លោកឧត្តមសេនីយ៍ទោ សុក សំបូរ អញ្ចើញចូលរួមជាអធិបតីក្នុងពិធីបើកវគ្គបណ្តុះបណ្តាលស្តីពី យុទ្ធវិធីប្រតិបត្តិការ និងការបាញ់គ្រាប់ពិត ដល់មន្ត្រីនគរបាល ចំណុះនាយកដ្ឋាន ចំនួន ២០រូប ក្រោមអធិបតីភាព ឯកឧត្តម ឧត្តមសេនីយ៍ឯក ជីវ ផល្លី
===================
រាជធានីភ្នំពេញ៖នៅព្រឹកថ្ងៃចន្ទ ទី១៩ ខែឧសភា ឆ្នាំ២០២៥ លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន បានអញ្ចើញចូលរួមជាអធិបតីក្នុងពិធីបើកវគ្គបណ្តុះបណ្តាលស្តីពី យុទ្ធវិធីប្រតិបត្តិការ និងការបាញ់គ្រាប់ពិត ដល់មន្ត្រីនគរបាល ចំណុះនាយកដ្ឋាន ចំនួន ២០រូប ក្រោមអធិបតីភាព ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ តំណាងដ៏ខ្ពង់ខ្ពស់ឯកឧត្តម នាយឧត្តមសេនីយ័ ស ថេត អគ្គស្នងការនគរបាលជាតិ
។ វគ្គបណ្តុះបណ្តាលនេះ មានរយៈពលេ ៥ថ្ងៃ ពីថ្ងៃទី១៩-២៣ ខែឧសភា ឆ្នាំ២០២៥ និងទទួលបានការឧបត្ថម្ភ ពីអង្គការមេត្រីអន្តរជាតិ (AIM SWAT)។

ជាកិច្ចចាប់ផ្តើម លោក អេរិក មេលឌ្រីម នាយកកម្មវិធីនៃអង្គការមេត្រីអន្តរជាតិ (AIM) សូមថ្លែងអំណរគុណដល់ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ និងឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ ដែលបានអនុញ្ញាតឲ្យមានការរៀបចំវគ្គបណ្តុះបណ្តាលនេះឡើង សម្រាប់ជាឧត្តមប្រយោជន៍ដល់មន្រ្តីជំនាញប្រឆាំងការជួញដូរមនុស្ស ព្រមទាំងក្រុមការងារហ្វតផងដែរ។ លោកនាយកកម្មវិធីនៃអង្គការមេត្រីអន្តរជាតិ (AIM) សូមឲ្យសិក្ខាកាមទាំងអស់ បើមានចំងល់ត្រូវជជីកសួរដល់គ្រូឧទ្ទេស ព្រោះគ្រូឧទ្ទេស សុទ្ធតែជាគ្រូដែលមានជំនាញ យុទ្ធវិធីប្រតិបត្តិការនិងការបាញ់គ្រាប់ពិត។

លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន ឡើងមានមតិស្វាគមន៍ និងរាយការណ៍អំពីវឌ្ឍនៈភាពការងារកន្លងមក និងបានថ្លែងអំណរគុណដល់អង្គការមេត្រីអន្តរជាតិ (AIM) ដែលតែងតែផ្តល់កិច្ចសហការជាមួយនាយកដ្ឋានប្រឆាំងការជួញដូរមនុស្ស និងការពារអនីតិជន ក្នុងការបើកវគ្គបណ្តុះបណ្តាលស្តីពីយុទ្ធវិធីប្រតិបត្តិការដល់បណ្តារាជធានី-ខេត្ត បានយល់ដឹង និងមានបទពិសោធន៍អំពីវិធីសាស្រ្តសម្រាប់ប្រើប្រាស់ក្នុងការការពារខ្លួន។

ពីវេទិការអធិបតីនេះដែរ ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ តាងនាម ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ពិតជាមានសេចក្តីសោមនស្សរីករាយសម្រាប់ការចូលរួមជាអធិបតី ក្នុងពិធីបើកវគ្គបណ្តុះបណ្តាល ស្តីពី យុទ្ធវិធីប្រតិបត្តិការនិងការបាញ់គ្រាប់ពិត សម្រាប់ធ្វើការប្រយុទ្ធប្រឆាំងអំពើជួញដូរមនុស្សគ្រប់ទម្រង់។ តាមរយៈការបណ្តុះបណ្តាលនេះផងដែរ គឺបានបណ្តុះបណ្តាល៤វគ្គរួចមកហើយ ឯកឧត្តមសង្ឃឹមថា សិក្ខាកាមទាំងអស់ នឹងបានយល់ដឹងនិងមានបទពិសោធន៍អំពីវិធីសាស្រ្តសម្រាប់ប្រើប្រាស់ក្នុងការការពារខ្លួនផង ក្នុងការប្រយុទ្ធប្រឆាំងអំពើជួញដូរមនុស្សគ្រប់ទម្រង់ផង។

ឯកឧត្តម ឧត្តមសេនីយ៍ឯក អគ្គស្នងការរងនគរបាលជាតិ ក៏បានណែនាំឲ្យសិក្ខាកាមទាំងអស់ យកចិត្តទុកដាក់ ខិតខំហ្វឹកហាត់ក្បាច់គុនក៏ដូចជាការបាញ់គ្រាប់ពិត និងការប្រើប្រាស់អាវុធឲ្យបានត្រឹមត្រូវ និងបន្ថែមទៅលើការយល់ដឹងផ្នែកច្បាប់ប្រយុទ្ធប្រឆាំងអំពើជួញដូរមនុស្សផង។ ជាពិសេសសិក្ខាកាម ត្រូវគោរពវិន័យ រក្សាសេចក្តីថ្លៃថ្នូរ ក្រមសីលធម៌ វិជ្ជាជីវៈ ក្នុងនាមជាមន្រ្តីនគរបាលយុត្តិធម៌ ជាកងកម្លាំងប្រដាប់អាវុធ ហើយត្រូវយកចិត្តទុកដាក់ត្រងត្រាប់ស្តាប់គ្រូឧទ្ទេសបង្ហាត់បង្ហាញ ពិសេសត្រូវជជីកសួរនាំដល់គ្រូឧទ្ទេសនៅពេលមានចំងល់។
សូមជម្រាបថា ៖ វគ្គបណ្តុះបណ្តាល ស្តីពី យុទ្ធវិធីប្រតិបត្តិការនិងការបាញ់គ្រាប់ពិតនេះ មានរយៈពេល៥ថ្ងៃ គិតចាប់ពីថ្ងៃទី១៩ ដល់ថ្ងៃទី២៣ ខែឧសភា ឆ្នាំ២០២៥ ដោយមានការសិក្ខាកាមចូលរួមចំនួន២០រូប(ស្រី៤រូប)៕