ពិធីបិទកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការរក្សាសន្តិសុខ សណ្តាប់ធ្នាប់សាធារណៈ សុវត្ថិភាពសង្គម ប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់ស្នងការដ្ឋាននគរបាលរាជធានីភ្នំពេញ

នារសៀលថៃ្ងទី២៣ ខែធ្នូ ឆ្នាំ២០២៥ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានអញ្ជើញជាអធិបតីភាពដ៏ខ្ពង់ខ្ពស់ពិធីបិទកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការរក្សាសន្តិសុខសណ្តាប់ធ្នាប់សាធារណៈ សុវត្ថិភាពសង្គម ប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់ស្នងការដ្ឋាននគរបាលរាជធានីភ្នំពេញ ។

បន្ទាប់ពីពិធីនេះបានបើកកិច្ចប្រជុំប្រព្រឹត្តទៅរយៈពេលមួយព្រឹកនៅថ្ងៃដដែល ក្រោមអធិបតី ភាព ឯកឧត្តម ឧត្តមសេនីយ៍ ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ។
ជាកិច្ចចាប់ផ្តើមក្នុងកិច្ចប្រជុំ ឯកឧត្តម ឧត្តមសេនីយ៍ ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានអញ្ជើញឡើងមានមតិស្វាគមន៍គណៈអធិបតីនិងប្រតិភូអមដំណើរ និងរាយការណ៍នូវរបា យ ការណ៍សង្ខេប ស្តីពីលទ្ធផលកិច្ចប្រតិបត្តិការការងារដែលសម្រេច បានក្នុងឆ្នាំ២០២៥ និងលើកឡើងពីចំណុចខ្លាំង ចំណុចខ្សោយ បញ្ហាប្រឈម ក៏ដូចជាសំណូមពរ របស់ស្នងការដ្ឋាននគរបាលរាជធានីភ្នំពេញ ជូនគណៈអធិបដើម្បីជ្រាបជារបាយការណ៍ផងដែរ។

ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ ក៏បានឡើងមានប្រសាសន៍ និងវាយតម្លៃខ្ពស់ពីការខិតខំបំពេញភារកិច្ចការពារសន្តិសុខ រក្សាសណ្តាប់ធ្នាប់សុវត្ថិភាពសង្គម របស់កងកម្លាំងនគរបាលរាជធានីភ្នំពេញ ធានាបានសុខសុវត្ថិភាពល្អ ជាពិសេសបានចូលរួមសហការការងារយ៉ាងល្អជាមួយអាជ្ញាធរនិងសមត្ថកិច្ចពាក់ព័ន្ធគ្រប់ជាន់ថ្នាក់ ក្នុងការដោះស្រាយធានាការការពារសន្តិសុខ កាន់តែរឹងមាំ ផ្តល់ភាពកក់ក្តៅជូនប្រជាពលរដ្ឋនិងភ្ញៀវបរទេសនិងណែនាំបន្តបំពេញភារកិច្ចបម្រើប្រជាពលរដ្ឋឲ្យកាន់តែប្រសើរ។ជាងនេះថែមទៀតក្រៅពីបំពេញការងារស្នូលការពារសន្តិសុខ ក៏បានចូលរួមគាំទ្រវីរកងទ័ពនិងនគរបាលជាតិនៅសមរភូមិមុខកំពុងប្រយុទ្ធការពារបូរណភាពទឹកដីនៃព្រះរាជាណាចក្រកម្ពុជា តាមរយៈជួយឧបត្ថម្ភសម្ភារ ស្បៀងអាហារជាដើម។

ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានផ្តល់មតិដឹកនាំលើការងារជំនាញសំខាន់ៗដល់កងកម្លាំង ដើម្បីយកទៅអនុវត្តការងារបន្ត ឲ្យកាន់តែមានប្រសិទ្ធភាពព្រមទាំងកោតសរសើរដល់ការដឹកនាំរបស់ឯកឧត្តម ឧត្តមសេនីយ៍ ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដែលមានឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានដឹកនាំកម្លាំងសហការគ្នាធានាសន្តិសុខ សុវត្ថិភាព ឲ្យដំណើរការជាប្រក្រតីលើគ្រប់វិស័យ ។ទាំងអស់នេះស្តែងចេញពីការខិតខំលើការងារដឹកនាំការពារសន្តិសុខកាន់តែរឹងមាំ។

ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិក៏បានណែនាំកម្លាំងបន្តបំពេញភារកិច្ច យកចិត្តទុកដាក់លើការចុះផ្សព្វផ្សាយអប់រំអនុវត្តគោលនយោបាយ ភូមិ-សង្កាត់-មានសុវត្ថិភាព នៅតាមបណ្តាសហគមន៍ ខិតខំស្រាវជ្រាវបង្រ្កាបបទល្មើសឆបោកតាមអនឡាញ បទល្មើស លួច ឆក់ ប្លន់ យកចិត្តទុកដាក់ដោះស្រាយបណ្តឹងរបស់ប្រជាពលរដ្ឋលើបទល្មើសបច្ចេកវិទ្យា តាមរយៈក្រុមការងារទទួលបណ្តឹងតាមហតឡាញ បន្តបង្រ្កាបក្មេងទំនើង ទប់ស្កាត់អប់រំរាល់ការប្រមូលផ្តុំនៅពេលយប់អធ្រាត្របើសិនរកឃើញថាក្មេងទំនើងទាំងនោះជាប់ពាក់ព័ន្ធការប្រព្រឹត្តបទល្មើស ត្រូវអនុវត្តតាមវិធានការច្បាប់ តាមដានគ្រប់គ្រងប្រមូលព័ត៌មានដើម្បីទប់ស្កាត់ក្រុមយុវជន Gen Z ដែលធ្វើចលនាបដិវត្តពណ៌ ប៉ះពាល់អសន្តិសុខ សន្តិភាព និងណែនាំឲ្យកងកម្លាំងនគរបាលត្រូវអនុវត្តគោរពវិន័យនគរបាលជាតិ ឲ្យបានខ្ជាប់ខ្ជួន ពង្រឹងការអនុវត្តច្បាប់ ពង្រឹងការអនុវត្តវិន័យចំពោះមន្រ្តីនគរបាលណាមួយមានកាយវិការ អត្តចរិត មិនសមចំពោះប្រជាពលរដ្ឋ ពង្រឹងបណ្តុះបណ្តាលមន្រ្តីជំនាញអនុវត្តច្បាប់ឲ្យកាន់តែមានសមត្ថភាពខ្ពស់ ជាពិសេសជំនាញបង្ការទប់ស្កាត់និងបង្រ្កាបបទល្មើសបច្ចេកវិទ្យាដែលជាបទល្មើសមិនប្រពៃណី។

បន្ទាប់មក ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ក៏បានឧបត្ថម្ភថវិកាមួយចំនួនដល់ស្នងការដ្ឋាននគរបាលរាជធានីភ្នំពេញ និងអង្គភាពពាក់ព័ន្ធមួយចំនួនទៀតផងដែរ៕