ប្រធានគណៈកម្មការទី៧ នៃរដ្ឋសភា បានវាយតម្លៃខ្ពស់ចំពោះកិច្ចខិតខំប្រឹងប្រែងបំពេញការងារ របស់ក្រសួងទេសចរណ៍ ដោយបានសម្រេចនូវ សមិទ្ធផលសំខាន់ៗជាច្រើនក្នុងក្របខ័ណ្ឌវិស័យទេសចរណ៍
==================
ភ្នំពេញ៖នៅថ្ងៃអង្គារ ៦កើត ខែបុស្ស ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៦ ខែមករា ឆ្នាំ២០២៤ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ បានអញ្ចើញដឹកនាំសហការី មកកាន់វិមានរដ្ឋសភា ដើម្បីជម្រាបជូនអំពីផែនការសកម្មភាព និងការអនុវត្តកម្មវិធីនយោបាយ និងយុទ្ធសាស្ត្របញ្ចកោណរបស់រាជរដ្ឋាភិបាលនីតិកាលទី៧ នៃរដ្ឋសភា និងប្រសិទ្ធភាពនៃការអនុវត្តច្បាប់ និងលិខិតបទដ្ឋានគតិយុត្តនានា ដែលក្រសួងត្រូវអនុវត្តបន្តសម្រាប់នីតិកាលទី៧ ជូនដល់គណៈកម្មការជំនាញទាំង១០របស់រដ្ឋសភា ដែលដឹកនាំដោយ ឯកឧត្តម ប៉ា សុជាតិវង្ស ប្រធានគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ (គណៈកម្មការទី៧) នៃរដ្ឋសភា។

ឯកឧត្តម ប៉ា សុជាតិវង្ស ប្រធានគណៈកម្មការទី៧ នៃរដ្ឋសភា បានជម្រាបជូនក្រសួងទេសចរណ៍ថា កិច្ចប្រជុំនាពេលនេះ មិនមែនជាការសួរដេញដោល ត្រួតពិនិត្យ និងអធិការកិច្ចលើក្រសួងនោះទេ គោលបំណងសំខាន់គឺដើម្បីឈ្វេងយល់នូវវិស័យការងារដែលជាសមត្ថកិច្ចទទួលខុសត្រូវរបស់គណៈកម្មការទី៧ នៃរដ្ឋសភា រួមសហការគ្នារវាងស្ថាប័ននីតិប្បញ្ញត្តិ និងស្ថាប័ននីតិប្រតិបត្តិ ជំរុញការអនុវត្តកម្មវិធីនយោបាយ និងយុទ្ធសាស្ត្របញ្ចកោណរបស់រាជរដ្ឋាភិបាលនីតិកាលទី៧ នៃរដ្ឋសភា។

ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ បានជម្រាបជូនគណៈកម្មការរដ្ឋសភា ថា រាជរដ្ឋាភិបាលនីតិកាលទី៧ ដែលដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបន្តដាក់វិស័យទេសចរណ៍ជាវិស័យអាទិភាពនៅ “យុទ្ធសាស្ត្របញ្ចកោណដំណាក់កាលទី១” ក្នុងបញ្ចកោណទី២ ការធ្វើពិពិធកម្ម សេដ្ឋកិច្ច និងការបង្កើនភាពប្រកួតប្រជែង បានបញ្ជាក់អំពីគោលដៅនៃវិស័យទេសចរណ៍កម្ពុជា ត្រង់មុំទី១ ចំណុចទី៥ “ការបន្តលើកកម្ពស់វិស័យទេសចរណ៍ ជាពិសេសការបន្តជំរុញការអភិវឌ្ឍទេសចរណ៍វប្បធម៌និងធម្មជាតិ ដោយបន្ថែមទេសចរណ៍បៃតងស្អាត និងវៃឆ្លាត ជំរុញការបង្កើតប្រភេទទេសចរណ៍ថ្មីៗ ដែលមានតម្លៃបន្ថែមខ្ពស់ និងទេសចរណ៍ធុរកិច្ច តាមរយៈការលើកកម្ពស់ការអនុវត្ត ក៏ដូចជាការរៀបចំ និងការដាក់ចេញគោលនយោបាយនិងផែនការមេអភិវឌ្ឍន៍វិស័យទេសចរណ៍នានា" ដែលជាការតម្រង់ទិសបន្តពីរាជរដ្ឋាភិបាលនាអាណត្តិកន្លងមក។

ឯកឧត្តមរដ្ឋមន្ត្រីបានបន្តថា រាជរដ្ឋាភិបាលបានដាក់ចេញនូវវិធានការសង្គមសេដ្ឋកិច្ចដែលជួយលើកស្ទួយវិស័យទេសចរណ៍កម្ពុជា មានដូចជាការសម្រួលការផ្តល់បដិសណ្ឋារកិច្ចតាមច្រកទ្វារព្រំដែន ការរៀបចំសម្រួលកែលម្អការបំពេញបែបបទពេលមកដល់ (E-arrival card) និងការផ្តល់សេវារបស់មន្ត្រីអន្តោប្រវេសន៍តាមគោលដៅនានា ការពង្រីកវិសាលភាពការប្រើប្រាស់បណ្ណព្រំដែន ការផ្តល់ហិរញ្ញប្បទានដល់ប្រតិបត្តិករទេសចរណ៍ និងកម្មវិធីផ្តល់កម្ចីដោយផ្ទាល់ជាមួយនឹងទឹកប្រាក់បឋមចំនួន ៥០លានដុល្លារអាមេរិក ការលើកទឹកចិត្តផ្នែកពន្ធដារ ការបញ្ចុះអត្រាថ្លៃលក់អគ្គិសនី ចំពោះប្រភេទពាណិជ្ជកម្ម អាជីវកម្ម និងសេវាកម្មបម្រើក្នុងវិស័យទេសចរណ៍ ក្នុងក្របខណ្ឌទូទាំងប្រទេស ។

ការលើកលែងការពិន័យអន្តរការណ៍ជាប្រាក់ ចំពោះការហួសសុពលភាពអជ្ញាបណ្ណមគ្គុទ្ទេសក៍ទេសចរណ៍ និងអ្នកបកប្រែភាសាបន្តពីមគ្គុទ្ទេសក៍ទេសចរណ៍ ជំរុញការតភ្ជាប់ជើងហោះហើរដោយត្រង់រវាងគោលដៅទេសចរណ៍ល្បីៗនៅក្នុងបណ្តាប្រទេសជិតខាងមកខេត្តសៀមរាប ស្របជាមួយនឹងការបើកព្រលានយន្តហោះថ្មីខេត្តសៀមរាប។ ជាមួយគ្នានោះ ឯកឧត្តមរដ្ឋមន្ត្រីក៏បានសំណូមពរឱ្យរដ្ឋសភាបន្តជួយគាំទ្រនូវគោលនយោបាយរបស់រាជរដ្ឋាភិបាលកម្ពុជា និងផែនការសកម្មភាពថ្មីៗរបស់ក្រសួងទេសចរណ៍។

ឯកឧត្តម ប៉ា សុជាតិវង្ស ប្រធានគណៈកម្មការទី៧ នៃរដ្ឋសភា បានវាយតម្លៃខ្ពស់ចំពោះកិច្ចខិតខំប្រឹងប្រែងបំពេញការងាររបស់ក្រសួងក្រោមការដឹកនាំផ្ទាល់ របស់ឯកឧត្តមរដ្ឋមន្ត្រី ដោយបានសម្រេចនូវ សមិទ្ធផលសំខាន់ៗជាច្រើនក្នុងក្របខ័ណ្ឌវិស័យទេសចរណ៍ ដែលបានបង្ហាញឱ្យឃើញពីភាពរឹងមាំ ចក្ខុវិស័យច្បាស់លាស់ បង្កើនប្រសិទ្ធភាពនៃការផ្សព្វផ្សាយទាក់ទាញនៃទេសចរណ៍កម្ពុជា ដែលជាកំលាំងចលករក្នុងកំណើនការអភិវឌ្ឍសង្គម និងសេដ្ឋកិច្ចកម្ពុជា ក្រោមការដឹកនាំរបស់រដ្ឋាភិបាលថ្មី ដែលជាមោទនភាពរបស់ប្រជាពលរដ្ឋកម្ពុជា ៕