សម្តេចកិត្តិសង្គហបណ្ឌិត ម៉ែន សំអន អញ្ជើញថ្វាយគ្រឿងសក្ការៈដល់​ព្រះពុទ្ធរូបនៅសារមន្ទីរខេត្តបន្ទាយមានជ័យ និងអញ្ជើញអុជធូបបួងសួង សុំសេចក្តីសុខ សេចក្តីចម្រើនជូនជាតិ នៅ​ព្រះអង្គធំ ស្ថិតនៅវត្តប្រាសាទរលំជ្រៃ
===================
សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា បានអញ្ជើញថ្វាយគ្រឿងសក្ការៈដល់​ព្រះពុទ្ធរូបនៅសារមន្ទីរខេត្តបន្ទាយមានជ័យ និងបាន​អញ្ជើញ​​អុជធូបនៅព្រះងអ្គធំ នៅវត្តប្រាសាទរលំជ្រៃ ស្ថិតក្នុងស្រុកថ្មពួក ខេត្តបន្ទាយមានជ័យ និងបាន​បបួងសួងឱ្យប្រជាជន​​ទូទាំង​ប្រទេស​​កម្ពុជា​ ពិសេស​ថ្នាក់ដឹកនាំ​ កងទ័ព​អង់អាច​ក្លាហាន​កំពុង​ការពារ​បូរណភាព​ទឹកដី ទទួលបាន​សុខ​សុវត្ថិភាព សន្តិ​ភាពជា​រៀងរហូត នារសៀលថ្ងៃអង្គារ ១កើត ខែអស្សុជ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៣ ខែកញ្ញា ឆ្នាំ២០២៥ នេះ​។

សម្តេចកិត្តិសង្គហបណ្ឌិត ក៏បានបួងសួងថ្វាយព្រះពរជ័យបវរមហាប្រសើរ ថ្វាយព្រះមហាក្សត្រ ព្រះមហាក្សត្រី ជាសម្តេចម៉ែ សម្តេចយាយ សម្តេចយាយទួត មុនីនាថ សីហនុ និងប្រគេនពរជ័យដល់ព្រះថេរានុត្ថេរៈ​គ្រប់ព្រះអង្គ និងសូមគោរពជូនពរ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងក្រុមគ្រួសារ ក៏ដូចជា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និង​លោកជំទាវបណ្ឌិត ពេជ ចន្ទមុនី ហ៊ុនម៉ាណែត និងថ្នាក់ដឹកនាំ សមាជិក សមាជិកា ព្រឹទ្ធសភា រដ្ឋសភា ព្រមទាំងប្រជាពលរដ្ឋ​នៅទូទាំងប្រទេស ជួបតែសេចក្តីសុខចម្រើនគ្រប់ៗព្រះអង្គ និងគ្រប់ៗគ្នា ជាពិសេសសូមគ្រប់ក្រុមគ្រួសារ​ជៀសផុតពីជំងឺកាចសាហាវ ប្រទេសជាតិជួបតែនឹងសេចក្តីសុខ សេចក្តីចម្រើន មានសុខសន្តិភាព សម្បូរណ៍​កសិផល សម្បូរណ៍ទេសចរណ៍ ជៀសផុតពី​គ្រោះ​​រាំងស្ងួត សម្តេចក៏បាន​បួងសួងដល់​គុណបុណ្យ​បារមី​វត្ថុស័ក្តិសិទ្ធិ​ក្នុងលោកតាមជួយប្រោសព្រំពរជ័យដល់វីរកងទ័ពដ៏អង់អាចរបស់យើង ដែលកំពុង​ឈរជើង​ការពារ​ទឹកដីពី​ខ្មាំងសត្រូវ។

គួររំលឹកផងដែរថា សារមន្ទីរខេត្តបន្ទាយមានជ័យ ត្រូវបានបង្កើតឡើងនាអំឡុងឆ្នាំ២០០៤ ដោយមានការជួយឧបត្ថម្ភគាំទ្រពី រាជរដ្ឋាភិបាលកម្ពុជា ដែលមានទីតាំងក្នុងក្រុង​សិរីសោភណ្ឌ ខេត្តបន្ទាយមានជ័យ ដែលជាកន្លែងរក្សាទុក និងអភិរក្ស វត្ថុបុរាណ​​មានតម្លៃជាច្រើន ដូចជា៖ រូបចម្លាក់ គ្រឿងលម្អប្រាសាទ ជាពិសេស​ ភាជនវិសេសនាសម័យបុរាណ និងសម្ភារៈ​ធ្វើ​ពីសំរឹទ្ធ​​ និងដែកទុកជាមរតកសម្រាប់សាធារណជនបាន​​ទស្សនា​និងសិក្សាឈ្វេងយល់។ តាមរយៈ​ សារៈមន្ទីរនេះក៏បានក្លាយជា​ទីកន្លែង​សម្រាប់ជួយលើកតម្កើងកេរ្តិ៍ឈ្មោះប្រជាជន​ខ្មែរ និងវប្បធម៌ ដែលបានការបង្ហាញពីរឿងរ៉ាវអតីតកាល និងជាទីកន្លែង​បង្ហាញពីទំនាក់ទំនងជាមួយនឹងកន្លែងដែលយើង​រស់នៅ ទំនាក់ទំនងជាមួយវត្ថុទៅនឹងព្រឹត្តិការណ៍ក្នុងអតីតកាល ហើយក៏ជា​កន្លែងដែលយើងជួបជុំគ្នា ដើម្បីចែករំលែកនូវរឿងរ៉ាវដែលពិសេស និងប្លែកៗរបស់ជាតិយើង ហើយក៏បានរួមចំណែកក្នុងការ​អភិរក្សបេតិកភណ្ឌពិភពលោកផងដែរ៕