ខេត្តកណ្តាល៖នៅថ្ងៃទី១៣ ខែមេសា ឆ្នាំ២០២៦ ផ្ទះមួយខ្នងដែលជាអំណោយដ៏ថ្លៃថ្លាបំផុតរបស់ សម្តេចតេជោ និងសម្តេចកិត្តិព្រឹទ្ធបណ្ឌិត ត្រូវបានឯកឧត្តម ភឺន ផល្លា ជំនួយការផ្ទាល់សម្ដេចអគ្គមហាសេនាបតីតេជោ ហ៊ុន សែន ប្រគល់ជូនលោកយាយចាស់ជរាទីទ័លក្រម្នាក់ នៅសង្កាត់ព្រែកអំពិល ក្រុងអរិយក្សត្រ មុនពិធីបុណ្យចូលឆ្នាំថ្មីប្រពៃណីជាតិខ្មែរ។

ដោយមានការសំណូមពរពីអាជ្ញាធរមូលដ្ឋាន និងបងប្អូនប្រជាពលរដ្ឋ ជូនដល់
ឯកឧត្តម ភឺន ផល្លា ជំនួយការផ្ទាល់សម្ដេចអគ្គមហាសេនាបតីតេជោ ហ៊ុន សែន
ពីទុក្ខលំបាក របស់លោកយាយម្នាក់ឈ្មោះ សំ ឡិត ដែលកំពុងរស់នៅក្នុងភូមិព្រែកក្របៅទី៣ សង្កាត់ព្រែកអំពិល ក្រុងអរិយក្សត្រ ខេត្តកណ្តាល ជាជនចាស់ជរា ទីទ័លក្រ គ្មានកូនចៅទីពឹង និងរស់នៅយ៉ាងកម្សត់ក្នុងផ្ទះចាស់ទ្រុឌទ្រោម ហើយនៅជុំវិញផ្ទះមានសុទ្ធតែភក់ជ្រាំ និងលិចទឹក ដែលធ្វើឱ្យគាត់រស់នៅយ៉ាងលំបាកបំផុត។

ដោយមើលឃើញពីការលំបាកនេះ ឯកឧត្តម ភឺន ផល្លា បានរៀបចំចាក់បំពេញដី និងសាងសង់ផ្ទះថ្មីមួយខ្នងយ៉ាងសមរម្យ ជូនលោកយាយ ដែលជាអំណោយដ៏ថ្លៃថ្លាបំផុតរបស់ សម្តេចតេជោ និងសម្តេចកិត្តិព្រឹទ្ធបណ្ឌិត។

ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរដែលខិតជិតមកដល់នេះ ឯកឧត្តម ភឺន ផល្លា ក៏បានទៅប្រគល់ផ្ទះថ្មីមួយខ្នងនេះដោយផ្ទាល់ ជូនដល់លោកយាយ និងបានរៀបចំជូននូវថវិកាមួយចំនួន ព្រមទាំងសម្ភារៈប្រើប្រាស់ប្រចាំថ្ងៃរួមមាន គ្រែ ពូក ខ្នើយ ចាន ឆ្នាំង និងសម្លៀកបំពាក់ផ្សេងៗ ជូនដល់លោកយាយ សម្រាប់ប្រើប្រាស់បន្ត និងដើម្បីជួយសម្រួលដល់ជីវភាពរបស់គាត់ផងដែរ។

ក្នុងនាមលោកយាយផ្ទាល់ និងប្រជាពលរដ្ឋនៅមូលដ្ឋាន បានសម្តែងនូវការគោរពថ្លែងអំណរគុណយ៉ាងជ្រាលជ្រៅបំផុតជូនចំពោះ សម្តេចតេជោ និងសម្តេចកិត្តិព្រឹទ្ធបណ្ឌិត ដែលជានិច្ចកាលតែងតែយកចិត្តទុកដាក់ និងផ្តល់ភាពកក់ក្តៅដល់បងប្អូនប្រជាពលរដ្ឋដែលខ្វះខាតនៅគ្រប់ទីកន្លែង។ ទន្ទឹមនឹងនេះ ប្រជាពលរដ្ឋក៏បានបួងសួងដល់គុណបុណ្យព្រះរតនត្រ័យ និងវត្ថុស័ក្តិសិទ្ធិក្នុងលោក ទេវតាឆ្នាំថ្មី សូមប្រោះព្រំសព្ទសាធុការពរជ័យបវរមហាប្រសើរជូន សម្តេចទាំងទ្វេ សូមសម្តេចមានសុខភាពល្អបរិបូរណ៍ បញ្ញាញាណភ្លឺថ្លា និងជន្មាយុយឺនយូរ ដើម្បីបន្តជាម្លប់សន្តិភាពដ៏ត្រជាក់ត្រជុំ និងជាទីសង្ឃឹមដ៏កក់ក្តៅបំផុតសម្រាប់ប្រជាពលរដ្ឋខ្មែរទូទាំងប្រទេស ព្រមទាំងសូមប្រកបដោយពុទ្ធពរទាំង ៤ប្រការ គឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕