លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនិតិជន អញ្ចើញចូលរួមក្នុងកិច្ចប្រជុំស្តីពីការពង្រឹងកិច្ចសហប្រតិបត្តិការជាមួយអង្គការមិនមែនរដ្ឋាភិបាលជាតិ-អន្តរជាតិ ដើម្បីប្រយុទ្ធប្រឆាំងអំពើជួញដូរមនុស្សគ្រប់ទម្រង់
=================
ភំ្នពេញ ៖នៅថ្ងៃពុធ ៩កើត ខែអស្សុជ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី០១ ខែតុលា ឆ្នាំ២០២៥ លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនិតិជន បានអញ្ចើញចូលរួមក្នុងកិច្ចប្រជុំ ស្តីពី ការពង្រឹងកិច្ចសហប្រតិបត្តិការជាមួយអង្គការមិនមែនរដ្ឋាភិបាលជាតិ-អន្តរជាតិ ដើម្បីប្រយុទ្ធប្រឆាំងអំពើជួញដូរមនុស្សគ្រប់ទម្រង់ ក្រោមអធិបតីភាពឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នៅអគ្គស្នងការដ្ឋាននគរបាលជាតិ ។

ពិធីនេះ ក៏មានការអញ្ជើញចូលរួមពី លោកឧត្តមសេនីយ៍ទោ ស៊ូ ប៊ុនសួ អនុប្រធានសេនាធិការដ្ឋាន, លោកឧត្តមសេនីយ៍ត្រី តាន់ វណ្ណារិទ្ធ អនុប្រធាននាយកដ្ឋានកណ្តាលនគរបាលយុត្តិធម៌ លោកឧត្តមសេនីយ៍ វរសេនីយ៍ អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន និងលោក លោកស្រីតំណាងអង្គការមិនមែនរដ្ឋាភិបាលជាតិ-អន្តរជាតិ សរុបចំនួន៧៥រូប ស្រី១៥រូប។

បន្ទាប់ពីបានស្តាប់របាយការណ៍របស់ លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន រួចមក ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ បានមានប្រសាសន៍កោតសរសើរ និងឯកភាពចំពោះរបាយការណ៍លោកប្រធាននាយកដ្ឋាន និងបានគូសបញ្ជាក់អំពីគោលបំណង នៃកិច្ចប្រជុំនេះ គឺដើម្បីពង្រឹងកិច្ចសហប្រតិបត្តិការក្នុងការជួយគ្នាទៅវិញទៅមក លើវិស័យប្រឆាំងអំពើជួញដូរមនុស្សគ្រប់ទម្រង់នៅកម្ពុជា ព្រោះកិច្ចប្រជុំនាពេលនេះក៏ជាពេលមុនៗដែលយើងធ្លាប់បានជួបប្រជុំជារៀងរាល់៣ខែម្តងមកហើយ។

ឯកឧត្តមអគ្គស្នងការរង ក៏បានអនុញ្ញាតឲ្យ តំណាងអង្គការមិនមែនរដ្ឋាភិបាលជាតិ-អន្តរជាតិ ចូលរួមជាយោបល់ និងចែករំលែកចំណេះដឹង បទពិសោធន៍ ក្នុងគោលបំណងរកដំណោះស្រាយរួមគ្នាក្នុងការប្រយុទ្ធប្រឆាំងអំពើជួញដូរមនុស្សគ្រប់ទម្រង់នៅកម្ពុជា។

ក្រោយពីការស្តាប់យោបល់ ជាចំណេះដឹង ជាបទពិសោធន៍ អំពីផលលំបាក បញ្ហាប្រឈម និងសំណូមពរ របស់តំណាងអង្គការមិនមែនរដ្ឋាភិបាលជាតិ-អន្តរជាតិរួចមក ឯកឧត្តមអគ្គស្នងការរង មានប្រសាសន៍បន្ថែមថា ពាក់ព័ន្ធកិច្ចសហប្រតិបត្តិការខាងលើ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ តែងតែណែនាំដល់នគរបាលជំនាញ ក៏ដូចជា ឯកឧត្តមផ្ទាល់ជារៀងដ៏រាបតាំងពីលើកមុនៗមកហើយ ទទួលបានលទ្ធផលយ៉ាងល្អប្រសើរជាមួយអង្គការដៃគូពាក់ព័ន្ធ។

ឯកឧត្តម ឧត្តមសេនីយ៍ឯក អគ្គស្នងការរងក៏បានបញ្ជាក់បន្ថែម ដើម្បីពង្រឹងការងារប្រមូលព័ត៌មាន ដែលចាំបាច់យើងត្រូវទទួលបានព័ត៌មានពីគ្រប់មជ្ឈដ្ឋាន ទាំងព័ត៌មានចំហ និងព័ត៌មានសំងាត់។ ជាពិសេសបច្ចុប្បន្ននេះ ព័ត៌មានតាមបណ្តាញសង្គម កំពុងតែពេញនិយម ហើយត្រូវមានការចូលរួមកិច្ចសហការពីអង្គការដៃគូពាក់ព័ន្ធ ពីសមត្ថកិច្ចជំនាញ អាជ្ញាធរពាក់ព័ន្ធ និងការកំណត់អត្តសញ្ញាណជនរងគ្រោះ ដើម្បីរកធាតុផ្សំនៃបទល្មើសជួញដូរមនុស្ស ស្រាវជ្រាវបង្ក្រាបអ្នកដែលប្រព្រឹត្តិបទល្មើស និងអ្នកពាក់ព័ន្ធទៅតាមនីតិវិធីច្បាប់។

ឆ្លៀតក្នុងឱកាសនេះ ឯកឧត្តម ឧត្តមសេនីយ៍ឯក ជីវ ផល្លី ក៏បាននាំយកនូវការផ្តាំផ្ញើសាកសួរសុខទុក្ខពីសំណាក់ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ ជូនដល់អង្គការមិនមែនរដ្ឋាភិបាលជាតិ-អន្តរជាតិ ដែលមានជំនាញប្រឆាំងការជួញដូរមនុស្ស និងការពារអនីតិជន ព្រមទាំងអង្គការដៃគូពាក់ព័ន្ធដែលមានវត្តមាននៅទីនេះ និងអ្នកដែលធ្វើកិច្ចសហការ ហើយមិនបានចូលរួមនៅពេលនេះ ដោយសារតែជាប់បេសកកម្ម និងសូមឲ្យបន្តកិច្ចសហការបន្តទៀតក្នុងនាមដៃគូប្រយុទ្ធប្រឆាំងអំពើជួញដូរមនុស្សគ្រប់ទម្រង់នៅកម្ពុជា៕