សម្តេចកិត្តិសង្គហបណ្ឌិត ម៉ែន សំអន រណសិរ្សនៃប្រទេសទាំងពីរ មានតួនាទីសំខាន់ណាស់ក្នុងការបន្តពង្រឹង និងពង្រីកនូវទំនាក់ទំនងអ្នកជិតខាងល្អ មិត្តភាពប្រពៃណី និងកិច្ចសហប្រតិបត្តិការគ្រប់ជ្រុងជ្រោយ ឱ្យកាន់តែរឹងមាំ
====================
ទីក្រុងហាណូយ៖ សម្តេចកិត្តិសង្គហបណ្ឌិត ម៉ែន សំអន ប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា បានជួបសម្តែងការគួរសមជាមួយ លោកជំទាវ បួយ ធីមិញហ័យ (Bùi Thị Minh Hoài) ប្រធានគណៈកម្មាធិការមជ្ឈិមរណសិរ្សមាតុភូមិវៀតណាម នារសៀលថ្ងៃចន្ទ ៨កើត ខែមាឃ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៦ ខែមករា ឆ្នាំ២០២៦។

លោកជំទាវ បួយ ធីមិញហ័យ (Bùi Thị Minh Hoài) បានសម្ដែងនូវការស្វាគមន៍យ៉ាងកក់ក្ដៅ និងវាយតម្លៃខ្ពស់ចំពោះដំណើរទស្សនកិច្ចរបស់គណៈប្រតិភូ ថាបានជួបមិត្តចាស់ មិត្តជិតស្និទ្ធ និងជាមិត្តល្អ ដែលតែងតែដើរតួនាទីព្រូនជ្រុំនៃទំនាក់ទំនងកម្ពុជា វៀតណាម ឱ្យកាន់តែរឹងមាំ និងស្ថិតស្ថេរ។ បានជម្រាបជូនអំពីដំណើរការ និងលទ្ធផលនៃមហាសន្និបាតមជ្ឈិមបក្សកុំមុយនីស្ដវៀតណាមលើកទី១៤ ដែលជាក្ដីសង្ឃឹមថ្មីសម្រាប់ប្រជាជនវៀតណាម។

លោកជំទាវ ក៏បានសម្ដែងនូវការអបអរសាទរចំពោះការអភិវឌ្ឍ និងសមិទ្ធផលនានា ដែលកម្ពុជាជាបងប្អូនសម្រេចបាន ក្រោមការដឹកនាំដ៏ត្រឹមត្រូវរបស់គណបក្សប្រជាជនកម្ពុជា ដែលមានសម្ដេចតេជោ ជាប្រធាន និងសម្ដេចធិបតី ជានាយករដ្ឋមន្រ្តី ដោយចាត់ទុកជោគជ័យរបស់កម្ពុជា ក៏ដូចជាជោគជ័យរបស់វៀតណាមដែរ។

ចំពោះទំនាក់ទំនងនៃប្រទេសទាំងពីរ លោកជំទាវ បានវាយតម្លៃខ្ពស់ថាកំពុងតែត្រូវពង្រឹងពង្រីកស៊ីជម្រៅពីមួយថ្ងៃទៅមួយថ្ងៃ ដែលជាមូលដ្ឋានគ្រឹះសម្រាប់លើកកម្ពស់កិច្ចសហការលើវិស័យសំខាន់ៗរួមមាន ការពារជាតិ សន្តិសុខ វិនិយោគ ថាមពល បច្ចេកវិទ្យា ទេសចរណ៍ សុខាភិបាល និងអប់រំបណ្ដុះបណ្ដាល។ ដោយឡែកបណ្ដាអង្គភាព និងខេត្តជាប់ព្រំដែន ក៏កំពុងតែពង្រឹងពង្រីកនូវភាពជិតសិទ្ធ និងទំនាក់ទំនងល្អពីមួយថ្ងៃទៅមួយថ្ងៃ។ ទំនាក់ទំនងកាន់តែស៊ីជម្រៅ និងរឹងមាំរវាងប្រទេសទាំងពីរនេះ ត្រូវបានលោកជំទាវមើលឃើញថា ពិតជាមិនអាចកាត់ផ្ដាច់បានពីតួនាទីដ៏សកម្ម និងរស់រវើករបស់ សម្តេចកិត្តិសង្គហបណ្ឌិត ម៉ែន សំអន បានឡើយ។

លោកជំទាវក៏បានគោរពអញ្ជើញ សម្តេចកិត្តិសង្គហបណ្ឌិត ម៉ែន សំអន ដឹកនាំប្រតិភូក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា បំពេញទស្សនកិច្ចនៅប្រទេសវៀតណាម ដើម្បីជួបពិភាក្សា និងផ្លាស់ប្ដូរទស្សនៈគ្នា សំដៅលើកកម្ពស់តួនាទីរបស់រណសិរ្សនៃប្រទេសទាំងពីរ ក្នុងការរួមចំណែកធ្វើឱ្យទំនាក់ទំនងនៃប្រទេសទាំងពីរកាន់តែរឹងមាំ និងយល់ជ្រួតជ្រាបដល់ស្រទាប់យុវជនជំនាន់ក្រោយ ព្រមទាំងចុះហត្ថលេខាលើអនុស្សរណៈកិច្ចសហប្រតិបត្តិការរវាងរណសិរ្សប្រទេសទាំងពីរ សម្រាប់ឆ្នាំ ២០២៦-២០៣១។

សម្តេចកិត្តិសង្គហបណ្ឌិត ក៏បានថ្លែងអំណរគុណចំពោះការចំណាយពេលដ៏មានតម្លៃជួបគណៈប្រតិភូ និងទទួលស្វាគមន៍ប្រកបដោយភាពកក់ក្តៅ និងមនោសញ្ចេតនាល្អជាបងប្អូន។ សម្តេច ក៏បានសម្ដែងនូវការអបអរសាទរ ចំពោះសមិទ្ធផលដែលមហាសន្និបាតបក្សកុំម្មុយនីស្តវៀតណាមលើកទី១៤ សម្រេចបាន និងចំពោះលោកជំទាវ បួយ ធីមិញហ័យ (Bùi Thị Minh Hoài) ដែលត្រូវបានបោះឆ្នោតជ្រើសតាំងបន្តជាសមាជិកការិយាល័យនយោបាយ លេខាធិការគណៈកម្មាធិការមជ្ឈិមគណបក្សកុម្មុយនីស្ត នៃសាធារណរដ្ឋសង្គមនិយមវៀតណាម។ ការណ៍នេះ ត្រូវបានសម្ដេចកិត្តិសង្គហបណ្ឌិតយល់ថា រណសិរ្សទាំងពីរនៅមានការងារជាច្រើនទៀតដែលត្រូវធ្វើរួមគ្នាដើម្បីរួមចំណែកធ្វើឱ្យទំនាក់ទំនងនៃប្រទេសទាំងពីរកាន់រឹងមាំ តាមរយៈការជំរុញការផ្សព្វផ្សាយឱ្យប្រជាជននៃប្រទេសទាំងពីរបានយល់ជ្រួតជ្រាបអំពីទំនាក់ទំនងជាអ្នកជិតខាងល្អ មិត្តភាពជាប្រពៃណី និងកិច្ចសហប្រតិបត្តិការគ្រប់ជ្រុងជ្រោយ និងយូរអង្វែងរវាងប្រទេសទាំងពីរ ពិសេសយុវជនជំនាន់ក្រោយ។

ភាគីទាំងពីរបានឯកភាពនឹងបន្តធ្វើការរួមគ្នាឱ្យកាន់តែសកម្ម ដើម្បីបង្កើតផែនការអនុវត្តជាក់ស្តែង។