ឯកឧត្តម អ៊ុន ចាន់ដា អញ្ចើញនាំអំណោយមនុស្សធម៌របស់សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ផ្តល់ជូនពលរដ្ឋរងគ្រោះដោយទឹកជំនន់រហ័ស និង បាក់ស្រុតច្រាំងទន្លេ សរុប ៥៤ គ្រួសារ ក្នុងស្រុកកំពង់សៀម និងស្រុកស្រីសន្ធរ
=================
សាខា កក្រក ខេត្តកំពង់ចាម ៖នៅព្រឹក ថ្ងៃទី ៩ ខែតុលា ឆ្នាំ២០២៥ នេះ ឯកឧត្តម អ៊ុន ចាន់ដា ប្រធានគណ:កម្មាធិការសាខា រួមជាមួយ ឯកឧត្តម លោកជំទាវ លោក លោកស្រី សមាជិក សមាជិកា គណ:កម្មាធិការសាខា និងមន្ត្រីអនុសាខាស្រុក បានអញ្ជើញចុះសួរសុខទុក្ខ និងនាំយកអំណោយមនុស្សធម៌ របស់ សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ផ្ដល់ជូនបងប្អូនប្រជាពលរដ្ឋរងគ្រោះដោយមហន្តរាយធម្មជាតិ សរុប ៥៤គ្រួសារ ក្នុងនេះ ពលរដ្ឋរងគ្រោះដោយទឹកជំនន់រហ័ស រស់នៅឃុំកោះសំរោង និង ឃុំកោះទន្ទឹម ស្រុកកំពង់សៀម ដែលជម្លៀសមករកទីតាំងសុវត្ថិភាពតាមវត្ត និងផ្ទះបងប្អូន ក្នុងឃុំរអាង ចំនួន ៣៥ គ្រួសារ និងពលរដ្ឋរងគ្រោះដោយការបាក់ស្រុតច្រាំងទន្លេត្រូវរុះរើលំនៅដ្ឋាន ១៩គ្រួសារ ក្នុងនេះ មកពី២ឃុំ ក្នុងស្រុកកំពង់សៀម ចំនួន ១៥គ្រួសារ និង ១ឃុំ ក្នុងស្រុកស្រីសន្ធរ ចំនួន ៤គ្រួសារ ។ ពិធីនេះ បានប្រារព្ធរៀបចំនៅក្នុងបរិវេណ វត្តបល្ល័ង្កពេជ្រ ស្ថិតក្នុងភូមិ ឃុំរអាង ស្រុកកំពង់សៀម ។

ឯកឧត្តម អ៊ុន ចាន់ដា ប្រធានគណ:កម្មាធិការសាខា បានសម្តែងការសោកស្តាយជាមួយបងប្អូនប្រជាពលរដ្ឋរងគ្រោះទាំងអស់ ចំពោះមហន្តរាយធម្មជាតិដែលធ្វើអោយប៉ះពាល់លំនៅដ្ឋាន និងជីវភាពរស់នៅប្រចាំថ្ងៃរបស់បងប្អូន ។ ក្នុងឱកាសនោះ ឯកឧត្តម អ៊ុន ចាន់ដា បាននាំយកនូវប្រសាសន៍ផ្ដាំផ្ញើសួរសុខទុក្ខ ពីឯកឧត្តមសន្តិបណ្ឌិត នេត សាវឿន ប្រធានកិត្តិយសសាខា និង ពិសេសពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា ជូនចំពោះបងប្អូនប្រជាពលរដ្ឋរងគ្រោះទាំងអស់ ដោយក្ដីនឹករលឹកនិង អាណិតអាសូរជាទីបំផុត ។ ទាំងនេះ បង្ហាញអោយឃើញ ពីក្តីកង្វល់ របស់សម្តេចប្រធាន ដែលតែងតែ បានយកចិត្តទុកដាក់គិតគូរពីសុខទុក្ខ និងជីវភាព របស់ ប្រជាជនរងគ្រោះនិងងាយរងគ្រោះបំផុត ហើយតែងបានចាត់តំណាងចុះអន្តរាគមន៍ ផ្តល់អំណោយសង្រ្គោះជាបន្តបន្ទាប់ ដើម្បីជួយដោះស្រាយសម្រាលទុក្ខលំបាកបងប្អូនទាន់ពេលវេលា ដោយមិនរើសអើង និងមិនទុកនរណាម្នាក់ចោល ឡើយ ។

គួររំលឹកថា គិតត្រឹមថ្ងៃទី០៩ -៩- ២០២៥ នេះ ទឹកជំនន់រហ័សទន្លេមេគង្គ មានកម្រិតកំពស់ ១៤,១២ម ធៀបនឹងថ្ងៃម្សិលម៉ិញ ស្រក ០,១៨ ម ដែលកន្លងទៅធ្វើអោយប៉ះពាល់ស្រុកចំនួន ៨ ក្នុងខេត្ត ( លើកលែងក្រុងកំពង់ចាម និងស្រុកចំការលើ ) ។ តាមតួលេខបណ្តោះអាសន្ន មហន្តរាយធម្មជាតិនេះ បានបង្កអោយ កុមារលង់ទឹកស្លាប់ ២នាក់- ខូចខាតដំណាំស្រូវ ៣៦៤ ហ,ត- ដំណាំរួមផ្សំ ៣៤៧ ហ,ត - បាក់ស្រុតច្រាំង ប្រវែង ៥,៩៧៥ ម៉ែត្រ - ផ្ទះត្រូវរុះរើ ១៩ខ្នង និង ខូចផ្លូវ ២០០ម ( ផ្លូវកៅស៊ូ ៤០ម- ផ្លូវបេតុង ១០ម និងផ្លូវដី ១៥០ម ) ។
ឯកឧត្តម អ៊ុន ចាន់ដា បានក្រើនរំលឹក ដល់បងប្ហូនទាំងអស់គ្នា ខិតខំថែទាំសុខភាពអោយបានល្អ តាមទិសស្លោក " ស្រឡាញ់ខ្លួន អោយស្ងួនចំណី " ហើយត្រូវប្រុងប្រយ័ត្នពីគ្រោះមហន្តរាយ វិបត្តិភ័យនានា ដែលកើតមានក្នុងរដូវវស្សានេះ ដោយស ឯកឧត្តមប្រធាន បានស្នើអោយរដ្ឋបាលមូលដ្ឋាន ត្រូវតាមដានជាប់ជាប្រចាំនូវប្រព័ន្ធផ្តល់ព័ត៌មានជាមុន១២៩៤ ដើម្បីត្រៀមលក្ខណ: ជួយអន្តរាគមន៍ទាន់ពេលវេលា ។ ទន្ទឹមនោះ រស់នៅត្រូវអនុវត្តវិធានអនាម័យស្អាត ៣យ៉ាង ពិសាទឹកដាំឆ្អិន ដើម្បីបង្ការ ទប់ស្កាត់ ការពារការឆ្លងនៃជម្ងឺដំកាត់ផ្សេងៗ ដែលបង្កដោយសត្វមូស ឬ បង្កដោយកង្វះអនាម័យ ជាដើម ជាពិសេស ត្រូវប្រយ័ត្នប្រយែងអោយបានដិតដល់ ចំពោះកុមារតូចៗ ដែលងាយប្រឈមនឹងគ្រោះថ្នាក់លង់ទឹក ។
អំណោយមនុស្សធម៌ដែលបានផ្ដល់ជូនទាំង៣៥គ្រួសារ ក្នុង ១គ្រួសារ ទទួលបាន ៖ អង្ករ ២៥គក្រ ទឹកត្រី១យួរ ទឹកស៊ីអ៊ីវ ១យួរ កន្ទេល១ សាប៊ូម្សៅ ២កញ្ចប់ សាប៊ូកក់សក់ ៦កញ្ចប់តូច ថ្នាំនិងច្រាស់ដុសធ្មេញ ឃីត ( មុង ភួយ សារុង ក្រមា ) និង ថវិកាមួយចំនួន ៕
ដោយឡែក ប្រជាពលរដ្ឋរងផលប៉ះពាល់ដោយបាក់ស្រុតច្រាំងទន្លេ ១៩គ្រួសារ ក្នុង ១គ្រួសារ ទទួលបាន អង្ករ ៥០គក្រ មី ត្រីខ គ្រឿងឧបភោគ បរិភោគ ៥មុខ សម្ភារដំណេក តង់ និង ថវិកា ៤០០,០០០រៀល ដើម្បីស្តារការ ខូចខាតឡើងវិញ ។
ក្នុងឱកាសនោះ ឯកឧត្តម អ៊ុន ចាន់ដា និង ក្រុមការងារ បានអញ្ជើញ ប្រគេន ព្រះចៅអធិការ វត្តបល្ល័ង្កពេជ្រ នូវ អង្ករ ១០០គក្រ មី ត្រីខ ទឹកពិសាប្រណិត ២កេស និងបច្ច័យមួយចំនួន ផងដែរ ។