ឯកឧត្តម សន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ និងឯកឧត្តម កែវ វណ្ណថន អញ្ជេីញជាអធិបតីភាពដឹកនាំកិច្ចប្រជុំ បូកសរុបសភាពការណ៍ និងលទ្ធផលនៃកិច្ចប្រតិបត្តិការ ក្នុងការរក្សាសន្តិសុខជាតិ ប្រចាំឆមាសទី១ និងលេីកទិសដៅការងារសម្រាប់ឆមាសទី២ ឆ្នាំ២០២៥ របស់ផែនសន្តិសុខ នៃអគ្គស្នងការដ្ឋាននគរបាលជាតិ
================
(ភ្នំពេញ)៖នាព្រឹកថ្ងៃសុក្រ ៨រោច ខែអាសាឍ ឆ្នាំម្សាញ់ សប្ដស័ក ព.ស.២៥៦៩ ត្រូវនឹងថ្ងៃទី១៨ ខែកក្កដា ឆ្នាំ២០២៥ ឯកឧត្តម សន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ ជាតំណាងដ៏ខ្ពង់ខ្ពស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និង ឯកឧត្តម កែវ វណ្ណថន រដ្ឋលេខាធិការក្រសួងមហាផ្ទៃ បានអញ្ជេីញជាអធិបតីភាពដឹកនាំកិច្ចប្រជុំ បូកសរុបសភាពការណ៍ និងលទ្ធផលកិច្ចប្រតិបត្តិការ ក្នុងការរក្សាសន្តិសុខជាតិ ប្រចាំឆមាសទី១ និងលេីកទិសដៅការងារសម្រាប់ ឆមាសទី២ ឆ្នាំ២០២៥ របស់ផែនសន្តិសុខ នៃអគ្គស្នងការដ្ឋាននគរបាលជាតិ។ កិច្ចប្រជុំបានប្រព្រឹត្តទៅទីស្តីការក្រសួងមហាផ្ទៃ ។

ដោយមានការអញ្ជេីញចូលរួមពី ឯកឧត្តម អនុរដ្ឋលេខាធិការ ឯកឧត្តម លោកជំទាវ អគ្គស្នងការរងនគរបាលជាតិ ប្រធាននាយកដ្ឋានកណ្តាលសន្តិសុខ ប្រធានសេនាធិការដ្ឋាន ប្រធាន អនុប្រធានលេខាធិការដ្ឋាន លោកនាយការិយាល័យចំណុះនាយកដ្ឋានកណ្តាលសន្តិសុខ លោក លោកស្រី ថ្នាក់ដឹកនាំ និងមន្ត្រីជំនាញពាក់ព័ន្ធចំណុះអគ្គស្នងការដ្ឋាននគរបាលជាតិសរុបចំនួន ១០០រូប ។

ជាកិច្ចចាប់ផ្តេីម ឯកឧត្តម កែវ វណ្ណថន រដ្ឋលេខាធិការក្រសួងមហាផ្ទៃ បានមានប្រសាសន៍ បេីកកិច្ចប្រជុំបូកសរុប សភាពការណ៍ និងលទ្ធផលកិច្ចប្រតិបត្តិការរក្សាសន្តិសុខ សណ្តាប់ធ្នាប់សាធារណៈ ប្រចាំ ឆមាសទី១ និងលើកទិសដៅការងារបន្តរបស់ផែនសន្តិសុខ នៃអគ្គស្នងការដ្ឋាននគរបាលជាតិ និងសូមកោតសរសេីរ វាយតំលៃខ្ពស់ដល់កងកម្លាំងនគរបាលទាំងអស់ ដែលបានខិតខំបំពេញភារកិច្ច ក្នុងការ ការពារ រក្សាសន្តិសុខ សណ្តាប់ធ្នាប់ សុវត្ថិភាពសង្គមនាពេលកន្លងមកទទួលបានលទ្ធផលល្អប្រសេីរ និងសូមបេីកកិច្ចប្រជុំចាប់ពីពេលនេះទៅ ។

បន្ថែមលេីសនេះ ឯកឧត្តមសន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ បានមានប្រសាសន៍ថា ដោយទទួលបានការអនុញ្ញាតពី ឯកឧត្តម អភិសន្តិបណ្ឌិត ស សុខា និងមានការឯកភាពពី ឯកឧត្តម នាយឧត្តមសេនីយ៍ អគ្គស្នងការនគរបាលជាតិ ព្រមទាំងមានការចូលរួមពី ឯកឧត្តម អគ្គស្នងការរងទទួលផែន សន្តិសុខ គឺត្រូវឱ្យផែនការងារនីមួយៗមានកិច្ចប្រជុំ ដេីម្បីលេីកឡេីងបូកសរុបការងារ ក្នុងឆ្នាំ២០២៥ នេះ តាមរយៈកិច្ចប្រជុំនេះ គឺត្រូវពិភាក្សាគ្នារកចំណុចខ្លាំង និងចំណុចខ្សោយដេីម្បីលេីកទិសដៅការងារសម្រាប់ឆមាសទី២ ទៅតាមអ្វីដែលបានកំណត់ ។

ក្នុងនោះដែរឯកឧត្តមសន្តិបណ្ឌិត សុខ ផល បានឯកភាពទាំងស្រុងទៅលេីរបាយការណ៍ របស់នាយកដ្ឋានកណ្តាលសន្តិសុខនៃអគ្គស្នងការនគរបាលជាតិ និងរាល់មតិយោបល់ដែលបានពិភាក្សាទៅលេីបទអន្តរាគមន៍ និងសូមសម្តែងការកោតសរសេីរ និងវាយតំលៃខ្ពស់ចំពោះការខិតខំប្រឹងប្រែង ការលះបង់របស់មន្ត្រីនគរបាលជាតិទាំងអស់ចំណុះនាយកដ្ឋានកណ្តាលសន្តិសុខ ដែលបានខិតខំ រួមគ្នាសម្រេចបាននៅសមិទ្ធផលនានាជាច្រេីនជូនជាតិ និងប្រជាពលរដ្ឋ រួមចំណែករក្សាបាននៅសន្តិសុខ ស្ថិរភាពនយោបាយ សន្តិសុខជាតិ និងការពារដាច់ខាតនៅបូរណភាពទឹកដី ។

ជាទីបញ្ចប់ក្នុងឱកាសនៃកិច្ចប្រជុំ ឯកឧត្តមសន្តិបណ្ឌិត ក៏បានស្នេីឱ្យ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ អគ្គស្នងការរងទទួលផែនការងារ សន្តិសុខ ត្រូវអនុវត្តទៅតាមទិសដៅដែលបានដាក់ចេញ និងបន្តយកចិត្តទុកដាក់បន្ថែមទៀតទៅលេីកិច្ចការងារ ការពារ រក្សាសន្តិសុខ សុវត្ថិភាពសង្គម ដេីម្បីឱ្យទទួលបានជោគជ័យ និងសម្រេចបានគ្រប់ភារកិច្ចដែលរាជរដ្ឋាភិបាល និងក្រសួងមហាផ្ទៃបានប្រគល់ជូន ៕