កាកបាទក្រហមកម្ពុជា ដែលមាន សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន នៅថ្ងៃទី១៣ ខែសីហា ឆ្នាំ២០២៤នេះ បានអញ្ចើញចុះសួរសុខទុក្ខ និងផ្តល់អំណោយមនុស្សធម៌ជាលើកទី៥ ជូនដល់សមាគមស្នាមញញឹមថ្មីនៃក្តីសង្ឃឹមរបស់កុមារ ដែលមានកុមារកំព្រា ១២០នាក់ និងបុគ្គលិក ១៦នាក់ ស្ថិតនៅភូមិក្រសាំង ឃុំជើងកើប ស្រុកកណ្តាលស្ទឹង ខេត្តកណ្តាល។

មុនពិធីជួបសំណេះសំណាលខាងលើនេះ ក្មួយៗកុមារទាំងអស់ បានទទួលចំណេះដឹងបន្ថែម ជាពិសេសមានភាពក្លាហានក្នុងការឡើងឆ្លើយសំណួរពាក់ព័ន្ធទៅនឹងកាកបាទក្រហមកម្ពុជា ពាក់ព័ន្ធទៅនឹងការថែទាំសុខភាពបឋម ការរក្សាអនាម័យ បរិស្ថាន ការទប់ស្កាត់ជំងឺឆ្លង និងជំងឺមិនឆ្លងផ្សេងៗជាដើម។

ក្នុងឱកាសនោះ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើការគិតគូរ សួរសុខទុក្ខ ក្តីអាណិត ស្រឡាញ់ចំពោះកុមារទាំងអស់ និងថ្លែងនូវការកោតសរសើរចំពោះសមាគមដែលប្រឹងប្រែងអភិវឌ្ឍខ្លួនឱ្យរីកចម្រើនជាលំដាប់ ជាពិសេសប្រធានសមាគមទាំងពីរនាក់ប្តី-ប្រពន្ធ ដែលមានប្រវត្តិជាក្មេងកំព្រា បានលះបង់កម្លាំងកាយចិត្តប្រកបដោយក្តីស្រឡាញ់ចំពោះកុមារទាំងអស់ ផ្តល់ការថែទាំ ផ្តល់អាហារ ការស្នាក់នៅ និងបញ្ជូនកុមារទៅសាលារៀនយ៉ាងទៀងទាត់ បង្ហាត់បង្រៀនកុមារឱ្យមានវិន័យ មានទម្លាប់រស់នៅល្អ និងមានសុជីវធម៌ ព្រមទាំងស្វះស្វែងចូលរួមក្នុងកិច្ចការសង្គមផ្សេងៗ។

ទន្ទឹមនឹងនេះ បន្ថែមពីលើការអប់រំផ្សព្វផ្សាយពីបញ្ហាសុខភាពដែលក្រុមការងារបានធ្វើការផ្សព្វផ្សាយ, លោកជំទាវអគ្គលេខាធិការរងទី១ ក៏បានពាំនាំនូវការផ្តាំផ្ញើពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដល់ក្មួយៗចៅៗកុមារទាំងអស់ ត្រូវចេះថែទាំសុខភាពឱ្យបានល្អ ទម្លាប់ហូបស្អាត និងផឹកទឹកដាំឆ្អិន ហើយត្រូវចេះស្រឡាញ់ សាមគ្គីគ្នា ជួយគ្នាទៅវិញ-ទៅមក គោរពវិន័យ ចេះស្តាប់បង្គាប់ កសាងខ្លួនប្រកបដោយគុណធម៌ និងសីលធម៌ និងត្រូវជៀសឱ្យឆ្ងាយពីការសេពគប់មិត្តមិនល្អ ឬការប្រើប្រាស់គ្រឿងញៀន ជាពិសេសត្រូវខិតខំសិក្សារៀនសូត្រឱ្យពូកែដើម្បីអនាគតរុងរឿង ហើយក្លាយជាពលរដ្ឋល្អ និងជាធនធានមនុស្សរបស់សង្គមជាតិ។

ទន្ទឹមនឹងនេះ កុមារនិងបុគ្គលិកទាំងអស់ បានសម្តែងនូវការដឹងគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងផ្តល់ក្តីអាណិតស្រឡាញ់យ៉ាងកក់ក្តៅ លើកទឹកចិត្ត និងផ្តល់ក្តីសង្ឃឹមដល់កុមារកំព្រាជាបន្តបន្ទាប់។ កុមារទាំងអស់បានថ្លែងព្រមៗគ្នាដោយក្តីរំភើបថា «ខ្ញុំស្រឡាញ់លោកយាយ ប៊ុន រ៉ានី ហ៊ុនសែន, ខ្ញុំស្រឡាញ់សន្តិភាព, ខ្ញុំស្រឡាញ់កាកបាទក្រហមកម្ពុជា»។

អំណោយដែលបានផ្តល់ជូនសមាគម រួមមាន ៖ អង្ករ ១៥០០គីឡូក្រាម, អង្ករសុខភាព ១០កេស, មី ៣០កេស, ត្រីខ ៤០០កំប៉ុង, ទឹកត្រី ៥យួរ, ទឹកស៊ីអ៊ីវ ៥យួរ, ទឹកក្រូច ១០កេស, ទឹកសុទ្ធ ១០កេស,ឃីត (មុង ភួយ សារុង ក្រមា) ៤០កញ្ចប់ និងថវិកា ១០លានរៀល រួមជាមួយអាហារថ្ងៃត្រង់ ១៨តុ រួមមាន សម្លនំបញ្ចុកខ្មែរ ការីនំប៉័ង និងបង្អែម។ សូមបញ្ជាក់ថា នេះគឺជាចុះសួរសុខទុក្ខ និងចែកអំណោយជាលើកទី៥ ចាប់តាំងពីឆ្នាំ២០១៧ ពីសំណាក់កាកបាទក្រហមកម្ពុជា ទីស្នាក់ការកណ្តាល។ ដោយឡែក សាខាកាកបាទក្រហមកម្ពុជា ខេត្តកណ្តាល ក៏បានចុះសួរសុខទុក្ខ និងចែកអំណោយដល់សមាគម សរុបចំនួន ១១លើក ផងដែរ ចាប់តាំងពីឆ្នាំ២០១៩រៀងមក៕