អភិបាលខេត្តកណ្ដាល បានណែនាំដល់សិស្សនិស្សិត នៃវិទ្យាស្ថានជាតិពហុបច្ចេកទេស តេជោសែន ក្រុងតាខ្មៅ ដែលទទួលបានការអប់រំបណ្តុះបណ្តាលបច្ចេកទេស និងវិជ្ជាជីវៈ ត្រូវ«រៀនឱ្យចប់ ឱ្យចេះ ឱ្យមានការងារ» ដើម្បីឱ្យមានជំនាញមួយច្បាស់លាស់ ស្រួលរកការងារធ្វើ និងជាស្ពានអនាគតឆ្ពោះទៅកាន់ជីវភាពកាន់តែល្អប្រសើរ

ខេត្តកណ្តាល៖ ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល បានធ្វើការណែនាំដល់សិស្សនិស្សិត នៃវិទ្យាស្ថានជាតិពហុបច្ចេកទេស តេជោសែន ក្រុងតាខ្មៅ បែបនេះក្នុងឱកាសដែលឯកឧត្តម អញ្ជើញជាអធិបតីភាពអបអរសាទរទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៨ ឆ្នាំ២០២៥ ក្រោមប្រធានបទ "ការអប់រំបណ្តុះបណ្តាលបច្ចេកទេស និងវិជ្ជាជីវៈ បង្កើតឱកាសការងារ សាងក្តីសង្ឃឹមដល់យុវជន" នៅវិទ្យាស្ថានជាតិពហុបច្ចេកទេសតេជោសែន ក្រុងតាខ្មៅ ខេត្តកណ្តាល ព្រឹកថ្ងៃទី១៥ ខែមិថុនា ឆ្នាំ២០២៥។

ឯកឧត្តមអភិបាលខេត្ត បន្តថា៖ ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ ក្រោមប្រធានបទ "ការអប់រំបណ្តុះបណ្តាលបច្ចេកទេស និងវិជ្ជាជីវៈ បង្កើតឱកាសការងារ សាងក្តីសង្ឃឹមដល់យុវជន" នាថ្ងៃនេះ គឺជាការដាស់តឿន និងក្រើនរំលឹក ជូនចំពោះយុវជន សិស្ស និស្សិត បងប្អូនកម្មករនិយោជិតទាំងក្នុងប្រព័ន្ធ និងក្រៅប្រព័ន្ធ រួមទាំងប្រជាពលរដ្ឋទាំងអស់ ជាពិសេសបងប្អូនមកពីគ្រួសារក្រីក្រ និងងាយរងហានិភ័យ អំពីសារៈសំខាន់ នៃការចាប់យកចំណេះជំនាញយ៉ាងតិចមួយ ប្រចាំជីវិតរបស់ខ្លួន ដែល“ជំនាញពិត ជីវិតប្រសើរ” ហើយជំនាញដែលចេះច្បាស់ប្រាកដ គឺជាស្ពានសាងក្តីសង្ឃឹមទៅអនាគតដ៏ល្អប្រសើរ។

ឯកឧត្តមអភិបាលខេត្ត បន្ថែមថា៖ កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស សម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យ នៅតាមបណ្តាគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈនានា ក្នុងកម្រិតសញ្ញាបត្រ បច្ចេកទេស និងវិជ្ជាជីវៈ ដោយមិនបង់ថ្លៃសិក្សា និងទទួលបាននូវប្រាក់ឧបត្ថម្ភប្រចាំខែ ២៨ម៉ឺនរៀលក្នុង១ខែ រយៈពេល ៤ខែ សំដៅបង្រួមវិសមភាពសេដ្ឋកិច្ច ប្រកបដោយប្រសិទ្ធភាព និងបរិយាបន្ន ព្រមទាំងកាត់បន្ថយអត្រានៃភាពក្រីក្រជាអប្បបរមា តាមរយៈការបណ្តុះបណ្តាលបំណិន ដែលមានតម្រូវការទីផ្សារច្បាស់លាស់ ព្រមទាំងចូលរួមសម្រេចឱ្យបាននូវចក្ខុវិស័យប្រែក្លាយប្រទេសកម្ពុជា ជាប្រទេសមាន ប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានប្រាក់ចំណូលខ្ពស់ នៅឆ្នាំ២០៥០ ។

ក្នុងឱកាសនោះដែរ ឯកឧត្តមអភិបាលខេត្ត បានស្នើដល់មន្ទីរជុំវិញខេត្ត និងអាជ្ញាធរពាក់ព័ន្ធ សូមធ្វើការផ្សព្វផ្សាយកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ឱ្យបានទូលំទូលាយ ជូនដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ដើម្បីមកចុះឈ្មោះចូលរៀនអោយបានគ្រប់ៗគ្នា ដោយមិនបង់ថ្លៃសិក្សា និងទទួលបាននូវប្រាក់ឧបត្ថម្ភប្រចាំខែ ២៨ម៉ឺនរៀលក្នុង១ខែ រយៈពេល ៤ខែ ដើម្បីទទួលបានជំនាញដែលចេះច្បាស់ ប្រាកដ ជាស្ពានសាងក្តីសង្ឃឹមទៅអនាគតដ៏ល្អប្រសើរ និងអាចអោយគាត់បានឆ្លងផុតបន្ទាត់ក្រីក្រផងដែរ។

លោក ច្រឹង ណារី នាយកវិទ្យាស្ថានកម្មវិធី បានឱ្យដឹងថា៖ វិទ្យាស្ថានបណ្តុះបណ្តាលលើកម្រិត
១. បរិញ្ញាបត្របច្ចេកវិទ្យា(៥ឆ្នាំ)
២. កម្រិតសញ្ញាបត្រជាន់ខ្ពស់បច្ចេកទេស(២ឆ្នាំ)
៣. កម្រិតសញ្ញាបត្របច្ចេកទេស និងវិជ្ជាជីវៈ១.២.៣(១ឆ្នាំ/១កម្រិត) ហើយបច្ចុប្បន្នវិទ្យាស្ថានមានសិស្ស និស្សិត កំពុងសិក្សានៅក្នុងវិទ្យាស្ថានន តាមសហគមន៍ នៅមជ្ឈមណ្ឌល ស្ដានិតិសម្បទា មជ្ឈមណ្ឌលបន្សាបគ្រឿងញៀន និងនៅពន្ធនាគារខេត្ត សរុបចំនួន ២២១២នាក់។