លោកជំទាវ ម៉ាណ ណាវី សមាជិកាក្រុមសមាជិកព្រឹទ្ធសភាប្រចាំភូមិភាគទី១ អញ្ជើញនាំយកអំណោយមនុស្សធម៌ ជូនជនភៀសសឹកចំនួន១០០០គ្រួសារ និងអាហារក្រៀមជូនដល់កងទ័ពជួរមុខ
=======
នៅព្រឹកថ្ងៃទី១៦ ខែធ្នូ ឆ្នាំ២០២៥ លោកជំទាវ ម៉ាណ ណាវី សមាជិកាក្រុមសមាជិកព្រឹទ្ធសភាប្រចាំភូមិភាគទី១ បានអញ្ជើញ​នាំយកអំណោយសប្បុរសជន ដែលបានបរិច្ចាគ ជូនដល់បងប្អូនជនភៀសសឹក ចំនួន១០០០គ្រួសារ និងបានផ្តល់អាហារក្រៀមសម្រាប់វីរកងទ័ពជួរមុខចំនួន៥៩០កញ្ចប់ ព្រមទាំងបានផ្តល់ថវិកាចំនួន ៣០០ដុល្លារជូនដល់អធិការស្រុក ។

នៅក្នុងឱកាសជួបសំណេះសំណាល និងសាកសួរសុខទុក្ខបងប្អូនជនភៀសសឹក លោកជំទាវ ម៉ាណ ណាវី បាននាំមកនូវការផ្ដាំផ្ញើការសួរសុខទុក្ខពីសំណាក់សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងបានជម្រាបអំពីការយកចិត្តទុកដាក់ជាប់ជានិច្ចរបស់សម្ដេចចំពោះបងប្អូនប្រជាពលរដ្ឋ ដែលកំពុងរងគ្រោះដោយសារអំពើឈ្លានពានយ៉ាងព្រៃផ្សៃរបស់ប្រទេសថៃមកលើប្រទេសកម្ពុជា។ លើសពីនេះទៅទៀត លោកជំទាវ ក៏បាននាំមកនូវការផ្តាំផ្ញើសាកសួរសុខទុក្ខពីសំណាក់ ឯកឧត្តមទេសរដ្ឋមន្រ្តី អូស្មាន ហាស្សាន់ ជូនដល់បងប្អូនជាទីនឹករលឹកបំផុតផងដែរ។

នៅក្នុងឱកាសនោះដែរ លោកជំទាវបានចូលរួមសោកស្តាយ និងរំលែកទុក្ខចំពោះបងប្អូនជនភៀសសឹកទាំងអស់ ដែលបានរត់គេច និងចាកចេញពីផ្ទះសម្បែងដោយសារការឈ្លានពានបូរណភាពទឹកដីពីសំណាក់ប្រទេសថៃមកលើកម្ពុជា ហើយបានលើកទឹកចិត្តបងប្អូនទាំងអស់ ដែលកំពុងស្នាក់នៅក្នុងជំរុំ មិនថាសាសនាណានោះទេ ត្រូវចេះសាមគ្គី និងយកអាសារគ្នាទៅវិញទៅមក។

លោកជំទាវបានបន្តទៀតថា សូមបងប្អូនជឿជាក់លើរាជរដ្ឋាភិបាល និងវីរកងទព័ដ៏អង់អាចក្លាហាន ចុះក្នុងការប្រយុទ្ធការពារបូរណភាពទឹកដី ជាមួយសត្រូវឈ្លានពាន។ លោកជំទាវ ក៏បានណែនាំដល់បងប្អូនជនភៀសសឹកទាំអស់ ចូលរួមថែរក្សាសុខភាព និងថែរក្សាអនាម័យអោយបានល្អក្នុការស់នៅជាប្រចាំ។

ក្នុងពិធីនោះ ប្រជាពលរដ្ឋជាច្រើនបានសម្តែងនូវអារម្មណ៍ប្រកបដោយភាពជឿជាក់លើប្រមុខរាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន ជាប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងថ្នាក់ដឹកនាំកំពូលៗ ជាពិសេសវីរកងទ័ព វីរនគរបាលជាតិ ដែលកំពុងតស៊ូប្រយុទ្ធយ៉ាងស្វិតស្វាញជាមួយសត្រូវឈ្លានពាន។ ជាពិសេសពួកគាត់មានមោទនភាព ដែលបានឃើញនូវកម្លាំងដ៏រឹងមាំនៃមហាសាមគ្គីជាតិខ្មែរ ក្នុងកាលៈទេសៈដែលប្រទេសជាតិកំពុងជួបប្រទះនឹងការលំបាក ដោយសារការឈ្លានពានពីប្រទេសជិតខាង។

ជាចុងក្រោយ លោកជំទាវក៏បានថ្លែងអំណរគុណដល់បងប្អូនសប្បុរជននានា ដែលបានបរិច្ចាគនូវថវិកាសម្ភារៈនានា ដើម្បីជួយគ្នា ក៏ដូចជារំលែកបន្ទុករាជរដ្ឋាភិបាលក្នុងគ្រាដ៏លំបាកនេះ៕