ឯកឧត្តម វ៉ី សំណាង អភិបាលខេត្តតាកែវ អញ្ជើញជួបសំដែងការគួរសម សាកសួរសុខទុក្ខ និងជូនពរថ្នាក់ដឹកនាំខេត្តអានយ៉ាង នៃសាធារណរដ្ឋសង្គមនិយមវៀតណាម ក្នុងឱកាសបុណ្យចូលឆ្នាំថ្មីប្រពៃណីជាតិវៀតណាម
============
នៅរសៀលថ្ងៃអង្គារ ៨រោច ខែបុស្ស ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២១ ខែមករា ឆ្នាំ២០២៥ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានដឹកនាំគណៈប្រត្តិភូខេត្ត អញ្ជើញចូលជួបសម្ដែងការគួរសម្យ និងជូនពរពិធីបុណ្យចូលឆ្នាំថ្មីប្រពៃណីវៀតណាម។ ពិធីនេះទទួលស្វាគមន៍ និងរាក់ទាក់ដ៏កក់ក្តៅពីសំណាក់ ឯកឧត្តម ហូ វុំាងមឹង ប្រធានគណៈកម្មា ធិការប្រជាជនខេត្តអានយ៉ាង នៃសាធារណៈរដ្ឋសង្គម និយមវៀតណាម និងសហការី ។

ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ ក្នុងឱកាសអញ្ជើញជូនពរពិធីបុណ្យចូលឆ្នាំថ្មីវៀតណាមនាឱកាសនោះផងដែរ លោកសូមបួងសួងដល់វត្ថុស័ក្តិ សិទ្ធទាំងអស់ក្នុងលោក ជួយប្រសិទ្ធពរជ័យជូនដល់ ឯកឧត្តមប្រធានគណៈ កម្មាធិការប្រជាជនខេត្តអានយ៉ាង ឯកឧត្តម ហូ វុំាងមឹង និងសហការី រួមនិងបងប្អូនប្រជាពលរដ្ឋវៀតណាមទាំងអស់ សូមមាននូវសុខភាពល្អទទួលជ័យជម្នៈគ្រប់ភារកិច្ចការងារ និងប្រកបដោយ ពុទ្ធពរទាំង ៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀង ឃ្លាតឡើយ ។

ឆ្លៀតក្នុងឱកាសជួបសំណេះសំណាល សួរសុខទុកនិងជូនពរឆ្នាំថ្មីជាមួយគ្នាខាងលើនេះ ឯកឧត្តមអភិបាលខេត្តតាកែវ ក៏បានសម្តែងនូវការអបអរសាទរ ជូនចំពោះឯកឧត្តម ហូ វុំាងមឹង ប្រធានគណៈកម្មាធិការប្រជាជនខេត្ត អានយ៉ាង នៃសាធា រណរដ្ឋសង្គមនិយមវៀតណាម ដែលត្រូវបានក្រុមប្រឹក្សានៃសាធារណៈសង្គមនិយមវៀតណាម បានបោះឆ្នោតផ្តល់សេចក្តីទុកចិត្ត និងជ្រើសតាំងជាប្រធានគណៈកម្មាធិការប្រជាជនខេត្តអានយ៉ាងនាពេលនេះផងដែរ ។

ឯកឧត្តម វ៉ី សំណាង អភិបាល នៃគណៈអភិបាល ខេត្តតាកែវ បានមានប្រសាសន៍បន្ថែមថា ក្នុងនាមអាជ្ញាធរខេត្ត លោកនឹងបន្តខិតខំប្រឹងប្រែងរឹតចំណងសាមគ្គីភាព មិត្តភាព និងបង្កើនកិច្ចសហប្រតិបត្តិការរវាងខេត្តតាកែវ និងខេត្តអានយ៉ាង ប្រទេសវៀតណាម ឲ្យកាន់តែល្អរឹងមាំថែមទៀត ដោយឈរលើទស្សនៈឯកភាពគ្នា ពិសេសបន្តធ្វើកិច្ចខិតខំប្រឹងប្រែងធ្វើយ៉ាងណាឲ្យព្រំដែននៃខេត្ត និងប្រទេសទាំងពីរ ក្លាយជាព្រំដែនសន្តិភាព ការអិវឌ្ឍន៍ និងទប់ស្កាត់ឲ្យខានតែបាន នូវរាល់បទល្មើសផ្សេងៗ នៅតាមបន្ទាត់ព្រំដែននៃខេត្តទាំង២ ។

ឯកឧត្តម វ៉ី សំណាង អភិបាលខេត្តតាកែវ បន្ថែមទៀតថា ក្នុងនាមអាជ្ញាធរខេត្ត និងបង្កើនកិច្ចសហប្រតិបត្តិការណ៍នេះឲ្យបានកាន់តែល្អបន្ថែមទៀត ដើម្បីបានជាប្រយោជន៍ដល់ខេត្តទាំងពីរ ពិសេសប្រជាពលរដ្ឋនៅតាមបន្ទាត់ព្រំដែន នៃប្រទេសទាំង២ ឲ្យមានជីវភាពធូរធាររីកចម្រើន ជឿនលឿន សាកសមជាអ្នកជិតខាងដ៏ល្អ នៃខេត្តជាប់ព្រំដែន ។

ឯកឧត្តម ហូ វុំាងមឹង ប្រធានគណៈកម្មាធិការប្រជាជនខេត្តអានយ៉ាង នៃសាធារណរដ្ឋសង្គម និយមវៀតណាម ក៏បានថ្លែងអំណរអរគុណ ចំពោះគណៈប្រតិភូខេត្តតាកែវ ដឹកនាំដោយឯកឧត្តម វ៉ី សំណាង និងថ្នាក់ដឹកនាំគ្រប់ជាន់ថ្នាក់ ដែលបានអញ្ជើញមកជួបសំណេះសំណាលសួរសុខទុក្ខ និងជូនពរឆ្នាំថ្មី ក្នុងឱកាសបុណ្យចូលឆ្នាំថ្មីវៀតណាមនាពេលនេះ និងមួយវិញទៀត ក្នុងនាមអាជ្ញាធរនិងជាប្រធានគណៈកម្មាធិការប្រជាជនខេត្តអានយ៉ាង លោកនិងបន្តខិតខំប្រឹងប្រែងរឹត ចំណងសាមគ្គីភាព មិត្តភាព បង្កើនកិច្ចសហប្រតិបត្តិការរវាងខេត្តតាកែវ និងខេត្តអានយ៉ាង ឲ្យកាន់តែល្អរឹងមាំឡើងបន្ថែម ទៀត ដើម្បីផ្តល់ជាប្រយោជន៍ជូនដល់ប្រជាជននិងខេត្ត នៃប្រទេសទាំង២ ឲ្យកាន់តែរីកចម្រើនទៅមុខទៀត៕