លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អនុប្រធានអចិន្ត្រៃយ៍កាកបាទក្រហមកម្ពុជា អញ្ជើញជាអធិបតីភាពដ៏ខ្ពង់ខ្ពស់ដឹកនាំកិច្ចប្រជុំវឌ្ឍនភាពការងារយុវជនកាកបាទក្រហមកម្ពុជា និងទិសដៅការងារបន្ត
=============
នៅព្រឹកថ្ងៃសៅរ៍ ១៤រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៣ ខែសីហា ឆ្នាំ២០២៤នេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្ត្រៃយ៍កាកបាទក្រហមកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ និងដឹកនាំកិច្ចប្រជុំវឌ្ឍនភាពការងារយុវជនកាកបាទក្រហមកម្ពុជា និងទិសដៅការងារបន្ត ដោយមានការអញ្ជើញចូលរួមពីសំណាក់ថ្នាក់ដឹកនាំគណៈកម្មាធិការកណ្តាល ថ្នាក់ដឹកនាំអគ្គលេខាធិការដ្ឋាន មន្ត្រីទីស្នាក់ការកណ្តាល សាកលវិទ្យាធិការ ប្រធានកិត្តិយសក្លឹបយុវជន ទីប្រឹក្សាយុវជន និងយុវជនកាកបាទក្រហមកម្ពុជា មកពីគ្រឹះស្ថានឧត្តមសិក្សាចំនួន២៥ ក្នុងរាជធានីភ្នំពេញ ចូលរួមសរុបចំនួន ១៣១នាក់។

ក្នុងឱកាសនោះ លោកជំទាវបណ្ឌិត អនុប្រធានអចិន្ត្រៃយ៍ បានសម្តែងនូវក្តីសោមនស្សរីករាយ ដោយបានមកជួបជុំជាលើកទី១ ក្នុងកិច្ចប្រជុំពិនិត្យវឌ្ឍនភាពនៃការពង្រឹង និងពង្រីក កម្លាំងយុវជនកាកបាទក្រហមកម្ពុជា នៅតាមគ្រឹះស្ថានឧត្តមសិក្សាទាំង ២៥ ក្នុងរាជធានីភ្នំពេញ។ ជាមួយគ្នានេះ លោកជំទាវបណ្ឌិត បានពាំនាំនូវការផ្តាំផ្ញើសួរសុខទុក្ខពី សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយស និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះសមាជិកសមាជិកានៃអង្គប្រជុំទាំងមូល និងបានគូសបញ្ជាក់ពីភាពជាគំរូរបស់យុវជនកាកបាទក្រហមកម្ពុជា ដែលតែងតែមានមុខជានិច្ចក្នុងសកម្មភាពមនុស្សធម៌នៅតាមគ្រឹះស្ថានសិក្សា និងក្នុងកិច្ចការងារសង្គមជាតិ។

អង្គប្រជុំបានត្រងត្រាប់ស្តាប់ និងវាយតម្លៃខ្ពស់ចំពោះរបាយការណ៍សង្ខេបវឌ្ឍនភាពការងារយុវជន ៧ខែ ដើមឆ្នាំ២០២៤ និងទិសដៅការងារបន្ត ដែលអានដោយលោកជំទាវ ពុំ ចន្ទីនី អគ្គលេខាធិការ ដែល បានរំលេចឱ្យឃើញនូវការសម្រេចបានគិតមកដល់ថ្ងៃទី៣០ ខែកក្កដា កម្លាំងយុវជនកាកបាទក្រហមកម្ពុជាថ្មី បានកើនដល់ជាង ៣ម៉ឺននាក់ នៅតាមគ្រឹះស្ថានឧត្តមសិក្សាចំនួន ២៥ ក្នុងរាជធានីភ្នំពេញ និង គ្រឹះស្ថានមធ្យមសិក្សាចំនួន ៦០៣ នៅទូទាំងប្រទេស។ យុវជនទាំងនោះសុទ្ធតែបានទទួលការបណ្តុះបណ្តាលវគ្គមូលដ្ឋាន និងវិជ្ជាសង្គ្រោះបឋម, មានសកម្មភាពដ៏រស់រវើកក្នុងការងារមនុស្សធម៌ និងការងារសង្គម, មានការយល់ដឹងពីគោលការណ៍គ្រឹះ និងតម្លៃមនុស្សធម៌ និងទទួលបានការលើកកម្ពស់ភាពជាអ្នកដឹកនាំ និងក្នុងទំនាក់ទំនងសហប្រតិបត្តិការជាតិ អន្តរជាតិ។

លោកជំទាវបណ្ឌិត ប្រធានអង្គប្រជុំ បានគូសបញ្ជាក់ថា វឌ្ឍនភាពការងារទាំងអស់នេះ, ពិតណាស់ គឺ បានឆ្លុះបញ្ចាំងពីការប្តេជ្ញាចិត្ត, ឆន្ទៈនៃការលះបង់កម្លាំងកាយ/ចិត្ត ពេលវេលា ប្រកបដោយការទទួលខុសត្រូវខ្ពស់របស់ប្រធានគណៈកម្មាធិការសាខា ទាំង ២៥ រាជធានី/ខេត្ត ក៏ដូចជាឯកឧត្តម លោកជំទាវ សាកលវិទ្យាធិការ/នាយកវិទ្យាស្ថាន ដែលជាប្រធានកិត្តិយសក្លឹប ក្នុងការខិតខំប្រឹងប្រែង ឆ្លើយតបបានយ៉ាងសក្តិសម ទៅនឹងការយកចិត្តទុកដាក់ផ្តល់សារៈសំខាន់ទៅលើកម្លាំងយុវជន ដែលជាអ្នកស្ម័គ្រចិត្តវ័យក្មេង និងគម្រូដល់យុវជនដទៃទៀត។

បន្ទាប់ពីបានពិភាក្សា បញ្ចេញមតិយោបល់ និងមានសំណូមពរមួយចំនួនពីសំណាក់អង្គប្រជុំ ជាពិសេសឯកឧត្តម លោកជំទាវ សាកលវិទ្យាធិការរួចមក, និងផ្អែកលើទិសដៅការងារបន្ត លោកជំទាវបណ្ឌិត អនុប្រធានអចិន្ត្រៃយ៍ ក៏បានផ្តល់អនុសាសន៍មួយចំនួនដល់អង្គប្រជុំដើម្បីបន្តអនុវត្តការងារប្រកបដោយស្មារតីទទួលខុសត្រូវខ្ពស់ ជាពិសេសក្នុងការពង្រឹងតួនាទីស្នូលរបស់យុវជន ដើម្បីសម្រេចបានសមិទ្ធផលធំធេងជាបន្តបន្ទាប់ក្នុងបុព្វហេតុមនុស្សធម៌៕