លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនិតិជន អញ្ចើញចូលរួមក្នុងពិធីបិទវគ្គបណ្តុះបណ្តាលស្តីពីយុទ្ធវិធីប្រតិបត្តិការរបស់នាយកដ្ឋានប្រឆាំងការជួញដូរមនុស្ស និងការការពារអនិតិជន
================
(ភ្នំពេញ)៖នារសៀលថ្ងៃសុក្រ ១៥កើត ខែមិគសិរ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៥ ខែធ្នូ ឆ្នាំ២០២៥ លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនិតិជន បានអញ្ចើញចូលរួមក្នុងពិធីបិទវគ្គបណ្តុះបណ្តាលស្តីពី “យុទ្ធវិធីប្រតិបត្តិការរបស់នាយកដ្ឋានប្រឆាំងការជួញដូរមនុស្ស និងការការពារអនិតិជន” ដែលបានបើកការបណ្តុះបណ្តាលកាលពីថ្ងៃទី១ ខែធ្នូ និងបានបញ្ចប់នៅថ្ងៃនេះ ដោយទទួលបានលទ្ធផលល្អប្រសើរ ក្រោមអធិតីភាពឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ។ពិធីបិទវគ្គនេះ បានប្រព្រឹត្តទៅនៅសាលប្រជុំនាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការដ្ឋាននគរបាលជាតិ។

ដោយមានការចូលរួមពីលោក Eric Meldrum នាយកកម្មវិធីសង្គ្រោះនៃអង្គការមេត្រីអន្តរជាតិ(AIM SWAT) ប្រធាន អនុប្រធាននាយកដ្ឋាន នាយការិយាល័យ និងគ្រូបង្ហាត់ក្បាច់គុន ដែលជាដៃគូសំខាន់ក្នុងការលើកកម្ពស់សមត្ថភាពកងកម្លាំងនគរបាលនគរបាលប្រឆាំងអំពើជួញដូរមនុស្ស និងការការពារអនិតិជន។

ក្នុងឱកាសចូលរួមជាអធិបតីភាពក្នុងពិធីបិទវគ្គនេះ ឯកឧត្តម ឧត្តមសេនីយ៍ឯក ជីវ ផល្លី បានលើកឡើងពីសារៈសំខាន់នៃការបណ្តុះបណ្តាលលើយុទ្ធវិធីប្រតិបត្តិការ (Police Tactical Operations) ដែលជាឧបករណ៍ដ៏ចាំបាច់សម្រាប់កងកម្លាំងប្រតិបត្តិការ យកទៅប្រើប្រាស់ការពារខ្លួនទប់ទល់ជាមួយជនល្មើសដែលប្រើប្រាស់អាវុធ ឬប្រើហិង្សាមកលើកងកម្លាំងយើង។

ក្បាច់គុណដែលសិក្ខាកាមបានមកពីការបណ្តុះបណ្តាលនេះ ត្រូវយកទៅការពារខ្លួន និងជាប្រយោជន៍សម្រាប់ចូលរួមអនុវត្តច្បាប់ ប្រតិបត្តិការបង្ក្រាប អន្តរាគមន៍ជួយជនរងគ្រោះនៃអំពើជួញដូរមនុស្ស។ ឯកឧត្តម បានផ្តាំផ្ញើដល់សិក្ខាកាមទាំងអស់ យកចំណេះដឹងជំនាញ និងបទពិសោធន៍ដែលទទួលបានពីការរៀនសូត្រនេះទៅអនុវត្តប្រកបដោយក្រមសីលធម៌វិជ្ជាជីវ: និងការទទួលខុសត្រូវ។

សូមរំលឹកថា វគ្គបណ្តុះបណ្តាលនេះ ត្រូវបានបើកជាផ្លូវការកាលពីថ្ងៃទី១ ខែធ្នូ ឆ្នាំ២០២៥ ហើយបានបញ្ចប់ដោយជោគជ័យនៅថ្ងៃទី៥ ខែធ្នូ ឆ្នាំ២០២៥ ស្របតាមផែនការ គោលនយោបាយ និងយុទ្ធសាស្ត្ររបស់អគ្គស្នងការដ្ឋាននគរបាលជាតិ និងក្រសួងមហាផ្ទៃ។

ជាចុងក្រោយ ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ បានពាំនាំប្រសាសន៍ផ្តាំផ្ញើសួរសុខទុក្ខ ដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ សួរសុខទុក្ខដោយក្តីនឹករលឹកដល់សិក្ខាកាម និងកងកម្លាំងនគរបាលប្រឆាំងការជួញដូរមនុស្សនិងការពារអនីតិជនទាំងអស់ ដែលបានខិតខំប្រឹងប្រែងចូលរួមបង្ការទប់ស្កាត់ និងបង្ក្រាបបទល្មើសជួញដូរមនុស្សបានល្អប្រសើរកន្លងមក និងបានថ្លែងអំណរគុណដល់អង្គការមេត្រីអន្តរជាតិ(AIM SWAT) ដែលបានជួយឧបត្ថម្ភគាំទ្របើកវគ្គបណ្តុះបណ្តាលនេះ ហើយបានសំណូម អង្គការនេះ សហការជាមួយអគ្គស្នងការដ្ឋាននគរបាលជាតិបើកវគ្គបណ្តុះបណ្តាលបន្តទៀត៕