ្រប់គ្រងបញ្ជីវត្តមានកងកម្លាំងនៅក្នុងនាយកដ្ឋាន និងពង្រឹងការងារជំនាញ ដើម្បីឆ្លើយតបទៅនឹងភាពកង្វល់របស់ប្រជាពលរដ្ឋ ក៏ដូចជាធ្វើការអន្តរាគមន៍ជួយដល់ជនរងគ្រោះដែលបានដាក់ពាក្យបណ្តឹង ដើម្បីឆ្លើយតបទៅនឹងការទទួលខុសត្រូវរបស់យើងចំពោះបណ្តឹងនីមួយៗ ហើយត្រូវតែយល់ដឹងពីការស្រាវជ្រាវប្រមូលភស្តុតាង ដើម្បីធ្វើការបង្រ្កាបទៅលើជនដែលប្រព្រឹត្តិបទល្មើសហើយផ្តន្ទាទោសទៅតាមនីតិវិធីច្បាប់។

ឯកឧត្តម គូសបញ្ជាក់ថា នាយកដ្ឋានប្រឆាំងការជួញដូរមនុស្ស និងការពារអនីតិជន ក្នុងនាមនគរបាលជំនាញ ត្រូវរៀបចំកិច្ចប្រជុំប្រចាំខែឲ្យបានទៀងទាត់ ដើម្បីឆ្លើយតបទៅនឹងលទ្ធផលកិច្ចប្រជុំប្រចាំខែ និងលើកទិសដៅបន្តបន្ទាប់ទៀត ដើម្បីក្តាប់ឲ្យបានការងារដែលយើងត្រូវធ្វើបន្ត ហើយយើងក៏ដឹងពីលទ្ធផលនៃខែនីមួយៗដែលយើងសម្រេចបាន គឺដើម្បីឆ្លើយតបទៅនឹងផែនការសកម្មភាពរបស់យើង ដោយផ្អែកលើផែនការយុទ្ធសាស្រ្តរបស់អគ្គស្នងការដ្ឋាននគរបាលជាតិ ។

ឆ្លៀតក្នុងឱកាសនេះ ឯកឧត្តម ក៏បាននាំយកនូវការផ្តាំផ្ញើសាកសួរសុខទុក្ខពីសំណាក់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ដល់កងកម្លាំងទាំងអស់ នៃនាយកដ្ឋានប្រឆាំងការជួញដូរមនុស្ស និងការពារអនីតិជន និងសូមរក្សាសាមគ្គីភាពផ្ទៃក្នុងក្នុងអង្គភាព ក៏ដូចជារក្សាការពារសុខភាពរបស់ខ្លួនឲ្យបានល្អផងដែរ៕