ឯកឧត្ដមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ អញ្ជើញដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត និងតាមរយៈប្រព័ន្ធ Zoom meeting ជាមួយរដ្ឋបាលឃុំសង្កាត់ ប៉ុស្តិ៍រដ្នបាល
===============
នារសៀលថ្ងៃចន្ទ ៤រោច ខែចេត្រ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៦ ខែមេសា ឆ្នាំ២០២៦ ឯកឧត្ដមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ បានអញ្ជើញដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត ដោយមានការចូលពីគណៈអភិបាលខេត្ត តំណាងសាលាតំបូងអយ្យការ អមសាលាដំបូងខេត្ត តំណាងកម្លាំងឈរជើងទាំងអស់ មន្ទីរអង្គភាពជំនាញជុំវិញខេត្ត អភិបាលក្រុងស្រុក និងតាមរយៈប្រព័ន្ធ Zoom meeting ជាមួយរដ្ឋបាលឃុំសង្កាត់ ប៉ុស្តិ៍រដ្ឋបាល សរុបប្រមាណ ៣៦៥ នាក់។

ក្នុងកិច្ចប្រជុំគណៈបញ្ជាការឯកភាពរដ្ឋបាលខេត្ត ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានដាក់ចេញនូវវិធានការក្តៅ និងបទបញ្ជាម៉ឺងម៉ាត់បំផុត ដើម្បីពង្រឹងសន្តិសុខ និងសណ្តាប់ធ្នាប់សាធារណៈ ក្នុងគោលដៅប្រែក្លាយខេត្តកំពង់ស្ពឺឱ្យទៅជាតំបន់ប្រកបដោយសុវត្ថិភាព និងការអភិវឌ្ឍ។
‎
‎ថ្លែងក្នុងឱកាសនោះដែរ ឯកឧត្តមបណ្ឌិត អភិបាលខេត្ត បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងធ្វើការងារអស់កម្លាំងកាយចិត្តរបស់មន្ទីរអង្គភាព អាជ្ញាធរ ក្រុង/ស្រុក ទាំងអស់ ឯកឧត្តមបានសង្កត់ធ្ងន់លើវិធានការក្តៅ ចំពោះក្រុមក្មេងទំនើងដែលបង្ហោះម៉ូតូបង្កការអសន្តិសុខតាមដងផ្លូវ ដោយបញ្ជាឱ្យសមត្ថកិច្ចឃាត់រក្សាទុកមធ្យោបាយចាប់ពី ៣ខែ ទៅ ៦ខែ ដោយគ្មានការលើកលែង ដើម្បីពង្រឹងការរាងចាល។ ត្រូវបន្តអនុវត្តគោលនយោបាយភូមិ-ឃុំ-សង្កាត់មានសុវត្ថិភាព បង្ក្រាបរាល់ទីតាំងល្បែងស៊ីសងខុសច្បាប់គ្រប់ប្រភេទ និងបង្ក្រាបករណីឆបោកតាមប្រព័ន្ធអនឡាញ (Scam Online)។
‎
‎ឯកឧត្តមបណ្ឌិតបានបន្តទៀតថា សូមឱ្យស្នងការដ្ឋាននគរបាលខេត្ត រឹតបន្តឹងការត្រួតពិនិត្យចរាចរណ៍ និងបន្តផ្សព្វផ្សាយអប់រំដល់បងប្អូនប្រជាពលរដ្ឋឱ្យប្រុងប្រយ័ត្នខ្ពស់ ដោយប្រកាន់ខ្ជាប់នូវពាក្យស្លោក ពិសាគ្រឿងស្រវឹង សូមកុំបើកបរ។ ឯកឧត្តមអភិបាលខេត្ត ក៏បានយកចិត្តទុកដាក់លើកិច្ចការពារបរិស្ថាន និងធនធានធម្មជាតិ ដោយជំរុញឱ្យបង្កើតសហគមន៍នេសាទតាមស្ទឹងព្រែកត្នោត និងរៀបចំប្រព័ន្ធគ្រប់គ្រងសំរាមនៅតាមបណ្តារោងចក្រសហគ្រាសឱ្យបានត្រឹមត្រូវ ដើម្បីលើកកម្ពស់សោភ័ណភាព និងសុខភាពសាធារណៈក្នុងខេត្តទាំងមូលផងដែរ៕