HomePage

ថ្ងៃទី២៦ ខែកក្កដា ឆ្នាំ២០២៦

ទំនាក់ទំនងផ្សព្វផ្សាយពាណិជ្ជកម្ម តាមរយៈលេខទូរស័ព្ទ 017 22 00 32

ព័ត៌មានជាតិ ព័ត៌មានអន្តរជាតិ ព័ត៌មានសន្តិសុខសង្គម ព័ត៌មានសុខភាពនិងសម្រស់ ព័ត៌មានសិល្បៈ និងកីឡា

ព័ត៌មានថ្មីបំផុត

ឯកឧត្តម កើត ឆែ អភិបាលរងរាជធានីភ្នំពេញ បានអញ្ចើញចូលរួមជាអធិបតីក្នុងវគ្គតម្រង់ទិសស្តីពីការបណ្តុះផ្នត់គំនិត និងឥរិយាបថវិជ្ជមានរបស់បុគ្គលិក ក្នុងការបំពេញការងារ និងការត្រៀមខ្លួនដើម្បីក្លាយជាអ្នកដឹកនាំ
================
នាព្រឹកថ្ងៃព្រហស្បតិ៍ ទី២២ ខែសីហា ឆ្នាំ២០២៤ ឯកឧត្តម កើត ឆែ អភិបាលរងរាជធានីភ្នំពេញតំណាងដ៏ខ្ពង់ខ្ពស់ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ បានអញ្ចើញចូលរួមជាអធិបតីក្នុង «វគ្គតម្រង់ទិសស្តីពីការបណ្តុះផ្នត់គំនិត និងឥរិយាបថវិជ្ជមានរបស់បុគ្គលិក ក្នុងការបំពេញការងារ និងការត្រៀមខ្លួនដើម្បីក្លាយជាអ្នកដឹកនាំ» រៀបចំដោយទីចាត់ការគ្រប់គ្រងធនធានមនុស្ស នៅសាលប្រជុំ នៃសាលារាជធានីភ្នំពេញ។

ជាមួយគ្នានេះ ឯកឧត្តម កើត ឆែ អភិបាលរងរាជធានីភ្នំពេញ បានស្វាគមន៍ និងថ្លែងអំណរគុណជាថ្មីម្តងទៀត ចំពោះវត្តមានរបស់លោកគ្រូធម្មទានាចារ្យ ចាន់ សេរី ដែលជាអ្នកឯកទេសគ្រប់គ្រងធនធានមនុស្ស និងមានបទពិសោធន៍ការងារ ដោយធ្លាប់បានកាន់តំណែងក្នុងរចនាសម្ព័ន្ធគ្រប់គ្រងនៅគ្រឹះស្ថានហិរញ្ញវត្ថុឯកជនដ៏ធំមួយនៅកម្ពុជា ដែលបានចំណាយពេលវេលាចូលរួម ជាគ្រូឧទ្ទេសក្នុងវគ្គតម្រង់ទិសនាថ្ងៃនេះ និងចំពោះការចែករំលែកនូវពុទ្ធិពាក់ព័ន្ធនឹងប្រធានបទមួយចំនួនដ៏មានសារៈសំខាន់ កាលពីថ្ងៃទី២៤ ខែកក្កដា ឆ្នាំ២០២៤ កន្លងទៅថ្មីៗ និងប្រធានបទនាថ្ងៃនេះ គឺ «ការបណ្តុះផ្នត់គំនិត និងឥរិយាបថវិជ្ជមាននៅកន្លែងបំពេញការងារ»ផងដែរ។

ឆ្លៀតក្នុងឱកាសនេះ ឯកឧត្តម កើត ឆែ ក៏បានគូសបញ្ជាក់ជូនអង្គពិធីទាំងមូលថាថ្ងៃនេះគឺជាគម្រប់ ១ឆ្នាំ (២២ សីហា ២០២៣- ២២ សីហា ២០២៤) ដែលសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំរាជរដ្ឋាភិបាលកម្ពុជា នីតិកាលទី៧ នៃរដ្ឋសភា ប្រកបដោយសមត្ថភាព បញ្ញាញាណ និងថាមពល និងបានដាក់ចេញនូវកម្មវិធីនយោបាយ និងយុទ្ធសាស្ត្រ បញ្ចកោណ ដំណាក់កាលទី១ ហើយក្នុងនោះក៏បានផ្តោតសំខាន់លើសារៈសំខាន់នៃការលើកកម្ពស់សមត្ថភាពធនធានមនុស្ស និងការពង្រឹងប្រសិទ្ធភាពអនុវត្តការងារប្រចាំថ្ងៃរបស់មន្ត្រីរាជការដើម្បីប្រែក្លាយរដ្ឋបាលសាធារណៈ ទៅជារដ្ឋបាលមួយដែលទំនើប ឆ្លើយតបបានទៅនឹងតម្រូវការសេដ្ឋកិច្ច-សង្គម និងការផ្តល់សេវាសាធារណៈជូនបងប្អូនប្រជាពលរដ្ឋឱ្យបានកាន់តែល្អប្រសើរ។