ឯកឧត្តម ប៉ា សុជាតិវង្ស ប្រធានគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ នៃរដ្ឋសភា អញ្ជើញជាអធិបតីភាពក្នុងពិធីបិទសន្និសីទជាតិលើកទី៧ ស្តីពីបរិវត្តកម្មវិស័យអប់រំ ក្រោមប្រធានបទ ចក្ខុវិស័យអប់រំ៖ មើលទៅអនាគតរួមគ្នា
ឯកឧត្តម ប៉ា សុជាតិវង្ស ប្រធានគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ នៃរដ្ឋសភា អញ្ជើញជាអធិបតីភាពក្នុងពិធីបិទសន្និសីទជាតិលើកទី៧ ស្តីពីបរិវត្តកម្មវិស័យអប់រំ ក្រោមប្រធានបទ ចក្ខុវិស័យអប់រំ៖ មើលទៅអនាគតរួមគ្នា
=================
ឯកឧត្តម ប៉ា សុជាតិវង្ស ប្រធានគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ (គណៈកម្មការទី៧) នៃរដ្ឋសភា រួមជាមួយឯកឧត្តម នេន ម៉ាល័យ ឯកឧត្តម ម៉ាត់ សេត និងឯកឧត្តម អ៊ុក សិទ្ធិជាតិ ជាសមាជិកគណៈកម្មការទី៧ នៃរដ្ឋសភា នារសៀលថ្ងៃទី១២ ខែកញ្ញា ឆ្នាំ២០២៥ បានអញ្ជើញជាអធិបតីភាពក្នុងកម្មពិធីបិទសន្និសីទជាតិលើកទី៧ ស្តីពីបរិវត្តកម្មវិស័យអប់រំក្រោមប្រធានបទ «ចក្ខុវិស័យអប់រំ៖ មើលទៅអនាគតរួមគ្នា» ដែលធ្វើឡើងរយៈពេល ២ថ្ងៃ គឺថ្ងៃទី១១-១២ ខែកញ្ញា ឆ្នាំ២០២៥ នៅហ្វេកធើរីភ្នំពេញ (Factory Phnom Penh)។
ឯកឧត្តម ប៉ា សុជាតិវង្ស បានថ្លែងកោតសរសើរអង្គសន្និសីទ ដែលបានចំណាយពេលចូលរួមរយៈពេលពីរថ្ងៃនេះ ដោយបានពិភាក្សាផ្លាស់ប្តូរយោបល់ ចែករំលែកបទពិសោធន៍ចំណេះដឹង ដំណោះស្រាយលើបញ្ហាប្រឈម និងការអនុវត្តល្អៗ ព្រមទាំងបានលើកឡើងអំពីសំណួរត្រិះរិះប្រកដោយស្មារតីស្ថាបនា ដែលនេះគឺជាធាតុផ្សំដ៏មានសារៈសំខាន់ ជួយដល់ការអនុវត្តគោលនយោបាយជាតិលើវិស័យអប់រំកាន់តែទទួលបានផ្លែផ្កាបន្ថែមទៀត។
ជាមួយនេះផងដែរ ឯកឧត្តម ប៉ា សុជាតិវង្ស បានថ្លែងអំណរគុណចំពោះអង្គការភាពជាដៃគូអប់រំនៃអង្គការក្រៅរដ្ឋាភិបាល (NEP) និងអង្គការជាដៃគូទាំងអស់ ដែលបានរួមគ្នារៀបចំសន្និសីទជាតិលើកទី៧នេះ ដោយមានការចូលរួមពីគ្រប់ភាគីពាក់ព័ន្ធ ទាំងថ្នាក់ជាតិ ថ្នាក់ក្រោមជាតិ មាតាបិតា អាណាព្យាបាល សិស្សានុសិស្ស និងវិស័យឯកជន ដែលបានចូលរួមមានចំនួនប្រមាណ ២៥០នាក់។
សន្និសីទជាតិលើកទី៧នេះត្រូវបានរៀបចំឡើងដោយ អង្គការភាពជាដៃគូអប់រំនៃអង្គការក្រៅរដ្ឋាភិបាល (NEP) ក្រោមជំនួយមូលនិធិរបស់ភាពជាដៃគូសកលសម្រាប់ការអប់រំ (GPE) តាមរយៈអង្គការ Oxfam-Denmark សហការជាមួយនឹងអង្គការ HI Cambodia, Plan International, World Vision, FH Cambodia, UWS, Aide et Action, ChildFund Cambodia, TDSO, Save the Children, DVVI, Epic Arts, ActionAid និងអង្គការសមាជិក NEP ផ្សេងទៀតមួយចំនួន។
សន្និសីទនេះធ្វើឡើងក្នុងគោលបំណងបង្កើតការសម្លឹងឆ្ពោះទៅមុខតាមរយៈការសន្ទនា ដោយផ្អែកលើភស្តុតាងស្របតាមផែនការយុទ្ធសាស្ត្រវិស័យអប់រំ កសាងចក្ខុវិស័យ ស្វែងរកយុទ្ធសាស្ត្រ និងឧត្តមានុវត្តន៍ប្រកបដោយគុណភាព និងបរិយាបន្នលើវិស័យអប់រំ ជាពិសេសសំរាប់កុមារមានពិការភាព កុមារនៅក្រៅសាលា កុមារមកពី សហគមន៍ក្រីក្រ និងដាច់ស្រយាល។ សន្និសីទនេះក៏បានជំរុញការចូលរួមបង្កើតរបៀបវារៈ នៃការអប់រំនៅកម្ពុជា បង្កើតអនុសាសន៍ទាក់ទងនឹងគោលនយោបាយ និងកម្មវិធីដែលអាចផ្តល់ព័ត៌មានក្នុងការរៀបចំផែនការ និងដំណើរការអនុវត្តការអប់រំថ្នាក់ជាតិ៕
