នៅនាយកដ្ឋានប្រឆាំងការជួញដូរមនុស្ស និងការពារអនីតិជន បានបើកវគ្គបណ្តុះបណ្តាលស្តីពី ការកំណត់អត្តសញ្ញាណជនរងគ្រោះ ដោយអំពើជួញដូរមនុស្ស ការកសាងសំណុំរឿង និងការបញ្ជ្រាបការងារយេនឌ័រ

រាជធានីភ្នំពេញ៖នៅថ្ងៃទី២៦ ខែឧសភា ឆ្នាំ២០២៥ នៅនាយកដ្ឋានប្រឆាំងការជួញដូរមនុស្ស និងការពារអនីតិជន បានបើកវគ្គបណ្តុះបណ្តាលស្តីពី ការកំណត់អត្តសញ្ញាណជនរងគ្រោះ ដោយអំពើជួញដូរមនុស្ស ការកសាងសំណុំរឿង និងការបញ្ជ្រាបការងារយេនឌ័រ ក្រោមអធិបតីភាពឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ តំណាងដ៏ខ្ពង់ខ្ពស់ឯកឧត្តម នាយឧត្តសេនីយ៍ ស ថេត អគ្គស្នងការនគរបាលជាតិ និងលោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន។

វគ្គបណ្តុះបណ្តាលនេះ មានរយះពេល ០៣ថ្ងៃ ចាប់ពីថ្ងៃទី ២៦ ដល់ថ្ងៃទី២៨ ខែឧសភា ឆ្នាំ២០២៥ ដោយមានសិក្ខាកាមចូលរួមចំនួន ៦០នាក់ និងជាគ្រូឧទ្ទេសផ្ទាល់ ដោយឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ។ ដោយមានការចូលរួមពីលោក-លោកស្រីឧត្តមសេនីយ៍ វរសេនីយ៍អនុប្រធាននាយកដ្ឋាន លោក-លោកស្រីវរសេនីយ៍ នាយ-នាយរងការិយាល័យ ជាសិក្ខាកាមចូលរួមចំនួន ៦០នាក់។

ឯកឧត្តម ឧត្តមសេនីយ៍ឯក អគ្គស្នងការរងបន្តថា វគ្គបណ្តុះបណ្តាលនេះ គឺដើម្បីពង្រឹងសមត្ថភាពដល់មន្រ្តីអនុវត្តច្បាប់នៅតាមជំនាញនីមួយៗឲ្យប្រាកដថា ការអនុវត្តនីតិវិធីរបស់យើង គឺពិតជាបានត្រឹមត្រូវគ្រប់ជ្រុងជ្រោយ និងឆ្លើយតបទៅនឹងស្ថានភាពបច្ចុប្បន្ន។ ក្នុងនោះពាក់ព័ន្ធទៅនឹងការកំណត់អត្តសញ្ញាណរូបភាពរងគ្រោះក្នុងអំពើជួញដូរមនុស្សជាការចាំបាច់ និងសំខាន់ ដោយសារតែការកំណត់អត្តសញ្ញាណពេលខ្លះជួបស្ថានភាពស្មុគ្រស្មាញ ហើយទាមទារឲ្យអភិវឌ្ឍន៍ខ្លួនជាបន្តបន្ទាប់ ព្រោះអំពើជួញដូរមនុស្សពាក់ព័ន្ធទៅនឹងការប្រើប្រាស់តាមប្រព័ន្ធបច្ចេកវិទ្យា គឺមានភាពស្មុគ្រស្មាញសម្រាប់ការស្វែងរកភស្តុតាង។ ប្រសើនបើការរកភស្តុតាងមិនមានមូលដ្ឋាន ដើម្បីកំណត់ថាជាបទល្មើសនោះយើងប្រឈមទៅនឹងនីតិវិធីតុលាការ។

ឯកឧត្តម ឧត្តមសេនីយ៍ឯក ជីវ ផល្លី បន្តថា ដោយសារបច្ចុប្បន្ននេះ យើងធ្វើកិច្ចសហការជាមួយសមត្ថកិច្ចពាក់ព័ន្ធ ចំណុះឲ្យនាយកដ្ឋានកណ្តាលសន្តិសុខ ការកំណត់អត្តសញ្ញាណរបស់យើង គឺផ្អែកលើមន្រ្តីនគរបាលជំនាញ កាលណាជំនាញរកមិនឃើញធាតុផ្សំតាមច្បាប់ជាតិ-អន្តរជាតិទេ នោះយើងមិនត្រូវបានយកមកនាយកដ្ឋាន និងជាបន្ទុករបស់ជំនាញប្រឆាំងការជួញដូរមនុស្ស និងការពារអនីតិជន ដើម្បីចាត់វិធានការបន្តនីតិវិធីច្បាប់នោះទេ តែបើយើងរកឃើញថា មានធាតុផ្សំហើយ នោះចាំបាច់ត្រូវតែជាការទទួលខុសត្រូវរបស់មន្រ្តីនគរបាលជំនាញរបស់យើងពាក់ព័ន្ធទៅនឹងការត្រូវប្រគល់-ទទួលជនរងគ្រោះ ការបន្តផ្តល់សេវាសង្គម និងសេវាផ្លូវច្បាប់ ដោយមន្រ្តីសង្គមនិតិរដ្ឋ ហើយមន្រ្តីនគរបាលយុត្តិធម៌របស់យើងត្រូវដឹងពីបញ្ហាការពារ ចូលរួមកិច្ចសហការ តាំងពីដំណាក់កាលអយ្យការ ដំណាក់កាលស៊ើបសួរ និងដំណាក់កាលជំនុំជំរះ។ បន្ថែមពីលើនេះ ពាក់ព័ន្ធទៅនឹងជនរងគ្រោះស្ថិតនៅក្នុងមណ្ឌល ដែលត្រូវការចូលរួមសហការការពារ និងតាមដានពីមន្រ្តីជំនាញរបស់យើងផងដែរ ហើយយើងត្រូវស្រាវជ្រាវចាប់ខ្លួនជនល្មើសយកមកផ្តន្ទាទោសតាមច្បាប់។

លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន មានប្រសាសន៍ថា ដោយមើលឃើញថា ការពង្រឹងសមត្ថភាពដល់មន្រ្តីនគរបាលប្រឆាំងការជួញដូរមនុស្ស និងការពារអនីតិជន គឺជាកត្តាសំខាន់ នាយកដ្ឋានប្រឆាំងការជួញដូរមនុស្ស និងការពារអនីតិជន បានរៀបចំវគ្គបណ្តុះបណ្តាល ស្តីពីការកំណត់អត្តសញ្ញាណជនរងគ្រោះ ដោយអំពើជួញដូរមនុស្ស ការកសាងសំណុំរឿង និងការបញ្ជ្រាបការងារយេនឌ័រ ដល់ថ្នាក់ដឹកនាំនាយកដ្ឋានប្រឆាំងការជួញដូរមនុស្ស និងការពារអនីតិជន ដោយមាន ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ ជាគ្រូឧទ្ទេសផ្ទាល់នៅពេលនេះ។ អាស្រ័យហេតុនេះ សូម អស់លោក-លោកស្រី ឧត្តមសេនីយ៍ វរសេនីយ៍ ស្តាប់ការពន្យល់ណែនាំដោយយកចិត្តទុកដាក់ និងមានចំងល់ត្រូវជជីកសួរនាំ៕