វគ្គបណ្តុះបណ្តាលស្តីពី នីតិវិធីស៊ើបអង្កេតករណីជួញដូរមនុស្សគ្រប់ទម្រង់ និងការកំណត់អត្តសញ្ញាណជនរងគ្រោះ ក្រោមអធិបតីភាពឯកឧត្តម ឧត្តមសេនីយ៍ឯក ជីវ ផល្លី
============
រាជធានីភ្នំពេញ៖នៅព្រឹកថ្ងៃអង្គារ ៣រោច ខែអាសាធ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៣ ខែកក្កដា ឆ្នាំ២០២៤
នាយកដ្ឋានប្រឆាំងការជួញដូរមនុស្ស និងការពារអនីតិជន ឧបត្ថម្ភដោយ អង្គការម៉ារីស៊ី (MARICI) បានបើកវគ្គបណ្តុះបណ្តាលស្តីពី នីតិវិធីស៊ើបអង្កេតករណីជួញដូរមនុស្សគ្រប់ទម្រង់ និងការកំណត់អត្តសញ្ញាណជនរងគ្រោះ ក្រោមអធិបតីភាពឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ។

ពិធីនេះមានការអញ្ជើញចូលរួមពីលោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្សនិងការពារអនីតិជន លោក ឌី នឿត នាយកប្រចាំប្រទេសអង្គការម៉ារីស៊ី លោក-លោកស្រីអនុប្រធាននាយកដ្ឋាន និងលោកនាយការិយាល័យទាំង០៧។

ជាកិច្ចចាប់ផ្តើម លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្សនិងការពារអនីតិជន មានប្រសាសន៍ថា ដោយមានកិច្ចសហការនិងគាំទ្រពី លោក ឌី នឿត នាយកប្រចាំប្រទេស អង្គការម៉ារីស៊ី (MARICI) នាយកដ្ឋានប្រឆាំងការជួញដូរមនុស្សនិងការពារអនីតិជន បានរៀបចំវគ្គបណ្តុះបណ្តាល ស្តីពីនីតិវិធីស៊ើបអង្កេតករណីជួញដូរមនុស្សគ្រប់ទម្រង់ និងការកំណត់អត្តសញ្ញាណជនរងគ្រោះ ដល់ថ្នាក់ដឹកនាំនាយកដ្ឋានប្រឆាំងការជួញដូរមនុស្សនិងការពារអនីតិជន ​នៅពេលនេះ ។

លោក ឌី នឿត នាយកប្រចាំប្រទេស អង្គការម៉ារីស៊ី (MARICI) មានសេចក្តីសោមនស្សរីករាយ ដែលបានចូលរួមជាគ្រូបង្គោលក្នុងវគ្គបណ្តុះបណ្តាលនាពេលនេះ ។ លោកបន្តថា
គោលបំណងនៃការបណ្តុះបណ្តាលនាពេលនេះ គឺចង់ឲ្យមន្រ្តីអនុវត្តច្បាប់មានចំណេះជំនាញ ព្រមទាំងបច្ចេកទេស ។

ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ ក្នុងនាម ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ក្រសួងមហាផ្ទៃ សូមថ្លែងអំណរគុណយ៉ាងជ្រាលជ្រៅដល់ លោក ឌី នឿត នាយកប្រចាំប្រទេស អង្គការម៉ារីស៊ី (MARICI) ដែលបានផ្តល់នូវកិច្ចសហការក្នុងការបើកវគ្គបណ្តុះបណ្តាល ។ ឯកឧត្តមអគ្គស្នងការរងបន្តថា គោលបំណង នៃការបើកវគ្គបណ្តុះបណ្តាលនេះ គឺដើម្បីពង្រឹងសមត្ថភាព បង្កើនចំណេះដឹងនិងជំនាញ និងដើម្បីចូលរួមប្រយុទ្ធប្រឆាំងអំពើជួញដូរមនុស្សគ្រប់ទម្រង់ ដល់ថ្នាក់ដឹកនាំនាយកដ្ឋានប្រឆាំងការជួញដូរមនុស្សនិងការពារអនីតិជន ​។

ឯកឧត្តមអគ្គស្នងការរងបន្តថា វគ្គបណ្តុះបណ្តាលនេះទៀតសោធន៍ មាន២មេរៀន ទី១-គឺនីតិវិធីស៊ើបអង្កេតករណីជួញដូរមនុ្សគ្រប់ទម្រង់ និងទី២-គឺការយល់ដឹងពីតំហែទាំការប៉ះទង្គិចផ្លូវចិត្ត ។ ឯកឧត្តម ឧត្តមសេនីយ៍ឯក បន្តថា ការយល់ដឹងពីតំហែទាំការប៉ះទង្គិចផ្លូវចិត្ត គឺសំខាន់ខ្លាំងណាស់សម្រាប់មន្រ្តីអនុវត្តច្បាប់ ព្រោះមន្រ្តីអនុវត្តច្បាប់ ងាយនឹងប៉ះទង្គិចផ្លូវចិត្តណាស់ ក្នុងការស៊ើបអង្កេតអំពើជួញដូរមនុស្សគ្រប់ទម្រង់ ។

ឯកឧត្តម ឧត្តមសេនីយ៍ឯក ជីវ ផល្លី ក៏បានថ្លែងអំណរគុណដល់ លោក ឌី នឿត នាយកប្រចាំប្រទេស អង្គការម៉ារីស៊ី (MARICI) ដែលបានចែករំលែកមេរៀនអំពីការប៉ះទង្គិចផ្លូវចិត្តនាពេលនេះ។

ឯកឧត្តមអគ្គស្នងការរង សង្ឃឹមថា សិក្ខាកាមទាំងអស់ អាចចូលរួមជាយោបល់ និងមានសំណួរឲ្យបានច្រើនដើម្បីជាការយល់ដឹងកាន់តែច្បាស់ទាំងអស់គ្នាសម្រាប់ការកំណត់អត្តសញ្ញាណជនរងគ្រោះ។

សូមជម្រាបថា វគ្គបណ្តុះបណ្តាល ស្តីពី នីតិវិធីស៊ើបអង្កេតករណីជួញដូរមនុស្សគ្រប់ទម្រង់ និងការកំណត់អត្តសញ្ញាណជនរងគ្រោះនេះ មានរយៈពេល២ថ្ងៃ គឺថ្ងៃទី២៣ដល់ថ្ងៃទី២៤ ខែកក្កដា ឆ្នាំ២០២៤ ដែលសិក្ខាកាមជា ថ្នាក់ដឹកនាំ នៃនាយកដ្ឋានប្រឆាំងការជួញដូរមនុស្សនិងការពារអនីតិជន៕