លោក ស៊ីម គង់ អភិបាលស្រុកជើងព្រៃ បានដឹកនាំក្រុមការងារ នាំយកអំណោយ ប្រគល់ជូនគ្រួសារ ដែលមានជីវភាពខ្វះខាត និងជួបការលំបាក នៅភូមិស្គន់ ឃុំសូទិប ស្រុកជើងព្រៃ
=============
នៅព្រឹកថ្ងៃទី២៣ ខែតុលា ឆ្នាំ២០២៥ លោក ស៊ីម គង់ អភិបាលនៃគណៈអភិបាលស្រុក និងលោក ឆាយ វ៉ាន់ស៊ី ប្រធានក្រុមប្រឹក្សាស្រុកជើងព្រៃ បានដឹកនាំក្រុមការងារ និងលោកមេឃុំសូទិប នាំយកអំណោយរបស់ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម ប្រគល់ជូនគ្រួសារដែលមានជីវភាពខ្វះខាត និងជួបការលំបាកចំនួន១គ្រួសារ នៅភូមិស្គន់ ឃុំសូទិប ស្រុកជើងព្រៃ ខេត្តកំពង់ចាម។

ក្នុងឱកាសនោះលោកអភិបាលស្រុកក៏បានពាំនាំការផ្តាំផ្ញើរសួរសុខទុក្ខពីសំណាក់ឯកឧត្តអភិបាលខេត្ត,ឯកឧត្តបណ្ឌិត ម៉ា ឈឿន និងថ្នាក់ដឹកនាំគ្រប់ជាន់ថ្នាក់មកកាន់ក្រុមគ្រួសារដែលមានប្ដីឈ្មោះ សូត្រ ព្រួញ និងប្រពន្ធឈ្មោះ លី ស្រីធំ ដែលប្តីជួបគ្រោះថ្នាក់ចរាចរណ៍ និងមានកូន ចំនួន ៧នាក់ ស្រី ០៣ នាក់ នៅក្នុងបន្ទុក។

លោកអភិបាលស្រុកបានបញ្ជាក់បន្ថែមថា៖ទុក្ខលំបាករបស់ប្រជាពលរដ្ឋ គឺជាក្តីកង្វល់របស់ថ្នាក់ដឹកនាំ ហើយថ្នាក់ដឹកនាំក៏មិនទុកចោលប្រជាពលរដ្ឋឡើយ។ ជាស្តែងថ្ងៃនេះក្រោយពីទទួលបានដំណឹងភ្លាមលោកអភិបាលស្រុក បានដឹកនាំក្រុមការងារយកអំណោយប្រគល់ជូនដោយផ្ទាល់តែម្តង ទោះបីមានលក្ខណៈតិចតួចក្តីប៉ុន្តែបានជួយដោះស្រាយការលំបាក១រយៈពេល ជាពិសេសបង្ហាញឱ្យឃើញពីការគិតគូរ យកចិត្តទុកដាក់របស់ថ្នាក់ដឹកនាំគ្រប់ឋានានុក្រម ដោយការដឹកនាំប្រកបដោយគតិបណ្ឌិត និងពេញដោយថាមពលរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រី មិនបណ្តាយឱ្យប្រជាពលរដ្ឋណាម្នាក់ស្លាប់ដោយអត់បាយនោះឡើយ។

ដោយឃើញថាមានកូនតូច១អ្នកកំពុងមានជំងឺ ភ្លាមៗនោះលោកអភិបាលស្រុកបានហៅគ្រូពេទ្យនៅមណ្ឌលសុខភាពឱ្យទៅពិនិត្យមើល ប្រសិនធ្ងន់ត្រូវបញ្ជូនទៅមន្ទីរពេទ្យបង្អែកស្រុកជាបន្ទាន់។

ចំពោះអំណោយដ៏ថ្លៃថ្លារបស់ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងលោកជំទាវ ដែលត្រូវប្រគល់ជូនរួមមាន៖
-អង្ករ ៥០គីឡូក្រាមចំនួន១បាវ
-មីខ្លាឃុំ ២កេស ទឹកស៊ីអ៉ីវ ២យួរ ទឹកត្រី២យួរ ត្រីខ ២យួរ ទឹកសុទ្ធ២យួរ
-ថវិកាចំនួន ២០០.០០០រៀល
-រដ្ឋបាលឃុំសូទិបថវិកាចំនួន២២០.០០០រៀល

សូមបញ្ជាក់ជូនថា៖គ្រួសារមានប្ដីឈ្មោះ សូត្រ ព្រួញ
ប្រពន្ធឈ្មោះ លី ស្រីធំ មានកូន ចំនួន ៧នាក់ ស្រី ០៣ នាក់ នៅក្នុងបន្ទុក មានទីលំនៅភូមិស្គន់ ឃុំសូទិប ស្រុកជើងព្រៃ ខេត្តកំពង់ចាម មានជីវភាពលំបាកខ្លាំង ដោយប្តីរបស់គាត់ ជួបគ្រោះថ្នាក់ចរាចរណ៍ត្រូវការថវិកាសម្រាប់ព្យាបាលជំងឺ(រលាក្បាលចិញ្ចឹមក្នុងពោះ ត្រូវវះកាត់ដាក់នៅក្បាលវិញ) និងមានកូនតូចចំនួន៧នាក់ដែលកំពុងសិក្សា។