អភិបាលខេត្តកំពង់ឆ្នាំង ​អញ្ជើញជាធិបតីបើកវេទិកាប្រចាំឆមាសឆ្នាំ២០២៦ ស្ដីពីពិគ្រោះយោបល់ភាពជាដៃគូរវាងរដ្ឋបាលខេត្ត និងអង្គការមិនមែនរដ្ឋាភិបាល សមាគម សហគមន៍នានា នៅក្នុងខេត្តកំពង់ឆ្នាំង
=================
នៅព្រឹក​ថ្ងៃទី១៩ ខែមិថុនា ឆ្នាំ២០២៦ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង រួម​ជាមួយ​ឯកឧត្តម សុីវ រុន ប្រធានក្រុមប្រឹក្សាខេត្ត បាន​អញ្ជើញជាធិបតីបើកវេទិកាប្រចាំឆមាសឆ្នាំ២០២៦ ស្ដីពីពិគ្រោះយោបល់ភាពជាដៃគូរវាងរដ្ឋបាលខេត្ត និងអង្គការមិនមែនរដ្ឋាភិបាល សមាគម សហគមន៍នានានៅក្នុងខេត្តកំពង់ឆ្នាំង នៅសាលប្រជុំ​សាលាខេត្ត។

កិច្ចប្រជុំ មានការអញ្ជើញ​ចូលរួមពី លោក សោម ធីសែន នាយកប្រតិបត្តិគ្រប់គ្រសេវាធនាគារសសធារណ: លោកជា សុខរិទ្ធិ អភិបាលរងខេត្ត កងកម្លាំង​​ឈរជើង​ក្នុង​ខេត្ត ថ្នាក់ដឹកនាំមន្ទីរអង្គភាពជុំវិញខេត្ត អាជ្ញាធរក្រុង ស្រុក និងតំណាងអង្គការសមាគមន៍ក្នុងខេត្តផងដែរ ។

ឯកឧត្តម ស៊ុន សុវណ្ណារិទ្ធិ អភិបាលខេត្ត បានគូស​បញ្ជាក់ថា អង្គការសង្គមស៊ីវិលទាំងក្នុងស្រុក និងក្រៅស្រុកបានដើរតួនាទីយ៉ាងសំខាន់ ក្នុងការផ្តល់និង គាំទ្រដល់សេវាសង្គមនៅតាមមូលដ្ឋាន និងសហគមន៍ដាច់ស្រយាល ជាមួយនឹងការ​ធ្វើសកម្មភាពនៅក្នុងវិស័យសំខាន់ៗ ពាក់ព័ន្ធនឹងសេដ្ឋកិច្ច សង្គមនៅក្នុងប្រទេសកម្ពុជា។ អង្គការសង្គមស៊ីវិលក៏ បានចូលរួមផងដែរ ក្នុងការតស៊ូមតិឲ្យមានកំណែទម្រង់ជាតិ ដើម្បីលើកកម្ពស់សុខភាព ការអប់រំ អភិបាលកិច្ច សិទ្ធិមនុស្ស ប្រព័ន្ធយុត្តិធម៌ ច្បាប់ សេវាសង្គម បរិស្ថាន សុខុមាលភាពស្ត្រី និងកុមារ។

ជាមួយ​គ្នានេះ តាមរយៈការអនុវត្តយុទ្ធសាស្ត្រចតុកោណទាំង៤ដំណាក់កាលកន្លងមក រាជរដ្ឋាភិបាល សម្រេចបាននូវ ស្ថេរភាពនយោបាយ កំណើនសេដ្ឋកិច្ច ការអភិវឌ្ឍធនធានមនុស្ស និងការកាត់បន្ថយ ភាពក្រីក្រ ជំរុញឲ្យប្រទេស កម្ពុជាក្លាយជាប្រទេសមានចំណូលមធ្យមកម្រិតទាបនៅឆ្នាំ២០១៥ ហើយឈានឆ្ពោះទៅជាប្រទេស មានចំណូលមធ្យមកម្រិតខ្ពស់នៅឆ្នាំ២០៣០ និងប្រទេសមាន ចំណូលខ្ពស់នៅឆ្នាំ២០៥០។

ដើម្បីសម្រេចឲ្យបាននូវគោលដៅនេះ កំណែទម្រង់នានាជាច្រើនត្រូវបាន រៀបចំឡើង និងកំពុងជំរុញការអនុវត្ត ពិសេសយុទ្ធសាស្ត្របញ្ចកោណដំណាក់កាលទី១ នីតិកាលទី៧ នៃរដ្ឋសភាដើម្បីកំណើនការងារ សមធម៌ ប្រសិទ្ធភាព និងចីរភាព កសាងមូលដ្ឋានគ្រឹះ ឆ្ពោះទៅ សម្រេចចក្ខុវិស័យកម្ពុជាឆ្នាំ២០៥០។ទន្ទឹមគ្នានេះផងដែរ ឯកសារទស្សនទាន និងគោលនយោបាយ នានា តែងបានរំលេចនូវតួអង្គអភិវឌ្ឍន៍ទាំងអស់ ដែលមិនអាចខ្វះបានហើយក្នុងនោះមានរួមបញ្ចូល តួនាទីរបស់អង្គការសង្គមស៊ីវិលផងដែរ។

ឯកឧត្តមអភិបាលខេត្ត បានបន្តថា បច្ចុប្បន្ន អង្គការសមាគម មិនមែនរដ្ឋាភិបាល ដែលធ្វើសកម្មភាពក្នុងភូមិសាស្ត្រខេត្តកំពង់ឆ្នាំងសរុបចំនួន ៣៤អង្គការ សមាគម ជាមួយគ្នានេះមានស្ថាប័នមីក្រូហិរញ្ញវត្ថុមានចំនួន១៤ ក្នុងនោះ ធនាគារមាន ចំនួន១២ គ្រឹះស្ថានមីក្រូហិរញ្ញវត្ថុមានចំនួន២ សហគមន៍នានាមានចំនួន ១៣៩ សហគមន៍ព្រៃឈើ ចំនួន១២ សហគមន៍នេសាទចំនួន៦៣ សហគមន៍ កសិកម្មចំនួន៦៤។

កិច្ចបញ្ចប់​ ឯកឧត្តមអភិបាលខេត្ត បានថ្លែងអំណរគុណ ចំពោះអង្គការសង្គមសុីវិល និងបានជម្រុញ​ឱ្យ​អង្គការ សមាគម សហគមន៍នានា​ដែលបាន​នឹងកំពុង​ធ្វើសកម្មភាព​ក្នុងខេត្ត​កំពង់ឆ្នាំង ត្រូវបន្តពង្រឹងកិច្ចសហប្រតិបត្តិការ ជាមួយគ្នារឱ្យកាន់តែជិតស្និទ្ធថែមទៀត ក្នុងភាពដៃគូដោយឆន្ទៈស្មោះត្រង់ ក៏ដូចជាការបន្តពង្រឹងសាមគ្គីភាពផ្ទៃក្នុង សំដៅចូលរួមចំណែកឱ្យកាន់តែសកម្មថែមទៀត ។