ឯកឧត្ដម វ៉ី សំណាង អភិបាលខេត្តតាកែវ អញ្ជើញចុះចែកអំណោយមនុស្សធម៌ ជូនពលរដ្ឋរងគ្រោះដោយខ្យល់កន្ត្រាក់ ក្នុងស្រុកកោះអណ្តែត
ឯកឧត្ដម វ៉ី សំណាង អភិបាលខេត្តតាកែវ អញ្ជើញចុះចែកអំណោយមនុស្សធម៌ ជូនពលរដ្ឋរងគ្រោះដោយខ្យល់កន្ត្រាក់ ក្នុងស្រុកកោះអណ្តែត
តាកែវ ៖ ក្នុងស្មារតីមនុស្សធម៌ និងការយកចិត្តទុកដាក់ខ្ពស់ចំពោះសុខទុក្ខរបស់ប្រជាពលរដ្ឋ ឯកឧត្ដម វ៉ី សំណាង អភិបាល នៃគណៈអភិបាលខេត្តតាកែវ នារសៀលថ្ងៃទី១៥ ខែកញ្ញា ឆ្នាំ២០២៥ បានអញ្ជើញដឹកនាំក្រុមការងារចុះជួបសំណេះសំណាល និងផ្ដល់អំណោយមនុស្សធម៌ដល់ក្រុមគ្រួសារចំនួន ៣១គ្រួសារ ដែលរងគ្រោះដោយសារគ្រោះធម្មជាតិខ្យល់កន្ត្រាក់ នៅស្រុកកោះអណ្តែត។
នាឱកាសនោះដែរ ឯកឧត្ដម អភិបាលខេត្ត បានបញ្ជាក់ថា អំណោយទាំងអស់នេះ គឺជាការចូលរួមចំណែកយ៉ាងសំខាន់ពី កាកបាទក្រហមកម្ពុជា ដែលតែងតែមានវត្តមានទាន់ពេលវេលា ដើម្បីជួយសង្គ្រោះប្រជាពលរដ្ឋដែលជួបការលំបាកដោយមិនប្រកាន់ការរើសអើងអ្វីឡើយ។
ឯកឧត្ដម បានសង្កត់ធ្ងន់ថា «ការផ្ដល់ជំនួយនេះ គឺធ្វើឡើងដោយស្មារតីមនុស្សធម៌សុទ្ធសាធ ដោយមិនប្រកាន់ពូជសាសន៍ ពណ៌សម្បុរ និន្នាការនយោបាយ ឬថា ជាគ្នាគេ ឬគ្នាឯង នោះទេ»។
ឯកឧត្តម អភិបាលខេត្ត បន្ថែមទៀតថា បើទោះបីជាអំណោយទាំងនេះមិនច្រើន ប៉ុន្តែវាជាការរួមចំណែកដ៏មានតម្លៃក្នុងការជួយសម្រាលបន្ទុក និងដោះស្រាយការលំបាករបស់ប្រជាពលរដ្ឋរងគ្រោះបានមួយរយៈពេល ។ ឯកឧត្តម ថា ការចុះសួរសុខទុក្ខ និងចែកអំណោយនេះ បានបង្ហាញឱ្យឃើញពីការយកចិត្តទុកដាក់ និងការទទួលខុសត្រូវខ្ពស់របស់អាជ្ញាធរគ្រប់លំដាប់ថ្នាក់ ក៏ដូចជា កាកបាទក្រហមកម្ពុជា ចំពោះប្រជាពលរដ្ឋនៅគ្រប់កាលៈទេសៈទាំងអស់។
សូមជម្រាបជូនថា អំណោយដែលបានផ្ដល់ជូនគ្រួសារទាំង៣១ គ្រួសារ ក្នុងនោះ ទទួលបានអង្ករ ២៥ គីឡូក្រាម, មី ១ កេស, ត្រីខ ១ យួរ, ទឹកត្រី ៣ ដប, ទឹកស៊ីអ៊ីវ ៣ ដប, ប្រេងឆា ១ ដប, កន្ទេល ១, ភួយ ១, តង់ ១, សារុង ១, ក្រមា ១ និងថវិកាមួយចំនួនទៀត។ ដោយឡែកសម្រាប់គ្រួសារទាំង៦ គ្រួសារ ដែលរងគ្រោះរលំផ្ទះទាំងស្រុង ទទួលបានអំណោយបន្ថែមទៀត រួមមាន ៖ តង់ធំ ១ និងថវិកាមួយចំនួនទៀត៕
