ពិធីសំណេះសំណាលសួរសុខទុក្ខ និងត្រួតពិនិត្យសកម្មភាពការងារ នៅស្នងការដ្ឋាននគរបាលខេត្តកំពង់ចាម ក្រោមអធិបតីភាព ឯកឧត្តម ឧត្តមសេនីយ៍ឯក ហែម សុវត្ថិ

ដោយទទួលបានអនុសាសន៍ដ៏ខ្ពង់ខ្ពស់ និងមានការអនុញ្ញាតពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នាព្រឹកថ្ងៃទី១៨ ខែសីហា ឆ្នាំ២០២៥នេះ នៅស្នងការដ្ឋាននគរបាលខេត្តកំពង់ចាម បានរៀបចំពិធីសំណេះសំណាល សាកសួរសុខទុក្ខ និងត្រួតពិនិត្យសកម្មភាពការងារ នៅស្នងការដ្ឋាននគរបាលខេត្តកំពង់ចាម ក្រោមអធិបតីភាព ឯកឧត្តម ឧត្តមសេនីយ៍ឯក ហែម សុវត្ថិ អគ្គស្នងការរង នគរបាលជាតិ និងជាតំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ។

ពិធីនេះ មានការអញ្ជើញចូលរួមពី លោកឧត្តមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម លោកឧត្តមសេនីយ៍-វរសេនីយ៍ ប្រតិភូអមដំណើរ លោក លោកស្រី ស្នងការរង លោកអនុប្រធានផែន លោកនាយការិយាល័យ លោកអធិការនគរបាលក្រុង-ស្រុក និងកងកម្លាំងអនុសេនាតូច នៃស្នងការដ្ឋាននគរបាលខេត្តកំពង់ចាម ។

ក្នុងឱកាសនោះដែរ លោកឧត្តមសេនីយ៍ទោ ហេង វុទ្ធី ក៏បានឡើងអានរបាយការណ៍ស្វាគមន៍ចំពោះវត្តមានដ៏កក់ក្តៅរបស់ ឯកឧត្តម អគ្គស្នងការរងនគរបាលជាតិ និងប្រតិភូអមដំណើរ ហើយក៏បានរាយការណ៍អំពីការអនុវត្តសកម្មភាពការងារយ៉ាងយកចិត្តទុកដាក់ខ្ពស់បំផុតកន្លងមកនេះ ស្របតាមបទដ្ឋានគតិយុត្ត, បទបញ្ជា, ផែនការសកម្មភាពរបស់អគ្គស្នងការដ្ឋាននគរបាលជាតិ និងសេចក្តីសម្រេច សេចក្តីណែនាំផ្សេងៗ របស់ រាជរដ្ឋាភិបាល, ក្រសួងមហាផ្ទៃ, អគ្គស្នងការដ្ឋាននគរបាលជាតិ និងគណៈបញ្ជាការឯកភាពរដ្ឋបាលខេត្ត ដោយធានាបាននូវ សន្ដិសុខ សណ្ដាប់ធ្នាប់ សុវត្ថិភាពជូនប្រជាពលរដ្ឋក្នុងមូលដ្ឋានបានយ៉ាងល្អប្រសើរ ទាំងវិធានការគ្រប់គ្រងបទល្មើសព្រហ្មទណ្ឌ, គ្រឿងញៀន ក៏ដូចជាគ្រោះថ្នាក់ចរាចរណ៍ ពិសេសការផ្ដល់សេវាសាធារណៈ និងសេវាសំណូមពរជូនប្រជាពលរដ្ឋ បានទាន់ពេលវេលា ព្រមទាំងវិធានការផ្សព្វផ្សាយ គោលនយោបាយ ភូមិ ឃុំ/សង្កាត់ មានសុវត្ថិភាព បានយ៉ាងផុលផុស។

ជាមួយគ្នានេះ ក៏បានឲ្យយកចិត្តទុកដាក់លើអនុសសាសន៍ដ៏ខ្ពង់ខ្ពស់របស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្រ្តី ​រដ្ឋមន្ត្រីក្រសួងមហាផ្ទៃ និង ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ពាក់ព័ន្ធពលករចំណាកស្រុក និងជនភៀសសឹក ដែលបាននឹងវិលត្រលប់មកលំនៅដ្ឋានវិញ ដោយបានចុះសាកសួរសុខទុក្ខ និងបាននាំយកគ្រឿងឧបភោគបរិភោគ និងថវិកាមួយចំនួន ទៅឧបត្ថម្ភដល់មូលដ្ឋានផ្ទាល់ ហើយបានរៀបចំកម្លាំងថ្នាក់មូលដ្ឋាន ការពារ រក្សាសន្តិសុខ និងសណ្តាប់ធ្នាប់ជូនបងប្អូន និងជួយសម្រួល ឯកសារមួយចំនួនដល់ពួកគាត់ ដែលជាតម្រូវការចាំបាច់ ក្នុងការចូលមប្រើការងារនៅតាមក្រុមហ៊ុន ឬរោងចក្រ សហគ្រាសនានា នៅទូទាំងប្រទេសកម្ពុជា ។

បន្ទាប់មក ឯកឧត្តម អគ្គស្នងការរងនគរបាលជាតិ ក៏បានផ្ដល់នូវអនុសាសន៍ជាច្រើន ដើម្បីបន្ដនិរន្តរភាពការងារឱ្យកាន់តែខ្លាំងក្លាថែមមួយកម្រិតទៀត និងបាននាំយកប្រសាសន៍ផ្ដាំផ្ញើសាកសួរសុខទុកដល់គ្រប់កងកម្លាំង ព្រមទាំងឧបត្ថម្ភនូវថវិកាដែលជាអំណោយដ៏ថ្លៃថ្លារបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកជំទាវ ដល់ស្នងការដ្ឋាននគរបាលខេត្តកំពង់ចាម ចំនួន ២០លានរៀល ។ ក្នុងនោះ ឯកឧត្តម អគ្គស្នងការរង ក៏បានឧបត្ថម្ភថវិកាផ្ទាល់ខ្លួនដល់គ្រួសារ យោធិនពលីក្នុងសមរភូមិមុខចំនួន២នាក់ ក្នុងម្នាក់ៗ ថវិកា ចំនួន២លានរៀន និងគ្រួសារយោធិនពលី នៃវីរព្រំដែន ១នាក់ ចំនួន ១លានរៀល ផងដែរ ៕