ឯកឧត្តម រដ្នមន្ត្រី ជា សុមេធី អញ្ចើញចូលរួមពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រោមអធិបតីភាពឯកឧត្តមសន្តិបណ្ឌិត នេត សាវឿន ឧបនាយករដ្ឋមន្រ្តី
====================
(ភ្នំពេញ): នាព្រឹកថ្ងៃពុធ ១៣រោច ខែផល្គុន ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៦ ខែមីនា ឆ្នាំ២០២៥ ឯកឧត្តម ជា សុមេធី រដ្នមន្ត្រីក្រសួងសង្គមកិច្ច និងយុវនីតិសម្បទា បានអញ្ចើញចូលរួមក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រោមអធិបតីភាពឯកឧត្តមសន្តិបណ្ឌិត នេត សាវឿន ឧបនាយករដ្ឋមន្រ្តី តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។ពិធីនេះបានប្រព្រឹត្តទៅនៅទីស្តីការក្រសួងសង្គមកិច្ច អតីតយុទ្ធជន និងយុវនីតិសម្បទា។

ជាមួយគ្នានេះ ឯកឧត្ដម ជា សុមេធី រដ្ឋមន្រ្ដីក្រសួងសង្គមកិច្ច អតីតយុទ្ធជន និងយុវនីតិសម្បទា បានថ្លែងមតិស្វាគមន៍យ៉ាងកក់ក្តៅចំពោះវត្តមាន ឯកឧត្តមទេសរដ្ឋមន្ត្រី រដ្ឋមន្ត្រីប្រតិភូអមនាយករដ្ឋមន្ត្រី ឯកឧត្តម លោកជំទាវ តំណាងក្រសួង ស្ថាប័ន លោក លោកស្រី ដៃគូអភិវឌ្ឍន៍ អង្គការមិនមែនរដ្ឋាភិបាលជាតិ អន្តរជាតិ និងរាយការណ៍អំពីលទ្ធផលនៃអង្គសន្និបាតជូន ឯកឧត្តមសន្តិបណ្ឌិត និងអង្គសន្និបាតទាំងមូល។

ឧបនាយករដ្ឋមន្ត្រី នេត សាវឿន កោតសរសើរជូនចំពោះ ឯកឧត្តម ជា សុមេធី ព្រមទាំងថ្នាក់ដឹកនាំ មន្ត្រីរាជការគ្រប់លំដាប់ថ្នាក់ នៃក្រសួងសង្គមកិច្ច អតីតយុទ្ធជន និងយុវនីតិសម្បទា ដែលបានធ្វើជាសេនាធិការគ្រប់ជ្រុងជ្រោយ ជូនដល់រាជរដ្ឋាភិបាល អនុវត្តគោលនយោបាយ ដ៏មានសារៈសំខាន់ សម្រេចបានលទ្ធផលជាទីផ្លែផ្កា និងអត្ថប្រយោជន៍យ៉ាងច្រើនឥតគណនា សម្រាប់ពលរដ្ឋរងគ្រោះ ងាយរងគ្រោះ មានហានិភ័យនានា រួមទាំងអតីតយុទ្ធជនដែលបានលះបង់ជាច្រើនចំពោះសង្គមជាតិរបស់យើង។

ទិសដៅអាទិភាពការងារដែលក្រសួងបានដាក់ចេញសម្រាប់ឆ្នាំ២០២៥ ខាងមុខនេះ និងទទួលបានជោគជ័យត្រចះត្រចង់ដូចការគ្រោងទុក ហើយឯកឧត្តមក៏មានជំនឿយ៉ាងមុតមាំថា ឯកឧត្តម លោកជំទាវ លោក លោកស្រី ដែលជាដៃគូសហការនិងវិស័យពាក់ព័ន្ធទាំងអស់ នឹងបន្តកិច្ចសហការយ៉ាងល្អជិតស្និតជាមួយ ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រោមស្មារតីទទួលខុសត្រូវខ្ពស់បំផុត។

ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បញ្ជាក់ថា អង្គសន្និបាតត្រូវបានរៀបចំរយៈពេលមួយថ្ងៃកន្លះ ពីថ្ងៃទី២៥ ដល់ថ្ងៃទី២៦ ខែមីនា ឆ្នាំ២០២៥ ដោយមានការអញ្ជើញចូលរួមពីតំណាងក្រសួង ស្ថាប័ន និងភ្ញៀវកិត្តិយស ព្រមទាំងថ្នាក់ដឹកនាំ និងមន្ត្រីរាជការនៃក្រសួងសង្គមកិច្ច អតីតយុទ្ធជន និងយុវនីតិសម្បទា សរុបចំនួន ២៤៧នាក់៕