អ.ប.ព. ប្រារព្ធពិធីអបអរសាទរខួបលើកទី១១៥ ទិវាអន្តរជាតិនារី ៨ មីនា ឆ្នាំ២០២៦ ក្រោមប្រធានបទ «សន្តិភាព និងសន្តិសុខសម្រាប់ស្រ្តី និងគ្រួសារ»
--------
ដើម្បីអបអរសាទរពីវឌ្ឍនភាព និងសមិទ្ធផលលើគ្រប់វិស័យរបស់ស្រ្តី និងរំលឹកថា សន្តិភាព និងសន្តិសុខ មិនត្រឹមតែជាវត្ថុបំណងនៃប្រជាជាតិមួយ ឬពិភពលោកប៉ុណ្ណោះទេ ប៉ុន្តែជាតថភាពជាក់ស្តែង ដែលផ្តើមចេញពីផ្ទះរបស់យើង សហគមន៍ និងជីវិតប្រចាំថ្ងៃរបស់ស្រ្តី និងក្រុមគ្រួសារ។

នៅព្រឹកថ្ងៃទី១០ ខែមីនា ឆ្នាំ២០២៦ អង្គភាពប្រឆាំងអំពើពុករលួយ (អ.ប.ព.) បានប្រារព្ធពិធីអបអរសាទរ ខួបលើកទី១១៥ ទិវាអន្តរជាតិនារី ៨ មីនា ឆ្នាំ២០២៦ ក្រោមប្រធានបទ «សន្តិភាព និងសន្តិសុខសម្រាប់ស្រ្តី និងគ្រួសារ» ប្រព្រឹត្តទៅក្រោមអធិបតីភាពដ៏ខ្ពង់ខ្ពស់ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ ប្រធានក្រុមប្រឹក្សាជាតិប្រឆាំងអំពើពុករលួយ និងជាប្រធានសមាគមនារីកម្ពុជា ដើម្បីសន្តិភាព និងអភិវឌ្ឍ ដោយមានការអញ្ជើញចូលរួមពីថ្នាក់ដឹកនាំ និងមន្រ្តី អ.ប.ព. សរុបចំនួន ២៩៦ រូប។

ថ្លែងក្នុងឱកាសនេះ លោកជំទាវ ចិន ច័ន្ទមុនី ឧបការី ប្រធានក្រុមប្រឹក្សាវិន័យ និងត្រួតពិនិត្យផ្ទៃក្នុង និងជាប្រធានសមាគមនារី អ.ប.ព. បានលើកឡើងថា ការអញ្ជើញចូលរួមរបស់សម្តេចកិត្តិសង្គហបណ្ឌិត គឺជាប្រភពលើកទឹកចិត្ត មិនអាចកាត់ថ្លៃបាន ដែលជំរុញឱ្យនារីទាំងអស់ដែលជាថ្នាក់ដឹកនាំ និងមន្រ្តី អ.ប.ព. កាន់តែមានឆន្ទៈមោះមុតក្នុងការបំពេញភារកិច្ចជូន អ.ប.ព. ប្រកបដោយស្មារតីទទួលខុសត្រូវខ្ពស់។
លោកជំទាវ ចិន ច័ន្ទមុនី បានអំពាវនាវដល់មន្រ្តី អ.ប.ព. ទាំងអស់ ចូលរួមបង្កើតគ្រួសារ អ.ប.ព. ដែលពោរពេញដោយក្ដីស្រឡាញ់ និងមានសាមគ្គីភាពរឹងមាំ និងចូលរួមចំណែកកសាង និងថែរក្សាសន្តិភាព និងសន្តិសុខ ដើម្បីវិបុលភាពសង្គមជាតិ។

សម្តេចកិត្តិសង្គហបណ្ឌិត ម៉ែន សំអន បានសម្តែងនូវការអរគុណ និងកោតសរសើរ និងវាយតម្លៃខ្ពស់ចំពោះ កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្រ្តី និងជាប្រធាន អ.ប.ព. និងឯកឧត្តម យ៉ិន ទៀងពុទ្ធិរិទ្ធ អនុប្រធានទី១ នៃ អ.ប.ព. ដែលបានរៀបចំឱ្យមានកម្មវិធីនេះឡើង ដើម្បីផ្តល់ឱកាសដល់ថ្នាក់ដឹកនាំ និងមន្រ្តីជានារីរបស់ អ.ប.ព. បានជួបជុំគ្នានិងរឹតចំណងសាមគ្គីភាពនៅក្នុងអង្គភាព ទាំងពេលកន្លងមកក៏ដូចជាបច្ចុប្បន្ន កិត្តិនីតិកោសលបណ្ឌិត តែងតែផ្តល់ឱកាស លើកទឹកចិត្ត ឋានៈ តួនាទីដល់ថ្នាក់ដឹកនាំ និងមន្រ្តីជាស្រ្តីក្នុង អ.ប.ព. មានលទ្ធភាពគ្រប់គ្រាន់ក្នុងការបំពេញភារកិច្ចជូនអង្គភាព។

សម្តេចកិត្តិសង្គហបណ្ឌិត ម៉ែន សំអន បានបញ្ជាក់ថា ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់ សម្តេចតេជោ ហ៊ុន សែន ជាអគ្គមគ្គុទ្ទេសក៍ឯក និងប្រតិបត្តិករ «នយោបាយឈ្នះ-ឈ្នះ» បាននាំមកនូវសុខសន្តិភាព ឯកភាពជាតិពេញលេញ ធ្វើឲ្យប្រជាពលរដ្ឋរស់នៅប្រកបដោយភាពសុខដុមរមនា មានសុខសន្តិភាពពេញផ្ទៃប្រទេស និងមានការអភិវឌ្ឍយ៉ាងពិតប្រាកដលើគ្រប់វិស័យ។ រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយថាមពល និងក្លៀវក្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានបន្តថែរក្សាសន្តិភាព និងកំណត់ការលើកកម្ពស់សមភាពយេនឌ័រ និងការបង្កើនភាពអង់អាចរបស់ស្រ្តី និងក្មេងស្រីនៅគ្រប់វិស័យជាអាទិភាពនៅក្នុងរបៀបវារៈគោលនយោបាយ និងយុទ្ធសាស្រ្តបញ្ចកោណ ដំណាក់កាលទី១ តាមរយៈការពង្រឹងភាពជាពលរដ្ឋក្នុងសង្គមដែលមានអារ្យធម៌ខ្ពស់ ប្រកបដោយសីលធម៌ សមធម៌ និងបរិយាបន្ន ក្នុងនោះ «ស្រ្តី គឺជាស្នូល»។

ឆ្លៀតក្នុងឱកាសនេះ សម្តេចកិត្តិសង្គហបណ្ឌិត ម៉ែន សំអន បន្តអំពាវនាវដល់នារី អ.ប.ព ត្រូវបង្កើនការរួមសាមគ្គីគ្នា ការពារ និងលើកស្ទួយស្រ្តីរបស់យើង, រួមគ្នាគាំទ្រចំណាត់ការរាជរដ្ឋាភិបាល និងចែករំលែកនូវការរួមសុខរួមទុក្ខជាមួយកងកម្លាំងប្រដាប់អាវុធគ្រប់ប្រភេទ ដែលកំពុងឈរជើងនៅសមរភូមិមុខ ក៏ដូចជាក្រុមគ្រួសាររបស់ពួកគាត់ និងពលរដ្ឋភៀសសឹកផងដែរ។

ពិធីនេះបានប្រព្រឹត្តទៅក្នុងបរិយាកាសស្និទ្ធស្នាល និងកក់ក្តៅ ដែលបានបង្ហាញពីការយកចិត្តទុកដាក់ និងការលើកតម្កើងតួនាទីរបស់ស្រ្តីក្នុងការចូលរួមអភិវឌ្ឍសង្គម និងថែរក្សាសន្តិភាព៕