ឯកឧត្តម ម៉ក់ ជីតូ រដ្ឋលេខាធិការក្រសួងមហាផ្ទៃ អញ្ចើញជាអធិបតីភាពដឹកនាំកិច្ចប្រជុំស្តីពីការពង្រឹងវិធានការ បង្ការ ទប់ស្កាត់ បង្ក្រាបគ្រឿងញៀនឆ្លងដែន និងផ្សព្វផ្សាយផែនការអនុវត្តបន្ត
===============
នៅថ្ងៃពុធ ៧រោច ខែមាឃ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៩ ខែកុម្ភៈ ឆ្នាំ២០២៥ ឯកឧត្តម ម៉ក់ ជីតូ រដ្ឋលេខាធិការក្រសួងមហាផ្ទៃ និងជាប្រធានគណៈកម្មការបង្ការ ទប់ស្កាត់ និងបង្ក្រាបគ្រឿងញៀន តាមបណ្តាខេត្តជាប់ព្រំដែន និងតាមច្រកទ្វារព្រំដែន ដល់មន្រ្តីរាជការនៃអង្គភាពក្រោមឱវាទក្រសួងមហាផ្ទៃ បានអញ្ចើញជាអធិបតីភាពដឹកនាំកិច្ចប្រជុំស្តីពីការពង្រឹងវិធានការ បង្ការ ទប់ស្កាត់ បង្ក្រាបគ្រឿងញៀនឆ្លងដែន តាមបណ្តាខេត្តជាប់ព្រំដែន ច្រកទ្វារព្រំដែន និងផ្សព្វផ្សាយផែនការអនុវត្តបន្ត។ កិច្ចប្រជុំនេះបានប្រព្រឹត្តទៅនៅសាលាខេត្តបាត់ដំបង។

ដោយមានការអញ្ចើញចូលរួមពី ឯកឧត្តម នាយឧត្តមសេនីយ៍ មាស វីរិទ្ធ អគ្គលេខា នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន, ឯកឧត្តម នាយឧត្តមសេនីយ៍ ឃុន សំបូរ អគ្គនាយករង នៃអគ្គនាយកដ្នានអន្តោប្រវេសន៍, ឯកឧត្តម អភិបាលរង នៃគណៈអភិបាលខេត្តបាត់ដំបង, ប៉ៃលិន និងបន្ទាយមានជ័យ, ព្រះរាជអាជ្ញារង នៃអយ្យការអមសាលាដំបូងខេត្តបាត់ដំបង, ប៉ៃលិន និងបន្ទាយមានជ័យ ,ថ្នាក់ដឹកនាំមន្ទីរប្រឆាំងគ្រឿងញៀន, ថ្នាក់ដឹកនាំអាវុធហត្ថ ព្រមទាំងមន្រ្តីពាក់ព័ន្ធជាច្រើនរូបទៀត។

លោកឧត្តមសេនីយ៍ទោ អ៊ីន ស៊ុង នាយករងមន្ទីរប្រឆាំងគ្រឿងញៀន បានឡើងរាយការណ៍ ពីលទ្ធផលកិច្ចសហប្រតិបត្តិការបង្រ្កាបគ្រឿងញៀនប្រចាំឆ្នាំ ២០២៤ បានឱ្យដឹងថា ការបង្រ្កាបគ្រឿងញៀនសរុបក្នុងឆ្នាំ២០២៤ មានចំនួន ១០,៦៣០ ករណី ចាប់ខ្លួនជនសង្ស័យ ២៧,០៧១នាក់ ចាប់យកវត្ថុតាងគ្រឿងញៀន ១៤តោន ៩០៩ គីឡូក្រាម ៣៧៩.៧២ក្រាម។

ជាកិច្ចបន្ទាប់ ថ្នាក់ដឹកនាំគណៈកម្មការត្រួតពិនិត្យគ្រឿងញៀន, ស្នងការដ្ឋាននគរបាល, កងរាជអាវុធហត្ថ និងមន្រ្តីពាក់ព័ន្ធក្នុងខេត្តបាត់ដំបង ប៉ៃលិន បន្ទាយមានជ័យ បានរាយការណ៍ពីសភាពការណ៍គ្រឿងញៀន បញ្ហាប្រឈម និងសំណូមពរក្នុងខេត្តរបស់ខ្លួនរួច ឯកឧត្តម បណ្ឌិត ម៉ក់ ជីតូ រដ្ឋលេខាធិការក្រសួងមហាផ្ទៃ បានធ្វើការវាយតម្លៃខ្ពស់ និងកោតសរសើរពីលទ្ធផលប្រតិបត្តិការរបស់អង្គភាពពាក់ព័ន្ធ ដែលជាសមាជិកគណៈកម្មការបង្ការ ទប់ស្កាត់ និងបង្ក្រាបគ្រឿងញៀន តាមបណ្តាខេត្តជាប់ព្រំដែន និងតាមច្រកទ្វារព្រំដែន ដែលបានខិតខំប្រឹងប្រែងបំពេញការងារកន្លងមក សំដៅបង្ការ ទប់ស្កាត់ និងបង្រ្កាបបទល្មើសគ្រឿងញៀន។

ឯកឧត្តម បណ្ឌិត រដ្ឋលេខាធិការ ក៏បានណែនាំដល់គណៈកម្មការត្រួតពិនិត្យគ្រឿងញៀនខេត្ត ទាំងបី ឲ្យបន្តពង្រឹង និងអនុវត្តគោលនយោបាយភូមិឃុំមានសុវត្ថភាព។ ក្នុងនោះឯកឧត្តម ក៏បានពន្យល់ពីអត្ថប្រយោជន៍នៃការប្រើប្រាស់ App nodrug និងជំរុញដល់គណៈកម្មការត្រួតពិនិត្យគ្រឿងញៀនខេត្តទាំងបី ជួយផ្សព្វផ្សាយឲ្យបានស៊ីជម្រៅជាមួយប្រជាពលរដ្ឋដើម្បីបន្ថែមការយល់ដឹងអំពីគ្រោះថ្នាក់ការប្រើប្រាស់គ្រឿងញៀន និងការរាយការណ៍ពីបទល្មើសគ្រឿងញៀន។ លើសពីនេះទៀតត្រូវ បំប៉នសមត្ថភាពមន្រ្តីជំនាញ អំពីនីតិវិធីច្បាប់ និងការអនុវត្តវិន័យ។

ឯកឧត្តម ក៏បានបញ្ជាក់បន្ថែម អោយបន្តកិច្ចសហការល្អជាមួយរាល់អង្គភាពពាក់ព័ន្ធ ជាពិសេសពង្រឹងកិច្ចសហប្រតិបត្តិការអន្តរជាតិ ជាមួយប្រទេសជាប់ព្រំដែន សំដៅ បង្ការ ទប់ស្កាត់ និងបង្រ្កាបចរាចរណ៍គ្រឿងញៀនតាមបណ្តាច្រកទ្វាព្រំដែន។

នៅថ្ងៃបន្ទាប់ ថ្ងៃទី ២០ និង២១ ខែកុម្ភៈ ឆ្នាំ២០២៥ ឯកឧត្តមបណ្ឌិត ម៉ក់ ជីតូ បានដឹកនាំប្រតិភូគណៈកម្មការបង្ការ ទប់ស្កាត់ និងបង្ក្រាបគ្រឿងញៀន តាមបណ្តាខេត្តជាប់ព្រំដែន និងតាមច្រកទ្វារព្រំដែន ចុះពិនិត្យស្ថានភាពជាក់ស្តែងតាមបណ្តាច្រកទ្វាព្រំដែនអន្តរជាតិ និងច្រកទ្វាតំបន់ព្រំដែន ក្នុងខេត្តប៉ៃលិន បាត់ដំបង និងបន្ទាយមានជ័យ ដើម្បីពង្រឹងវិធានការ បង្ការ ទប់ស្កាត់ បង្ក្រាបគ្រឿងញៀនឆ្លងដែន តាមបណ្តាខេត្តជាប់ព្រំដែន ច្រកទ្វារព្រំដែន និងផ្សព្វផ្សាយផែនការអនុវត្តបន្ត៕