កិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការ ក្នុងការរក្សាសន្តិសុខសណ្តាប់ធ្នាប់សាធារណៈ និងសុវត្ថិភាពសង្គមប្រចាំឆ្នាំ២០២៥ និងទិសដៅការងារឆ្នាំ២០២៦ របស់ស្នងការដ្ឋាននគរបាលខេត្តកណ្តាល រយៈពេល១ថ្ងៃត្រូវបានបិទបញ្ចប់
============
ខេត្តកណ្តាល៖ កិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការ ក្នុងការរក្សាសន្តិសុខសណ្តាប់ធ្នាប់សាធារណៈ និងសុវត្ថិភាពសង្គមប្រចាំឆ្នាំ២០២៥ និងទិសដៅការងារឆ្នាំ២០២៦ របស់ស្នងការដ្ឋាននគរបាលខេត្តកណ្តាល រយៈពេល១ថ្ងៃត្រូវបានបិទបញ្ចប់ប្រកបដោយលទ្ធផលល្អប្រសើរ នៅរសៀលថ្ងៃទី១៩ ខែធ្នូ ឆ្នាំ២០២៥ ដែលពិធីបិទបញ្ចប់នេះប្រព្រឹត្តទៅក្រោមអធិបតីភាព ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ និងឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល។

ថ្លែងក្នុងពិធីនេះ ឯកឧត្តម គួច ចំរើន បានកោតសរសើរដល់កងកម្លាំងនគរបាលគ្រប់លំដាប់ថ្នាក់ក្នុងខេត្តកណ្ដាល ដែលបានខិតខំបំពេញការងារប្រកបដោយការទទួលខុសត្រូវខ្ពស់ ជាពិសេសនោះគឺអ្វីដែលជាទីមោទនភាពនោះគឺកម្លាំងរបស់យើងបានខិតខំធ្វើឲ្យគ្រោះថ្នាក់ចរាចរណ៍ក្នុងខេត្តកណ្ដាលមានការថយចុះ បើប្រៀបនឹងឆ្នាំមុន ឯកឧត្តមអភិបាលខេត្តក៏បានលើកទឹកចិត្តដល់កម្លាំងទាំងអស់ ត្រូវខិតខំបន្តទៀតដើម្បីធ្វើឲ្យបញ្ហាគ្រោះថ្នាក់ចរាចរណ៍ក្នុងខេត្តកណ្ដាល កាន់តែមានការថយចុះឡើងជាលំដាប់តទៅទៀត។

ជាមួយគ្នានេះ ឯកឧត្តមអភិបាលខេត្ត ក៏បានធ្វើការជំរុញទៅដល់កងកម្លាំងនគរបាលគ្រប់លំដាប់ថ្នាក់ ត្រូវតែខិតខំបំពេញភារកិច្ចរបស់ខ្លួនឲ្យបានសកម្មក្នុងការបម្រើប្រជាពលរដ្ឋ ជាពិសេសត្រូវខិតខំពង្រឹងកិច្ចការពារថែរក្សាសន្តិសុខសម្រាប់ធ្នាប់សាធារណៈឲ្យបានល្អប្រសើរ ជូនដល់ប្រជាពលរដ្ឋក៏ដូចជាថ្នាក់ដឹកនាំផងដែរ។ ឯកឧត្តមអភិបាលខេត្ត បានធ្វើការនាំការណែនាំទៅដល់ស្នងការដ្ឋាននគរបាលខេត្ត បង្កើនចលនាប្រជាការពារ ហើយត្រូវខិតខំពង្រឹងសមត្ថភាពបណ្តុះបណ្តាល និងពង្រឹងសមត្ថភាពពួកគាត់បន្ថែមទៀត ដើម្បីធ្វើឲ្យពួកគាត់ពួកយល់ដឹងអំពីការងារអ្វីដែលពួកគាត់អាចធ្វើបាន និងអ្វីដែលមិនគួរធ្វើ សំដៅយកកម្លាំងរបស់ពួកគាត់មកជួយដល់ការងាររបស់កម្លាំងនគរបាលយើង ឲ្យកាន់តែទទួលបានផលិតផលល្អប្រសើរឡើងថែមទៀត។

ថ្លែងក្នុងពិធីនេះដែរ ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ ក៏បានសម្តែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់កងកម្លាំងនគរបាលទូទាំងខេត្តកណ្តាល ដែលបានលះបង់កម្លាំងកាយចិត្តក្នុងការបំពេញភារកិច្ចរបស់ខ្លួន ព្រមទាំងបានលើកទឹកចិត្តឲ្យកងកម្លាំងគ្រប់លំដាប់ថ្នាក់ទាំងអស់ត្រូវបន្តខិតខំប្រឹងប្រែងបន្ថែមទៀត ដើម្បីចូលរួមថែរក្សាសន្តិសុខសណ្ដាប់ធ្នាប់សាធារណៈជូនប្រជាពលរដ្ឋក្នុងខេត្ត។ ឯកឧត្តម ឧត្តមសេនីយ៍ឯក បានសង្កត់ធ្ងន់ថា សន្តិសុខគឺជាកត្តាដ៏សំខាន់មិនអាចខ្វះបានសម្រាប់ប្រជាពលរដ្ឋក្នុងខេត្ត ដូច្នេះសូមឲ្យកងកម្លាំងទាំងអស់ត្រូវបន្តពង្រឹងការអនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព» ឲ្យមានប្រសិទ្ធភាពខ្ពស់ លុបបំបាត់ឲ្យបាននូវល្បែងស៊ីសងខុសច្បាប់ និងក្មេងទំនើង ដើម្បីធានាបាននូវភាពសុខសាន្តជូនប្រជាពលរដ្ឋនៅគ្រប់មូលដ្ឋាន។ បន្ថែមពីលើនេះ ឯកឧត្តម អគ្គស្នងការរង បានជំរុញ និងលើកទឹកចិត្តដល់កម្លាំងមានសមត្ថកិច្ចគ្រប់ថ្នាក់ត្រូវបង្កើនការយកចិត្តទុកដាក់លើការគ្រប់គ្រងមុខសញ្ញា ការបង្ការបទល្មើសនានា និងការប្រើប្រាស់បច្ចេកវិទ្យាក្នុងកិច្ចប្រតិបត្តិការ ដើម្បីឆ្លើយតបទៅនឹងសភាពការណ៍ជាក់ស្តែង និងត្រៀមខ្លួនអនុវត្តរាល់បទបញ្ជារបស់រាជរដ្ឋាភិបាល និងក្រសួងមហាផ្ទៃ ឲ្យទទួលបានជោគជ័យថ្មីៗបន្ថែមទៀតនៅឆ្នាំ២០២៦ ខាងមុខនេះ។

តាមរយៈរបាយការណ៍របស់ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាក់ថា គ្រោះថ្នាក់ចរាចរណ៍ មានការថយចុះ១១០លើក=៤៩% ។ បទល្មើសព្រហ្មទណ្ឌ ថយ១ករណី (៣៤២/៣៤៣ករណី) ធៀបនឹងឆ្នាំ២០២៤ ប៉ុន្តែករណីបទល្មើសទាំងអស់នេះត្រូវបានកម្លាំងសមត្ថកិច្ចយើងបង្ក្រាបបានរហូតដល់៩៥% ពោលគឺ៣២៥/៣៤២ករណី។ បទល្មើសឧក្រិដ្ឋបង្ក្រាបបាន ៧២ករណី=៩២% ឃាត់ខ្លួន១២៦នាក់ និងបទមជ្ឈិមបង្ក្រាបបាន ២៥៣ករណី =៩៥% ឃាត់ខ្លួន៣៧៥នាក់។