ឯកឧត្តម គួច ចំរើន ប្រគល់ផ្ទះមនុស្សធម៌ ១ខ្នង ជាអំណោយរបស់សាខាកាកបាទក្រហមកម្ពុជាខេត្តខេត្តកណ្ដាល ជូនដល់ស្ត្រីមេម៉ាយក្រីក្រ នៅស្រុកពញាឮ
================
ខេត្តកណ្តាល៖ ព្រឹកថ្ងៃទី១៣ ខែមេសា ឆ្នាំ២០២៦នេះ ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត ដឹកនាំប្រតិភូសាខា និងអនុសាខាកាកបាទក្រហមកម្ពុជាស្រុក អញ្ជើញចូលរួមក្នុងពិធីប្រគល់ផ្ទះមនុស្សធម៌ ១ខ្នង លេខរៀងទី៧០ ជាអំណោយរបស់សាខាកាកបាទក្រហមកម្ពុជាខេត្តកណ្ដាល ជូនដល់ស្ត្រីមេម៉ាយក្រីក្រឈ្មោះ រ៉ាន់ វ៉ិត អាយុ ៤៦ឆ្នាំ មានសមាជិករស់នៅក្នុងបន្ទុកចំនួន ៤នាក់ នៅភូមិជ្រោយសំបូរ ឃុំកោះចិន ស្រុកពញាឮ ខេត្តកណ្តាល។

ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត បានសម្តែងនូវក្តីសោមនស្សរីករាយ និងការផ្តាំផ្ញើសួរសុខទុក្ខក្តីនឹករលឹក អាណិតអាសូរ និងស្រឡាញ់ចំពោះគ្រួសារស្ត្រីមេម៉ាយក្រីក្រនេះ ក៏ដូចជាបងប្អូនប្រជាពលរដ្ឋទាំងអស់ ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។ ទន្ទឹមនឹងនេះ ឯកឧត្តមបានផ្តាំផ្ញើដល់គ្រួសារងាយេងគ្រោះ សូមមេត្តាយកចិត្តទុកដាក់ គិតគូរពីបញ្ហាសុខភាព ដោយត្រូវបរិភោគទឹកស្អាត ទឹកដាំឆ្អិនល្អ ការរស់នៅមានអនាម័យល្អ ដោយប្រុងប្រយ័ត្នការពារជំងឺឆ្លង និងជំងឺមិនឆ្លងនានា ដើម្បីក្រុមគ្រួសារយើងមានសុភមង្គល។ ជាមួយគ្នានេះ ឯកឧត្ដមក៏បានគូសបញ្ជាក់ផងដែរថា៖ «កាកបាទក្រហមកម្ពុជា ទទួលបានថវិកាពីសប្បុរសជនគ្រប់មជ្ឈដ្ឋាន ជាពិសេសក្នុងឱកាសនៃទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា, ដូច្នេះអ្វីដែលកាកបាទក្រហមកម្ពុជាទទួលបាន គឺតែងតែយកទៅជួយសម្រាលនូវការលំបាកដល់បងប្អូនប្រជាពលរដ្ឋងាយរងគ្រោះបំផុត និងជនរងគ្រោះដោយសារគ្រោះមហន្តរាយផ្សេងៗដោយផ្ទាល់ដៃ ដែលនេះគឺជាការផ្សារភ្ជាប់រវាងសប្បុរសជនជាមួយនឹងអ្នកទទួលផលពីកាកបាទក្រហមកម្ពុជា នៅគ្រប់ទីកន្លែង និងគ្រប់ពេលវេលា»។

សូមបញ្ជាក់ថា ផ្ទះលេខរៀងទី៧០ ដែលជាអំណោយរបស់សាខាកាកបាទក្រហមកម្ពុជាខេត្តកណ្ដាល ខាងលើនេះ ចំណាយថវិកា ៤,៧០០ដុល្លារ (បួនពាន់ប្រាំពីររយដុល្លារអាម៉េរិក) មានទំហំ ៤ម៉ែត្រ x ៧ម៉ែត្រ ជញ្ជាំងស័ង្កសី កម្ពស់ផុតពីដី ដំបូលប្រក់សង្ក័សី មានបន្ទប់ទឹកមួយផងដែរ។

ជាកិច្ចឆ្លើយតបលោកស្រី រ៉ាន់ វ៉ិត តំណាងឱ្យក្រុមគ្រួសារងាយរងគ្រោះ បានថ្លែងអំណរគុណយ៉ាងជ្រាលជ្រៅបំផុតចំពោះឯកឧត្តម គួច ចំរើន ប្រធានគណៈកម្មាធិការសាខា ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានគិតគូរ និងជួយឧបត្ថម្ភជាបន្តបន្ទាប់ ជាពិសេសផ្ទះថ្មី១ខ្នងនេះ ដែលមិននឹកស្មានដល់ថានឹងមានជម្រកយ៉ាងសមរម្យស្រស់ស្អាតបែបនេះទេក្នុង១ជីវិតរបស់គាត់។ លោកស្រី បានសន្យានឹងខិតខំថែរក្សាផ្ទះថ្មីនេះឱ្យបានល្អ គង់វង្សយូរអង្វែង ជាពិសេសមិនធ្វើឱ្យអ្នកម្តាយមនុស្សធម៌ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏ដូចជាសប្បុរសជនដទៃទៀតខកបំណងឡើយ។ ដើម្បីជួយសម្រាលដល់ជីវភាពរស់នៅប្រចាំថ្ងៃ សាខាកាកបាទក្រហមកម្ពុជាខេត្ត បានផ្តល់ជូន អំណោយសម្រាប់ក្នុងពិធីប្រគល់ផ្ទះនេះរួមមាន៖ អង្ករ ២០០គីឡូក្រាម, មី ២កេស, ទឹកត្រី ២យួរ, ទឹកស៊ីអ៊ីវ ២យួរ, ត្រីខ ២យួរ, ទឹកបរិសុទ្ធ ២កេស, សម្ភារៈផ្ទះបាយ ១ឈុត, ឆៃប៉ូវ ២គីឡូក្រាម, ឃីត ២កញ្ចប់, សម្ភារៈផ្ទះបាយ ១ឈុត, និងថវិកា ១,០០០,០០០ លានរៀល (មួយលានរៀលគត់)៕