ឯកឧត្ដម រដ្ឋមន្ដ្រី ជា សុមេធី បានអញ្ជើញជាអធិបតីភាពក្នុងកម្មវិធីបើកសន្និបាតបូកសរុបលទ្ធផលការងារឆ្នាំ២០២៤ និងទិសដៅអនុវត្ដបន្ដឆ្នាំ២០២៥ របស់ក្រសួងសង្គមកិច្ច អតីតយុទ្ធជន និងយុវនីតិសម្បទា

ទីស្ដីការក្រសួងសង្គមកិច្ច៖ នៅព្រឹកថ្ងៃអង្គារ ទី២៥ ខែមីនា ឆ្នាំ២០២៥ ក្រសួងសង្គមកិច្ច អតីតយុទ្ធជន និងយុវនីតិសម្បទា បានរៀបចំសន្និបាតបូកសរុបលទ្ធផលការងារឆ្នាំ២០២៤ និងទិសដៅអនុវត្ដបន្ដឆ្នាំ២០២៥ និងប្រកាសដាក់អនុវត្ដជាផ្លូវការ «ផែនការយុទ្ធសាស្ដ្រអភិវឌ្ឍន៍ វិស័យសង្គមកិច្ច អតីតយុទ្ធជន និងយុវនីតិសម្បទា ២០២៤-២០២៨» និង «ម៉េតាទិន្នន័យនៃសូចនាកររបស់ក្រសួងសង្គមកិច្ច អតីតយុទ្ធជន និងយុវនីតិសម្បទា» ក្រោមអធិបតីភាពដ៏ខ្ពង់ខ្ពស់ ឯកឧត្ដម ជា សុមេធី រដ្ឋមន្ដ្រីក្រសួងសង្គមកិច្ច អតីតយុទ្ធជន និងយុវនីតិសម្បទា។

សន្និបាតនេះបូកសរុបនេះ មានការអញ្ជើញចូលរួមពី ឯកឧត្ដម លោកជំទាវ ថ្នាក់ដឹកនាំ រដ្ឋលេខាធិការ អនុរដ្ឋលេខាធិការ អគ្គលេខាធិការ ប្រធាន អនុប្រធាននាយកដ្ឋាន ប្រធាន អនុប្រធានមន្ទីរទាំង២៥ រាជធានី ខេត្ដ ប្រធាន អនុប្រធានការិយាល័យ និងលោក លោកស្រី មន្ដ្រីរាជការសរុបចំនួន ២៤០រូប។

ក្នុងឱកាសនេះ ឯកឧត្ដមរដ្ឋមន្ដ្រី ជា សុមេធី ថ្លែងអំណរគុណយ៉ាងជ្រាលជ្រៅចំពោះ ឯកឧត្តម លោកជំទាវ លោក លោកស្រី ជាថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់របស់ក្រសួងដែលកន្លងមក ដែលបានខិតខំប្រឹងប្រែងបំពេញតួនាទីប្រកបដោយស្មារតីទទួលខុសត្រូវ ជាពិសេសសាមគ្គីភាពផ្ទៃក្នុងបានល្អ ព្រមទាំងមានការប្តេជ្ញា ចិត្តដ៏មោះមុត ដើម្បីសម្រេចបាននូវសមិទ្ធផលជាច្រើន ក្នុងនោះ ផ្តោតសំខាន់លើការផ្តល់សេវាសង្គមកិច្ចបានទាន់ ពេលវេលា និងស្របតាមសេចក្តីត្រូវការរបស់ប្រជាពលរដ្ឋ។

ទន្ទឹមនេះ ឯកឧត្ដម ជា សុមេធី បានថ្លែងអំណរគុណដល់ក្រសួង ស្ថាប័ន អង្គការដៃគូជាតិ អន្តរជាតិ អាជ្ញាធរមូលដ្ឋានគ្រប់លំដាប់ថ្នាក់ដែលតែងតែផ្តល់កិច្ចសហការ និងគាំទ្រដល់បេសកកម្មរបស់ក្រសួង ស្របតាមផែនការជាយុទ្ធសាស្ត្រដូចដែលបានកំណត់។

ឆ្លៀតក្នុងឱកាសនេះ ឯកឧត្ដមរដ្ឋមន្ដ្រី បានលើកសមិទ្ធផលធំៗដែលរាជរដ្ឋាភិបាលកម្ពុជាសម្រេចបាន លើគ្រប់វិស័យ ទាំងនយោបាយ សង្គមនិងសេដ្ឋកិច្ច បានកាត់បន្ថយភាពក្រីក្រ លើកកម្ពស់ជីវភាពរស់នៅ និងសេចក្តីថ្លៃថ្នូររបស់ប្រជាជន ក្នុងនោះកម្ពុជាបានសមាហរណកម្មដោយជោគជ័យទៅក្នុងតំបន់និងសកលលោក ដោយស្មើមុខស្មើមាត់។

សមិទ្ធផលទាំងនេះ បានទទួលនូវការសាទរពីគ្រប់មជ្ឈដ្ឋានទាំងកម្រិតជាតិនិងអន្តរជាតិ ពិសេសជាទឡ្ហីករណ៍នៃសមិទ្ធផលរបស់រាជរដ្ឋាភិបាល ក្រោមការដឹកនាំដ៏ស្វាហាប់ ឈ្លាសវៃ ត្រឹមត្រូវប្រកបដោយចក្ខុវិស័យវែងឆ្ងាយ និងច្បាស់លាស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលជាមគ្គុទ្ទេសក៍វ័យក្មេងដ៏ឆ្នើម និងពោរពេញ ដោយសមត្ថភាព ចំណេះដឹង និងថាមពល។

ទន្ទឹមនេះ កម្ពុជាកំពុងបោះជំហាន ដើម្បីប្រែក្លាយខ្លួនជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងឆ្ពោះទៅសម្រេចឱ្យបាននូវចក្ខុវិស័យកម្ពុជាឆ្នាំ២០៥០ ប្រែក្លាយខ្លួនជាប្រទេសមានចំណូលកម្រិតខ្ពស់។ មហាសន្និបាតនៃអង្គការសហប្រជាជាតិ កាលពីថ្ងៃទី១៩ ខែធ្នូ ឆ្នាំ២០២៤ បានចេញសេចក្តីសម្រេចឱ្យកម្ពុជាចាកចេញពីប្រទេសអភិវឌ្ឍន៍តិចតួចជាផ្លូវការ (LDC) នៅឆ្នាំ២០២៩ ខាងមុខនេះផងដែរ។

ឆ្លៀតយកឱកាសនេះផងដែរ ឯកឧត្ដមរដ្ឋមន្ដ្រី បានប្រកាសដាក់ឱ្យអនុវត្តនូវឯកសារ២គឺ ផែនការយុទ្ធសាស្ត្រអភិវឌ្ឍន៍វិស័យសង្គមកិច្ច អតីតយុទ្ធជន និងយុវនីតិសម្បទា ២០២៤-២០២៨ និងម៉េតាទិន្នន័យនៃសូចនាកររបស់ក្រសួង។

១- ផែនការយុទ្ធសាស្ត្រអភិវឌ្ឍន៍វិស័យសង្គមកិច្ច អតីតយុទ្ធជន និងយុវនីតិសម្បទា ២០២៤-២០២៨ គឺជាឯកសារដ៏មានសារសំខាន់ ដែលជាផែនទីបង្ហាញផ្លូវ តម្រង់ទិសអនុវត្តការងារដល់គ្រប់តួអង្គពាក់ព័ន្ធ សំដៅបង្កើនប្រសិទ្ធភាព និងស័ក្តិសិទ្ធិភាព។ ផែនការយុទ្ធសាស្ត្រនេះមាន ៧ជំពូក ដែលជំពូកនីមួយៗកំណត់នូវកម្មវត្ថុផ្សេងៗគ្នា ស្របតាមការណែនាំរបស់ក្រសួងផែនការ និងបានឆ្លើយតបទៅនឹងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា។

២-ម៉េតាទិន្នន័យនៃសូចនាកររបស់ក្រសួង ជាឯកសារដ៏មានសារសំខាន់មួយទៀត ដែលណែនាំដល់អ្នកផលិតស្ថិតិ មានភាពងាយស្រួលក្នុងការផលិតទិន្នន័យស្ថិតិ បង្កើតសូចនាករមួយប្រកបដោយគុណភាព និងមានលក្ខណៈគ្រប់ជ្រុងជ្រោយ។

ឯកឧត្ដមរដ្ឋមន្ដ្រី ជា សុមេធី ជឿជាក់ថា ឯកសារទាំងពីរនេះ នឹងក្លាយជាត្រីវិស័យសម្រាប់គ្រប់ប្រតិបត្តិករ និងតួអង្គពាក់ព័ន្ធ ដែលកំពុងបំពេញបេសកកម្មក្នុងវិស័យសង្គមកិច្ច សំដៅសម្រេចឱ្យបានគោលដៅ និងចក្ខុវិស័យវែងឆ្ងាយរបស់ក្រសួង។

បន្ទាប់ពីការប្រកាសដាក់ឱ្យអនុវត្តជាផ្លូវការនៅថ្ងៃនេះ ក្រុមការងារត្រូវបន្តផ្សព្វផ្សាយ ព្រមទាំងធ្វើការបណ្តុះបណ្តាលឱ្យបានទូលំទូលាយដល់មន្ត្រីថ្នាក់ជាតិ និងមន្ទីរសង្គមកិច្ច រាជធានី ខេត្ត បន្ថែមទៀតតាមកម្មវិធីគ្រោងទុក។

ជាទីបញ្ចប់ ឯកឧត្ដមរដ្ឋមន្ដ្រី បានជូនពរ ឯកឧត្តម លោកជំទាវ លោក លោកស្រី និងអង្គពិធីទាំងមូល សូមប្រកបដោយ សុខភាពល្អ វិបុលសុខ និងសម្រេចបាននូវជោគជ័យថ្មីៗបន្ថែមទៀត៕