កិច្ចប្រជុំបូកសរុបលទ្ធផលការងារប្រចាំឆ្នាំ២០២៥ លើកទិសដៅការងារបន្ត​ឆ្នាំ២០២៦ និងពង្រឹងការគ្រប់គ្រង​លំហូរឯកសារចេញ-ចូល របស់នាយកដ្ឋានប្រឆាំងការជួញដូរមនុស្ស និងការពារអនីតិជន ក្រោមអធិបតីភាពឯកឧត្តម ឧត្តមសេនីយ៍ឯក ជីវ ផល្លី

រាជធានីភំ្នពេញ ៖ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នៅរសៀលថ្ងៃទី១៩ ខែមករា ឆ្នាំ២០២៦ ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម​អគ្គស្នងការនគរបាលជាតិ​​​ បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំឆ្នាំ២០២៥ លើកទិសដៅការងារបន្ត​ឆ្នាំ២០២៦ និងពង្រឹងការគ្រប់គ្រង​លំហូរឯកសារចេញ-ចូល របស់នាយកដ្ឋានប្រឆាំងការជួញដូរមនុស្ស និងការពារអនីតិជន នៅអគ្គស្នងការដ្ឋាននគរបាលជាតិ។

កិច្ចប្រជុំនេះក៏មានការចូលរួមដោយ លោកឧត្តមសេនីយ៍ទោ សួរ ប៊ុនស៊ូ អនុប្រធានសេនាធិការដ្ឋាន លោកឧត្តមសេនីយ៍ទោ ប៉ែន ច័ន្ទសុខខេមរិទ្ធ ​អនុប្រធាននាយកដ្ឋានកណ្ដាលនគរបាលយុត្តិធម៌ , លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន, លោក-លោកស្រីឧត្តមសេនីយ៍ វរសេនីយ៍អនុប្រធាននាយកដ្ឋាន នាយ-នាយរងការិយាល័យ និងនាយផ្នែកជាច្រើនរូបទៀត។

លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន បានឡើងរាយការណ៍សង្ខេបអំពីវឌ្ឍនភាពការអនុវត្តការងារប្រចាំឆ្នាំ បញ្ហាប្រឈម សំណូមពរ រួចមក លោកឧត្តមសេនីយ៍ទោ ក៏បានជំរុញការអនុវត្តដីកាស្វែងរកចាប់ខ្លួន ករណីសេសសល់ មុខសញ្ញាកំពុងតស៊ូឲ្យមានប្រសិទ្ធភាព​ និង​សហការជាមួយសមត្ថកិច្ចបរទេសពាក់ព័ន្ធដើម្បីប្រមូលព័ត៌មាន ស៊ើបអង្កេតបទល្មើស ដែលពាក់ព័ន្ធការរំលោភបំពានផ្លូវភេទកុមារអំពើជួញដូរមនុស្ស និងអាជីវកម្មផ្លូវភេទ និងប្តេជ្ញាបន្តសហការជាមួយអង្គការមិនមែនរដ្ឋាភិបាលជាតិ និងអន្តរជាតិដែលធ្វើការងារលើវិស័យប្រយុទ្ធប្រឆាំងអំពើជួញដូរមនុស្ស និងគាំពារជនរងគ្រោះ ដើម្បីប្រមូលព័ត៌មានស្រាវជ្រាវស៊ើបអង្កេតពាក់ព័ន្ធ អំពើជួញដូរមនុស្ស និងធ្វើអាជីវកម្មផ្លូវភេទលើស្ត្រី និងកុមារ ព្រមទាំងបង្កើនសមត្ថភាពជំនាញជូនដល់ មន្ត្រីនគរបាលប្រឆាំងការជួញដូរមនុស្ស និងការពារអនីតិជន ផ្សព្វផ្សាយអំពីច្បាប់ ល្បិចកលជនល្មើស ការធ្វើចំណាកស្រុកដោយខុសច្បាប់ដល់សិស្សានុសិស្សនៅតាមសាលារៀន ក៏ដូចប្រជាពលរដ្ឋនៅសហគមន៍។

តំណាងដ៍ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ ​បាននាំយកនូវការផ្តាំផ្ញើសាកសួរសុខទុក្ខដល់លោក-លោកស្រីឧត្តមសេនីយ៍ វរសេនីយ៍​ នៃនាយកដ្ឋានប្រឆាំងការជួញដូរមនុស្ស និងការពារអនីតិជន ពីសំណាក់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និង ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងបានឯកភាពរបាយការណ៍សង្ខេបរបស់លោកឧត្តមសេនីយ៍ប្រធាននាយកដ្ឋាន ដែលបានចូលរួមខិតខំប្រឹងប្រែងក្នុងការប្រយុទ្ធប្រឆាំងអំពើជួញដូរមនុស្សគ្រប់ទម្រង់ ក្នុងរយៈពេល១ឆ្នាំនេះ ទទួលបានលទ្ធផលគួរជាទីមោទនៈ។

ឯកឧត្តម ​អគ្គស្នងការរងនគរបាលជាតិ ក៏បានជំរុញដល់ក្រុមប្រឹក្សាវិន័យដែលមានស្រាប់ឱ្យអនុវត្តតួនាទីភារកិច្ចរបស់ខ្លួនប្រកបដោយការទទួលខុសត្រូវនិងមានតម្លាភាព និងបានណែនាំ​ដល់កងកម្លាំងនគរបាលប្រឆាំងការជួញដូរមនុស្សនិងការពារអនីតិជនឱ្យគោរពវិន័យកងកម្លាំងនគរបាលជាតិ គ្រងឯកសណ្ឋាននគរបាលជាតិឱ្យបានត្រឹមត្រូវ អនុវត្តច្បាប់ប្រកបដោយក្រមសីលធម៌វិជ្ជាជីវ: គោរពគ្នាតាមឋានានុក្រម និងចាត់តាំងវេនប្រចាំការ២៤ម៉ោងលើ២៤ម៉ោង រង់ចាំទទួលបទបញ្ជាពីអគ្គស្នងការដ្ឋាននគរបាលជាតិ ។

ឯកឧត្តម ឧត្តមសេនីយ៍ឯក ​អគ្គស្នងការរងនគរបាលជាតិ បានបន្ថែមថា ​ទន្ទឹមនឹងលទ្ធផលល្អប្រសើរនេះ សូមឲ្យលោក-លោកស្រីឧត្តមសេនីយ៍ វរសេនីយ៍ កែលំអរនូវចំណុចខ្វះខាតមួយចំនួន
និងបាន​ដាក់ទិសដៅសម្រាប់នាយកដ្ឋានយកទៅអនុវត្តបន្ត​ ៖ ​១​-ពង្រឹងការគ្រប់គ្រងមន្រ្តីនគរបាលក្រោមឱវាទឱ្យបានល្អ ២-ពង្រឹងការគ្រប់គ្រងលំហូរឯកសារចូល-ចេញ ឲ្យបានត្រឹមត្រូវនិងច្បាស់លាស់ ៣-ត្រូវរៀបចំកសាងផែនការសកម្មភាព ឆ្នាំ២០២៦ ដោយយកចិត្តទុកដាក់លើស្ថានភាពកើតឡើងថ្មីៗ។ ៤-ពង្រឹងការគ្រប់គ្រងបញ្ជីបណ្តឹង តាមដានការអនុវត្តនីតិវិធីលើបណ្តឹង។ ៥-បន្តជំរុញបើកការស៊ើបអង្កេតលើការងារប្រឆាំងការសម្អាតប្រាក់ និងហិរញ្ញប្បទានភេរវកម្មដែលពាក់ព័ន្ធ បទល្មើសជួញដូរមនុស្ស និងអាជីវកម្មផ្លូវភេទ ៦​​-ពន្លឿនការធ្វើបច្ចុប្បន្នភាពគ្រប់គ្រងដីកា និងសំណុំរឿង៕