ឯកឧត្តមអភិបាលខេត្តកណ្ដាល ស្នើដល់ក្រុម​ការងារ​បច្ចេកទេស​ និង​អាជ្ញាធរមូលដ្ឋាន ត្រូវ​ខិតខំយកចិត្តទុកដាក់​ផ្សព្វផ្សាយ​ ពន្យល់​ប្រជាពលរដ្ឋ​ អំពីអត្ថប្រយោជន៍នៃគម្រោងសាងសង់ព្រែកជីកហ្វូណនតេជោ និង​ការកែសម្រួលប្លង់បច្ចេកទេសរបស់គម្រោង អោយបានយល់ច្បាស់បន្ថែមទៀត​
================
ការស្នើនេះធ្វើឡើង នារសៀលថ្ងៃទី៣០ ខែឧសភា ឆ្នាំ២០២៥ ក្នុងកិច្ចប្រជុំពិនិត្យការអនុវត្តការសាងសង់គម្រោងព្រែកជីកហ្វូណនតេជោ ក្នុងភូមិសាស្ត្រខេត្តកណ្ដាល ក្រោមអធិបតីភាព ឯកឧត្ត ម៉ក់ ស៊ីដេត អនុរដ្ឋលេខាធិការក្រសួងសាធារណការ និងដឹកជញ្ជូន និងឯកឧត្តម គួច ចំរើន អភិបាល នៃគណៈអភិបាលខេត្តកណ្តាល ដោយមានការអញ្ជើញចូលរួមពីក្រុមការងារអន្តរក្រសួង កងកម្លាំងទាំងបី មន្ទីរអង្គភាពពាក់ព័ន្ធ និងអាជ្ញាធរមូលដ្ឋាន។

ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល បន្តថា៖ យើងទាំងអស់គ្នាពិតជាមានភ័ព្វសំណាងដែលបានចូលរួមជាមួយរាជរដ្ឋាភិបាល ក្នុងការកសាងនូវព្រែកជីកហ្វូណនតេជោ ដែលជាសមិទ្ធផលប្រវត្តិសាស្ត្រមួយនេះ ដែលយើងទាំងអស់គ្នាត្រូវរួមគ្នាក្នុងការដោះស្រាយ ហើយចាត់ទុកថាកិច្ចការទាំងនេះគឺជាកិច្ចការដែលសំខាន់ និងមានអាទិភាពជាងគេមួយដែលត្រូវតែខិតខំរួមគ្នាដោះស្រាយឱ្យគម្រោងព្រែកជីកនេះទទួលបានជោគជ័យ ដើម្បីទុកជាស្នាដៃជាប្រវត្តិសាស្ត្រនៅថ្ងៃអនាគត។ ដូច្នេះសូមអាជ្ញាធរពាក់ព័ន្ធ ពិសេសអាជ្ញាធរមូលដ្ឋាន ត្រូវខិតខំយកចិត្តទុកដាក់ពន្យល់ប្រជាពលរដ្ឋឱ្យយល់ដឹងពីអត្ថប្រយោជន៍នៃគម្រោងព្រែកជីកហ្វូណនតេជោ ការកែសម្រួលប្លង់បច្ចេកទេសរបស់គម្រោង ធ្វើយ៉ាងណាឱ្យទទួលបានការឯកភាពព្រមព្រៀងពីបងប្អូនប្រជាពលរដ្ឋម្ចាស់ដីទាំងអស់ដែលរងផលប៉ះពាល់ពីគម្រោង។

ឯកឧត្តមក៏បានបញ្ជាក់ផងដែរថា៖ ការកសាងគម្រោងព្រែកជីកហ្វូណនតេជោនេះគឺជាការកសាងសមិទ្ធផលដែលជាប្រវត្តិសាស្ត្រ ដោយមិនត្រូវឱ្យមានការរំខានពីបុគ្គលអគតិណាមួយឡើយ ហើយយើងក៏មិនត្រូវប៉ះពាល់ផលប្រយោជន៍របស់បងប្អូនប្រជាពលរដ្ឋណាមួយដែរ ហើយប្រជាពលរដ្ឋដែលទទួលរងផលប៉ះពាល់ពីគម្រោងនេះនឹងទទួលបានការដោះស្រាយផលប៉ះពាល់ពីរាជរដ្ឋាភិបាលដោយសមស្រប ធ្វើយ៉ាងណាឱ្យដំណើរការកសាងគម្រោងរបស់យើងដំណើរការដោយរលូន និងទទួលបានជោគជ័យ។

សូមជម្រាបផងដែរថា គម្រោងព្រែកជីកហ្វូណនតេជោមានប្រវែង ១៨០ គីឡូម៉ែត្រ គឺចាប់ផ្តើមពីចំណុចព្រែកតាកែវ នៃទន្លេមេគង្គ ឆ្លងកាត់តាម ព្រែកតាឯកនៃទន្លេបាសាក់ រួចចូលតាមព្រែកតាហ៊ីងនៃទន្លេបាសាក់ស្រុកកោះធំ និងបន្តរហូត ដល់សមុទ្រ ខេត្តកែប ដោយឆ្លងកាត់ខេត្តចំនួន៤ រួមមាន៖ ខេត្តកណ្តាល ខេត្តតាកែវ ខេត្តកំពត និងខេត្តកែប។ ចំពោះការសាងសង់ ផ្លូវទឹកនេះមាន ទទឹងមុខកាត់ផ្នែកខាងលើប្រវែង ១០០ម៉ែត្រ និងមុខកាត់ផ្នែកខាងក្រោមប្រមាណ ៨០ម៉ែត្រ និងជម្រៅទឹកប្រមាណ ៥,៤ ម៉ែត្រ (ជម្រៅ នាវាចរណ៍ ៤,៧ម៉ែត្រ និងគម្លាតសុវត្ថិភាព ០,៧ម៉ែត្រ) និងមានគន្លងនាវាចរណ៍ចំនួន ២គន្លង អាចចេញ-ចូល និងចៀសគ្នាបាន។