សម្ដេចធិបតី៖ ការកែច្នៃផលិតផលកសិកម្ម ដើម្បីបង្កើនតម្លៃបន្ថែម លើកកម្ពស់ការប្រកួតប្រជែង និងលើកស្ទួយជីវភាពកសិករ

នាព្រឹកថ្ងៃទី២៧ ខែឧសភា ឆ្នាំ២០២៦ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធជាផ្លូវការរោងចក្រផលិតកែច្នៃកៅស៊ូ របស់ក្រុមហ៊ុន គីមស៍ រ៉ាប់ប៊ើរ (ខេមបូឌា) នៅខេត្តត្បូងឃ្មុំ។

ថ្លែងក្នុងពិធី, សម្ដេចធិបតីបានអបអរសាទរចំពោះក្រុមហ៊ុន គីមស៍ រ៉ាប់ប៊ើរ (ខេមបូឌា) ដែលបានសម្រេចចិត្តដាក់ទុនវិនិយោគក្នុងការសាងសង់រោងចក្រផលិតកែច្នៃកៅស៊ូលើផ្ទៃដីជិត ១៥ ហិកតា ក្នុងទុនវិនិយោគប្រមាណ ៣០ លានដុល្លារ និងមានសមត្ថភាពផលិតជ័រកៅស៊ូ ១០ ម៉ឺនតោនក្នុងមួយឆ្នាំ។ សមិទ្ធផលនេះបានឆ្លុះបញ្ចាំងពីសារៈសំខាន់នៃកត្តាសុខសន្តិភាព និងទំនុកចិត្តរបស់វិនិយោគិនមកលើបរិយាកាសធុរកិច្ច​ និងវិនិយោគរបស់កម្ពុជា។ ជាមួយគ្នានេះ, សម្ដេចធិបតីបានសម្ដែងការគាំទ្រពេញទំហឹងចំពោះគម្រោងសាងសង់រោងចក្រទី២ ក្នុងខេត្តរតនគិរី របស់ក្រុមហ៊ុន ជាមួយនឹងទុនវិនិយោគ ៣០ លានដុល្លារបន្ថែមទៀត។

សម្តេចធិបតីបានគូសបញ្ជាក់បន្ថែមថា រោងចក្រផលិតកែច្នៃជ័រកៅស៊ូកម្រិតអន្តរជាតិនេះ នឹងចូលរួមចំណែកយ៉ាងធំធេងក្នុងការលើកកម្ពស់កម្រិតជីវភាពប្រជាពលរដ្ឋ តាមរយៈការបង្កើតការងារផ្ទាល់ប្រមាណ ៣០០ កន្លែង និងការងារប្រយោលជូនអ្នកចៀរជ័រកៅស៊ូប្រមាណជាង ៥ ម៉ឺនកន្លែង។ សមិទ្ធផលថ្មីនេះនឹងជួយពង្រីកទីផ្សារជ័រកៅស៊ូ, បង្កើតការងារ និងកាត់បន្ថយការពឹងផ្អែកលើឈ្មួញកណ្តាល។ ជាក់ស្ដែង, ចំណូលសរុបពីការលក់ផលិតផលកៅស៊ូក្នុងឆ្នាំ២០២៥ មានប្រមាណ ៨៣៣ លានដុល្លារ ដែលមានការកើនឡើងប្រមាណ ២៤% ធៀបនឹងឆ្នាំ២០២៤ ខណៈចំណូលពីការលក់ក្នុងស្រុកមានទំហំប្រមាណ ២២៣ លានដុល្លារ កើនឡើងរហូតដល់ ១៣១% ដែលឆ្លើយតបនឹងគោលដៅបំពេញតម្រូវការផលិតកម្មក្នុងស្រុកជាជាងការនាំចេញវត្ថុធាតុដើម។

សម្តេចធិបតីបានសង្កត់ធ្ងន់ថា ក្នុងក្របខ័ណ្ឌ នៃ «យុទ្ធសាស្រ្តបញ្ចកោណ-ដំណាក់កាលទី១» រាជរដ្ឋាភិបាលបានចាត់ទុកវិស័យឯកជនជាដៃគូសំខាន់មិនអាចខ្វះបាន ក្នុងការអភិវឌ្ឍសង្គម-សេដ្ឋកិច្ចកម្ពុជា ខណៈដែលការកែច្នៃផលិតផលកសិកម្ម ត្រូវបានចាត់ទុកជាការងារអាទិភាព។ ក្នុងន័យនេះ, រាជរដ្ឋាភិបាលបាននិងកំពុងខិតខំកែលម្អបរិយាកាសធុរកិច្ច និង វិនិយោគ នៅកម្ពុជា ដែលបានសម្រាលបន្ទុកអាជីវកម្ម ជាបន្តបន្ទាប់, និង សម្រួលប្រតិបត្តិការអាជីវកម្ម ជាលំដាប់ ។

សម្តេចធិបតីបានបន្ថែមថា ការកែច្នៃផលិតផលកសិកម្មជាការងារអាទិភាពដើម្បីបង្កើនតម្លៃបន្ថែម លើកកម្ពស់ភាពប្រកួតប្រជែង និងលើកស្ទួយជីវភាពប្រជាកសិករខ្មែរ។ ការអភិវឌ្ឍវិស័យកសិកម្មនៅកម្ពុជាមាន ៣ដំណាក់កាល៖ ទី១. ការផលិត និងនាំចេញនូវវត្ថុធាតុដើម; ទី២. ការផលិត និងនាំចេញនូវផលិតផលពាក់កណ្ដាលសម្រេច; និង ទី៣. ការនាំចេញផលិតផលសម្រេច ដែលរក្សានូវតម្លៃបន្ថែមនៅក្នុងប្រទេស។ ក្នុងន័យនេះ, រាជរដ្ឋាភិបាលបានដាក់ចេញនូវគោលនយោបាយជាតិអភិវឌ្ឍវិស័យកសិកម្ម ឆ្នាំ២០២២-២០៣០ និងផែនការយុទ្ធសាស្រ្តអភិវឌ្ឍកៅស៊ូធម្មជាតិឆ្ពោះទៅឆ្នាំ២០៣០ ដើម្បីប្រែក្លាយពីការនាំចេញវត្ថុធាតុដើមទាំងស្រុង ទៅជាការកែច្នៃក្នុងស្រុកជាផលិតផលពាក់កណ្ដាលសម្រេច និងផលិតផលសម្រេច។ លើសពីនេះ, សម្ដេចធិបតីបានប្រកាសយ៉ាងច្បាស់ថា “ដរាបណាគណបក្សប្រជាជនកម្ពុជានៅតែទទួលបានការគាំទ្រពីប្រជាជនឱ្យដឹកនាំប្រទេស រាជរដ្ឋាភិបាលនឹងនៅតែមិនយកពន្ធលើដីធ្លីកសិកម្មនោះទេ” ដើម្បីជាការសម្រាលបន្ទុក និងការពារផលប្រយោជន៍របស់កសិករ។

បន្ថែមលើនេះ, រាជរដ្ឋាភិបាលបានដាក់ចេញនូវយន្តការសាកល្បងក្នុងការលើកទឹកចិត្តដើម្បីជំរុញខ្សែច្រវាក់ផលិតក្នុងស្រុក លើផលិតផលមួយចំនួនដូចជា៖ ទឹកដោះគោ, មី និងស្ករស ជាដើម សំដៅកាត់បន្ថយការនាំចូល និងឈានទៅដល់ការពង្រីកផលិតកម្មក្នុងស្រុក ជាអតិបរមា។ រាជរដ្ឋាភិបាលបាននិងកំពុងជំរុញការពង្រីកផលិតកម្មក្នុងស្រុក តាមរយៈការជួយជ្រោមជ្រែងផ្នែកពន្ធ ឬការតភ្ជាប់។ ជាក់ស្ដែង, គោលគំនិតក្នុងការបង្កើត «សួនឧស្សាហកម្មស្វាយចន្ទី» មួយកន្លែងស្ថិតនៅខេត្តកំពង់ធំ គឺមានគោលដៅធំក្នុងការស្វែងរកទីផ្សារដែលមានតម្លៃខ្ពស់ និងមានស្ថិរភាព ដោយយកកសិករជាគោល និងផ្ដល់តម្លៃខ្ពស់ដល់កសិផល។ សម្ដេចធិបតីក៏បានណែនាំឱ្យក្រសួងកសិកម្ម រុក្ខាប្រមាញ់ និង នេសាទ, ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និង នវានុវត្តន៍, និង ក្រសួងពាណិជ្ជកម្ម សហការគ្នាសិក្សាខ្សែច្រវាក់ផលិតកម្ម និងការដឹកជញ្ជូន ដើម្បីបង្កើនផលិតភាព,កាត់បន្ថយថ្លៃដើមដាំដុះ និងធានាការតភ្ជាប់ទៅកាន់ទីផ្សារឱ្យកាន់តែមានតម្លៃថោក។

ទន្ទឹមនឹងការអភិវឌ្ឍវិស័យកសិកម្ម, កម្ពុជាបាននិងកំពុងកសាងសមត្ថភាពដឹកជញ្ជូនផលិតផលត្រង់ទៅកាន់ទីផ្សារអន្តរជាតិ តាមរយៈគម្រោងអភិវឌ្ឍន៍កំពង់ផែស្វយ័តក្រុងព្រះសីហនុ និងព្រែកជីកហ្វូណនតេជោ។ ពាក់ព័ន្ធនឹងគម្រោងព្រែកជីកហ្វូណនតេជោនេះ, សម្ដេចធិបតីបានបញ្ជាក់ថា យើងមិនត្រូវសម្លឹងត្រឹមតែផលចំណេញ ឬខាតផ្នែកធុរកិច្ចនោះទេ ប៉ុន្តែត្រូវសម្លឹងទៅដល់ផលប្រយោជន៍សេដ្ឋកិច្ចជារួម តាមរយៈការធានាប្រព័ន្ធធារាសាស្ត្រ និងការបង្កើតតំបន់សេដ្ឋកិច្ចពិសេសតាមបណ្ដោយព្រែកជីក។ ក្រៅពីនេះ, ការតភ្ជាប់ហេដ្ឋារចនាសម្ព័ន្ធរូបវ័ន្ដ នឹងប្រែក្លាយផ្ទៃដីកសិកម្មទៅជារោងចក្រឧស្សាហកម្មដើម្បីបង្កើតការងារ និងបង្កើនចំណូលដល់ពលរដ្ឋ ដោយដើរទន្ទឹមគ្នានឹងការធានាឱ្យបាននូវសន្តិសុខស្បៀងរបស់ជាតិផងដែរ។

ជាទីបញ្ចប់, សម្តេចធិបតីបានលើកទឹកចិត្តឱ្យក្រុមហ៊ុន គីមស៍ រ៉ាប់ប៊ើរ (ខេមបូឌា) ជំរុញការសាងសង់រោងចក្រ ផលិតកែច្នៃកៅស៊ូទី២ ក្នុងខេត្តរតនគិរី ជាមួយការប្តេជ្ញារបស់រាជរដ្ឋាភិបាល ក្នុងការបន្តកែលម្អបរិយាកាសធុរកិច្ច និង វិនិយោគ នៅកម្ពុជា ឱ្យមានភាពប្រកួតប្រជែង, ពិពិធភាព និង នវានុវត្តន៍ ព្រមទាំងបានអំពាវនាវដល់វិនិយោគិន, ធុរជន និងប្រជាពលរដ្ឋឱ្យក្តាប់យកឱកាសពីគម្រោងវិនិយោគនេះ និងគម្រោងវិនិយោគដទៃទៀត តាមរយៈ ការប្រតិបត្តិនូវការធ្វើអាជីវកម្ម និងការបំពេញការងារ ប្រកបដោយ សុចរិតភាព, សច្ចធម៌ និង គុណធម៌ ចំពោះដៃគូអាជីវកម្ម និងថៅកែ៕