លោកឧត្តមសេនីយ៍ទោ សុក សំបូរ និងលោកឧត្តមសេនីយ៍ទោ ឈាង ប៊ុនហុង អញ្ជើញជាសហអធិបតីក្នុងកិច្ចប្រជុំផ្សព្វផ្សាយ ស្តីពីការគ្រងឯកសណ្ឋាន ការប្រើស្លាកសញ្ញា ការអនុវត្តបទវិន័យ និងសណ្តាប់ធ្នាប់របៀបរៀបរយ របស់មន្ត្រីនគរបាលជាតិ
==============
រាជធានីភំ្នពេញ ៖នាព្រឹកថ្ងៃអង្គារ ៤កើត ខែចេត្រ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១ ខែមេសា ឆ្នាំ២០២៥ លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន និងលោកឧត្តមសេនីយ៍ទោ ឈាង ប៊ុនហុង អនុប្រធានអង្គភាពតម្រួតបទបញ្ជា បានអញ្ជើញជាសហអធិបតីក្នុងកិច្ចប្រជុំផ្សព្វផ្សាយ ស្តីពីការគ្រងឯកសណ្ឋាន ការប្រើស្លាកសញ្ញា ការអនុវត្តបទវិន័យ និងសណ្តាប់ធ្នាប់របៀបរៀបរយ របស់មន្ត្រីនគរបាលជាតិ នៅនាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការដ្ឋាននគរបាលជាតិ។

ដោយមានការអញ្ជើញចូលរួមពីលោក-លោកស្រី ឧត្តមសេនីយ៍ វរសេនីយ៍ អនុប្រធាននាយកដ្ឋាន លោក-លោកស្រី វរសេនីយ៍ នាយ-នាយរងការិយាល័យ លោកនាយ-នាយរងផ្នែក និងមន្រ្តីសរុបចំនួន ១៦៦នាក់ (ស្រី២៥នាក់)។

ជាកិច្ចចាប់ផ្តើម លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន មានប្រសាសន៍ថា ថ្ងៃនេះលោកមានមោទនភាព និងសេចក្តីរីករាយជាខ្លាំង ដោយបានចំណារឯកភាពដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ឲ្យនាយកដ្ឋានប្រឆាំងការជួញដូរមនុស្ស និងការពារអនីតិជន សហការជាមួយអង្គភាពតម្រួតបទបញ្ជា រៀបចំកិច្ចប្រជុំផ្សព្វផ្សាយស្តីពីការគ្រងឯកសណ្ឋាន ការប្រើស្លាកសញ្ញា ការអនុវត្តបទវិន័យ និងសណ្តាប់ធ្នាប់រៀបរៀបរយរបស់មន្ត្រីនគរបាលជាតិ។

បន្ទាប់ពីលោកឧត្តមសេនីយ៍ទោ សុខ ងី អនុប្រធាននាយកដ្ឋានប្រឆាំងការ ជួញដូរមនុស្ស និងការពារអនីតិជន ឡើងរាយការណ៍សង្ខេបអំពីសមាសភាពរចនាសម្ព័ន្ធរបស់នាយកដ្ឋានរួចមក លោកឧត្តមសេនីយ៍ទោ ឈាង ប៊ុនហុង អនុប្រធានអង្គភាពតម្រួតបទបញ្ជា និងជាតំណាងលោកឧត្តមសេនីយ៍ទោ ឆឹង កុមារ ប្រធានអង្គភាពតម្រួតបទបញ្ជា ជាគ្រូបង្គោលបានអញ្ជើញធ្វើបទបង្ហាញ ស្តីពីការគ្រង ឯកសណ្ឋាន ការប្រើស្លាកសញ្ញា ការអនុវត្តបទវិន័យ និងសណ្តាប់ធ្នាប់រៀបរៀបរយរបស់មន្ត្រីនគរបាលជាតិ។

លោកឧត្តមសេនីយ៍ទោ ឈាង ប៊ុនហុង មានប្រសាសន៍ថា បទវិន័យនគរបាលជាតិកម្ពុជា សំដៅដល់ក្រមសីលធម៌វិជ្ជាជីវៈ និងវិន័យដែលជាសំណុំវិធាន ឬ បទប្បញ្ញត្តិដឹកនាំ ណែនាំ អប់រំ និងទូន្មានមន្ត្រីនគរបាលជាតិ ដើម្បីលើកកម្ពស់សីលធម៌ តម្លៃ សេចក្តីថ្លៃថ្នូរ ឧត្តមភាព កិត្យានុភាព ជំនឿទុកចិត្ត ព្រមទាំងណែនាំតម្រង់ទិសដល់មន្ត្រីនគរបាលជាតិ ឱ្យប្រព្រឹត្តអំពើល្អ ត្រឹមត្រូវ ក្នុងការបំពេញភារកិច្ចរក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គមជូនប្រទេសជាតិ និងប្រជាពលរដ្ឋ។
លោកឧត្តមសេនីយ៍ទោបន្តថា បទវិន័យនគរបាលជាតិកម្ពុជា គឺមាន៥សំខាន់ (សិទ្ធិនិងកាតព្វកិច្ច, ក្រមសីលធម៌វិជ្ជាជីវៈ, វិន័យ, ការលើកសរសើរនិងជូនរង្វាន់, ការដាក់ទណ្ឌកម្ម)។
លោកឧត្តមសេនីយ៍ទោអនុប្រធានអង្គភាព ក៏បានធ្វើបទបង្ហាញអំពីការស្លៀកពាក់ឯកសណ្ឋានរបស់មន្រ្តីនគរបាលជាតិ រួមទាំងស្លាកសញ្ញាតាមច្បាប់លិខិតបទដ្ឋានគតិយុត្តិពាក់ព័ន្ធ ក្នុងការបំពេញភារកិច្ចឲ្យបានត្រឹមត្រូវជាកងកម្លាំងនគរបាលជាតិកម្ពុជា។

លោកឧត្តមសេនីយ៍ទោ ឈាង ប៊ុនហុង បានសង្កត់ធ្ងន់ថា មន្ត្រីនគរបាលជាតិកម្ពុជា មានសិទ្ធិនិងសេរីភាពដូចប្រជាពលរដ្ឋដទៃទៀត ស្របតាមលក្ខខណ្ឌដែលមានចែងក្នុងច្បាប់ និងលិខិតបទដ្ឋានគតិយុត្តពាក់ព័ន្ធ។ មន្ត្រីនគរបាលជាតិកម្ពុជា ត្រូវមានភក្តីភាពចំពោះជាតិ សាសនា ព្រះមហាក្សត្រ និងអង់អាចក្លាហា ហ៊ានធ្វើពលិកម្មនៅគ្រប់កាលៈទេសៈទាំងអស់ ដើម្បីបុព្វហេតុជាតិ មាតុភូមិ និងប្រជាពលរដ្ឋ។ មន្ត្រីនគរបាលជាតិកម្ពុជា ត្រូវគោរពនិងអនុវត្តតាមបញ្ជាថ្នាក់ដឹកនាំ តាមឋានានុក្រម ក្នុងការបំពេញភារកិច្ចរបស់ខ្លួន។

ចុងក្រោយ លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន បានឡើងមានមតិបូកសរុប ប្រកបដោយអត្ថន័យ និងបានកោតសរសើរ ថ្លែងអំណរគុណយ៉ាងជ្រាលជ្រៅបំផុត ដល់លោកឧត្តមសេនីយ៍ទោ ឈាង ប៊ុនហុង អនុប្រធានអង្គភាពតម្រួតបទបញ្ជា ដែលបានចំណាយទាំងកម្លាំងកាយចិត្ត ពេលវេលាដ៏មានតម្លៃចុះផ្សព្វផ្សាយស្តីពី ការគ្រងឯកសណ្ឋាន ការប្រើស្លាកសញ្ញា ការអនុវត្ត បទវិន័យ និងសណ្តាប់ធ្នាប់របៀបរៀបរយរបស់មន្ត្រីនគរបាលជាតិនៅពេលនេះ៕