លោកជំទាវអ្នកឧកញ៉ា ម៉ៅ ចំណាន គិតម៉េង អញ្ចើញចុះសួរសុខទុក្ខ និងប្រគល់អំណោយមូលនិធិទ្រទ្រង់ជនភៀសសឹក ជូនដល់គ្រួសារកងទ័ព និងជនភៀសសឹក នៅជំរំសុវត្ថិភាព

សៀមរាប៖ នៅថ្ងៃទី២០ ខែសីហា ឆ្នាំ២០២៥ លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ និងជាអនុប្រធានក្រុមប្រឹក្សាភិបាលក្រុមហ៊ុនរ៉ូយ៉ាល់គ្រុប ជំនួសមុខឱ្យអ្នកឧកញ៉ា គិត ម៉េង បានអញ្ចើញចុះសួរសុខទុក្ខដល់គ្រួសារវីរកងទ័ព និងប្រជាពលរដ្ឋភៀសសឹក ព្រមទាំងបាននាំយកនូវសម្លៀកបំពាក់ សម្ភារប្រើប្រាស់ និងគ្រឿងឧបភោគបរិភោគ រួមជាមួយនឹងថវិកាមួយចំនួនជូនដល់គ្រួសារវីរកងទ័ព និងប្រជាពលរដ្ឋភៀសសឹក នៅទីតាំងវត្តជ្រោយនាងងួន ឃុំជ្រោយនាងងួន ស្រុកស្រីស្នំ ខេត្តសៀមរាប ។

ក្នុងឱកាសនោះ លោក ហ៊ន់ ឫទ្ធិ អភិបាលនៃគណៈអភិបាលស្រុកស្រីស្នំ បានស្វាគមន៍យ៉ាងកក់ក្តៅបំផុតចំពោះវត្តមានលោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ និងសមាជិកប្រតិភូទាំងអស់ ដែលបាននាំយកអំណោយមកចែកជូនគ្រួសារជនភៀសសឹក ដោយសារសង្គ្រាមឈ្លានពានរបស់សៀម កំពុងស្នាក់នៅក្នុងស្រុកស្រីស្នំនាពេលនេះ ។ លោកបន្តថា គិតត្រឹមថ្ងៃទី២០ ខែសីហា ឆ្នាំ២០២៥នេះ ជនភៀសសឹកបានបន្តស្នាក់នៅទីតាំងជំរំសុវត្ថិភាពមានចំនួន ៧៣៣ គ្រួសារ។

ក្នុងឱកាសនោះ លោកជំទាវអ្នកឧញ៉ា ម៉ៅ ចំណាន គិតម៉េង បានមានប្រសាសន៍ថា « ក្នុងរយៈពេលជិត១ខែមកនេះ ប្រជាពលរដ្ឋកម្ពុជាគ្រប់រូបសុទ្ធតែទទួលរងការឈឺចាប់។ ពួកយើងដឹងយ៉ាងច្បាស់ថា បងប្អូនដែលនៅទីនេះ តាមបណ្តោយព្រំដែន ទាំងកងទ័ព និងប្រជាជនសុទ្ធតែជាអ្នកប្រឈមដោយផ្ទាល់ និងរងទុក្ខលំបាកគ្រប់បែបយ៉ាង។ ប៉ុន្តែពួកយើងដែលឈរនៅជួរក្រោយវិញ ក៏រស់នៅមិនសុខ ដេកមិនលក់ បក់ក៏មិនល្ហើយដូចគ្នា ពួកយើងតែងតាមដានការវិវត្តសភាពការណ៍គ្រប់វិនាទី ហើយក៏មានភាពឈឺចាប់ដូចគ្នា ។ ពួកយើងជាកងកម្លាំងជួរក្រោយបានព្យាយាមធ្វើសកម្មភាពគ្រប់រូបភាពដើម្បីបំផុសចលនាស្នេហាជាតិ សាមគ្គីភាពជាតិ រួមគ្នាជាធ្លុងមួយ រួមគ្នាបញ្ចេញសំឡេងនៅលើឆាកអន្តរជាតិ និងការកៀរគរមូលនិធិជួយកងទ័ព និងជនភៀសសឹកជាដើម » ។

លោកជំទាវអ្នកឧញ៉ាបន្តថា ក្រុមការងារនៃមូលនិធិ ទ្រទ្រង់ជន ភៀសសឹក ដែលបង្កើតឡើងដោយអ្នកឧកញ៉ា គិត ម៉េង និងរូបនាងខ្ញុំផ្ទាល់ បានធ្វើដំណើរមកដល់ទីនេះ មិនមែនគ្រាន់តែមកដើម្បីយកអំណោយ ឬមកសួរសុខទុក្ខប៉ុណ្ណោះទេ ប៉ុន្តែអ្វីដែលធំបំផុត គឺការនាំមកនូវតម្លៃនៃការគោរពស្រឡាញ់ ការយល់ចិត្ត និងក្តីសង្ឃឹមមកជូនពុកម៉ែបងប្អូនក្នុងនាមជាកូនចៅមហាបុព្វបុរសខ្មែរ មានឈាម ជ័រជាជាតិខ្មែរដ៏អស្ចារ្យ ។

លោកជំទាវអ្នកឧកញ៉ា បានបន្ថែមថា ការគេចភៀសខ្លួនដោយគ្មានការព្រៀងទុក ការរត់ភៀសខ្លួនដើម្បីឱ្យរួចជីវិតមួយគ្រាៗរបស់បងប្អូនទាំងអស់ ពួកយើងពិតជាដឹងយ៉ាងច្បាស់ថា អារម្មណ៍ឯកាក្នុងចិត្ត, អារម្មណ៍ថាគ្មាននរណាចងចាំ គាំទ្រឬជួយឧបត្ថម្ភ អាចនឹងកើតមាននៅក្នុងអំឡុងពេលភ្លាមៗនោះ ។ ប៉ុន្តែសូមពុកម៉ែបងប្អូនចងចាំថា ពុកម៉ែបងប្អូនមិនឯកាឡើយ។ ពោលគឺនៅខាងក្រោយអ្នកទាំងអស់គ្នា មានថ្នាក់ដឹកនាំដ៏អស្ចារ្យ និងជនរួមជាតិកម្ពុជា១៧លាននាក់ចាំជួយ និងយកចិត្តទុក្ខដាក់គ្រប់ៗគ្នា ហើយសូម្បីតែអន្តរជាតិ និងប្រទេសមហាអំណាចនានាក្នុងពិភពលោកក៏កំពុងឈរកៀកស្មាជាមួយនឹងប្រទេសកម្ពុជា និងប្រជាជនដ៏ស្លូតត្រង់របស់យើងផងដែរ។

សូមបញ្ជាក់ថា ក្រៅពីជួបសំណេះសំណាលសួរសុខទុក្ខ លោកជំទាវអ្នកឧកញ៉ា ម៉ៅ ចំណាន គិតម៉េង បានប្រគល់ជូនអំណោយពីមូលនិធិទ្រង់ទ្រង់ជនភៀសសឹក មួយគ្រួសារទទួលបានអង្ក១០គីឡូមួយបាវ ទឹកសុទ្ធមួយកេស មីមួយកេស សម្លៀកបំពាក់មួយថង់ សាច់ក្រកកន្លះគីឡូក្រាម ទឹកស៊ីអ៊ីវ១ដប ទឹកត្រី១ដប ប្រេងឆា១ដប ត្រីងៀតប្រៃ កន្លះគីឡូ សាប៊ូដុសខ្លួន ឬកក់សក់១ដប ។

ក្រៅពីនោះលោកជំទាវអ្នកឧកញ៉ាក៏បានឧបត្ថម្ភនូវថវិកាផ្ទាល់ខ្លួនចំនួន៥លានរៀល ដល់គណៈគ្រប់គ្រង សម្រប សម្រួលការងារក្នុងជំរំជនភៀសសឹក និង២លានរៀលប្រគេនជូនព្រះចៅអធិការវត្តជ្រោយនាងងួន ប្រើប្រាស់តាមតម្រូវការ ផងដែរ៕