ឯកឧត្តម ប៉ា សុជាតិវង្ស ឧបត្ថម្ភថវិកាចំនួន ១០លានរៀល ជូនដល់សមាគមទ្រទ្រង់អក្សរសាស្ត្រនិងវប្បធម៌ខ្មែរ លើការបោះពុម្ពផ្សព្វផ្សាយសៀវភៅ "វចនវោហារ
=================
វិមានរដ្ឋសភា៖ ឯកឧត្តម ប៉ា សុជាតិវង្ស ប្រធានគណៈកម្មការ អប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ (គណៈកម្មការទី៧) នៃរដ្ឋសភា នាព្រឹកថ្ងៃទី១៦ ខែមីនា ឆ្នាំ២០២៦ បានអនុញ្ញាតឱ្យលោក ទូច គីមស៊ាងសមាជិកក្រុមប្រឹក្សាជាតិភាសាខ្មែរ ប្រធានសមាគមទ្រទ្រង់អក្សរសាស្ត្រនិងវប្បធម៌ខ្មែរ ចូលជួបពិភាក្សាការងារ នៅវិមានរដ្ឋសភា។

លោក ទូច គីមស៊ាង បានជម្រាបជូនថា គោលបំណងនៃការសុំចូលជួបពិភាក្សាការងារជាមួយ ឯកឧត្តមប្រធានគណៈកម្មការទី៧ នាពេលនេះ គឺដេីម្បីសុំការគាំទ្រផ្នែកថវិកាពី ឯកឧត្តម ប៉ា សុជាតិវង្ស លើការបោះពុម្ពផ្សព្វផ្សាយសៀវភៅ "វចនវោហារ"។

លោក ទូច គីមស៊ាង បានជម្រាបជូន ពាក្យពេចន៍ដែលមានប្រើនៅក្នុងវចនវោហារនេះ ជាពាក្យដែលប្រើញឹកញាប់ ប្រចាំថ្ងៃ របស់ប្រជាជនខ្មែរអ្នកកាន់ព្រះពុទ្ធសាសនា អ្នកខ្លះក៏យល់ន័យ អ្នកខ្លះទៀតក៏ពុំយល់ន័យនៃពាក្យដែលប្រើនោះដែរ ទើបក្រុមការងារសមាគមបានប្រើពេលវេលាយ៉ាងយូរសិក្សាស្រាវជ្រាវជ្រើសរើសមេពាក្យនិងសេចក្តីពន្យល់ជាច្រើនមកចងក្រងបង្កើតជាសៀវភៅនេះឡើង ដើម្បីងាយយល់ ស្រួលចាំ ឆាប់ចេះ ជាឧត្តមប្រយោជន៍ក្នុងការចូលរួមចំណែកជួយជំរុញលើកកម្ពស់ គុណតម្លៃអក្សរសាស្ត្រនិងពុទ្ធសាសនា។ វចនវោហារមានការសរសេរ អក្ខរាវិរុទ្ធភាសាខ្មែរ បាលីសំស្ក្រឹត ត្រឹមត្រូវ និងប្រាប់ចំនួនគោល អត្ថន័យ មេពាក្យច្បាស់លាស់។

ឯកឧត្តម ប៉ា សុជាតិវង្ស បានបង្ហាញនូវការគាំទ្រសមាគមទ្រទ្រង់អក្សរសាស្ត្រនិងវប្បធម៌ខ្មែរ ដែលបានខិតខំស្រាវជ្រាវក្នុងការបោះពុម្ពផ្សព្វផ្សាយសៀវភៅនេះឡេីង។

ឯកឧត្តមបានជំរុញឱ្យសមាគមបន្តសិក្សាស្រាវជ្រាវវិស័យព្រះពុទ្ធសាសនា ដោយធ្វេីការអភិរក្ស ប៉ុន្តែត្រូវធ្វេីការអភិវឌ្ឍលេីចំណុចអសកម្មមួយចំនួន ដេីម្បីជាផលប្រយោជន៍សម្រាប់សង្គមជាតិ។ ជាមួយគ្នានេះ ឯកឧត្តម ប៉ា សុជាតិវង្ស ចូលរួមឧបត្ថម្ភនូវថវិកាចំនួន១០លានរៀល។

លោក ទូច គីមស៊ាង បានថ្លែងអំណរគុណយ៉ាងជ្រាលជ្រៅបំផុតចំពោះ ឯកឧត្តម ប៉ា សុជាតិវង្ស ប្រធានគណៈកម្មការទី៧ នៃរដ្ឋសភា ដែលមានសទ្ធាជ្រះថ្លាជួយឧបត្ថម្ភផ្នែកថវិកា ក្នុងការចូលរួមបោះពុម្ពសៀវភៅ វចនវោហារ សម្រាប់ផ្សព្វផ្សាយការងារធម្មទាននេះក្នុងគោលបំណង លើកកម្ពស់គុណតម្លៃនៃព្រះពុទ្ធដីកាចំពោះពុទ្ធសាសនិកជនទាំងឡាយបានសិក្សាឈ្វេងយល់ពីពន្លឺនៃប្រាជ្ញាដែលជាហេតុនាំសង្គមជាតិយើងឱ្យបានសេចក្តីសុខសេចក្តីចម្រើន គង់វង្សស្ថិតស្ថេរតរៀងទៅ៕