ពិធីបិទវគ្គបណ្តុះបណ្តាល ស្តីពី យុទ្ធវិធីប្រតិបត្តិការ ក្រោមអធិបតីភាពឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ នៅនាយកដ្ឋានប្រឆាំងការជួញដូរមនុស្សនិងការពារអនីតិជន
=====================
រាជធានីភំ្នពេញ ៖ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិនៅព្រឹកថ្ងៃទី២៧ ខែកុម្ភៈ ឆ្នាំ២០២៦ ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម អគ្គស្នងការនគរបាលជាតិ បានអញ្ជើញជាអធិបតីភាពក្នុងពិធីបិទវគ្គបណ្តុះបណ្តាល ស្តីពី យុទ្ធវិធីប្រតិបត្តិការ នៅនាយកដ្ឋានប្រឆាំងការជួញដូរមនុស្សនិងការពារអនីតិជន នៃអគ្គស្នងការដ្ឋាននគរបាលជាតិ ដោយមានការចូលរួមពីលោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន លោកឧត្តមសេនីយ៍ វរសេនីយ៍ អនុប្រធាននាយកដ្ឋាន និង លោក អេរិក មែលឌ្រឹម នាយកកម្មវិធីសង្គ្រោះ នៃអង្គការមេត្រីអន្តរជាតិ AIM SWAT និង សហការី ជាគ្រូឧទ្ទេសដែលមានជំនាញនិងបទពិសោធន៍ជាច្រើនឆ្នាំមកពីសហរដ្ឋអាមេរិក ចំនួន៨រូបផងដែរ។

ជាកិច្ចចាប់ផ្តើម លោក ដេវីដ ម៉ាខលឡៃយ៍ Mr.D avid Macaulay ប្រធានគ្រូបង្ហាត់ បានឡើងវាយតម្លៃដល់សិក្ខាដែលបានបញ្ចប់វគ្គ និងបានកោតសរសើរដល់សិក្ខាកាម ដែលមានឆន្ទៈមោះមុតនិងឆ្លាតវៃ ក្នុងរៀនសូត្របានល្អ ទាំងការអនុវត្តយុទ្ធវិធីប្រតិបត្តិការ។ លោកដេវីដ ម៉ាខលឡៃយ៍ Mr.D avid Macaulay បានកោតសរសើរថា លោកពិតជាពិបាកក្នុងការដាក់ពិន្ទុ ដោយសារតែសិក្ខាកាមពិតជាធ្វើបានល្អសឹងទាំងអស់គ្នា តែសិក្ខាកាមដែលធ្វើបានល្អណាស់គឺមានចំនួន៣រូប ល្អមានចំនួន៥រូប និងល្អបង្កួរមានចំនួន១២រូប។ ហើយក៏សូមឲ្យសិក្ខាមដែលមិនទាន់បានល្អ កុំមានការអាក់អន់ចិត្ត ត្រូវខិតខំប្រឹងប្រែងបន្ថែមទៀត អង្គការមេត្រីអន្តរជាតិ (អេមហ្វត) នឹងនៅតែបន្តបើកវគ្គបណ្តុះបណ្តាលតទៅទៀត។

លោក អេរិក មេលឌ្រីម នាយកកម្មវិធី នៃអង្គការមេត្រីអន្តរជាតិ (AIM SWAT) សូមថ្លែងអំណរគុណដល់ ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ ពិសេស ឯកឧត្តម នាយឧត្តមសេនីយ៍ អគ្គស្នងការនគរបាលជាតិ ដែលបានអនុញ្ញាតឲ្យមានការរៀបចំវគ្គបណ្តុះបណ្តាលនេះឡើង សម្រាប់បង្កើនសមត្ថភាព ចំណេះដឹងក្នុងយុទ្ធវិធីប្រតិបត្តិការ ដល់មន្រ្តីជំនាញប្រឆាំងការជួញដូរមនុស្ស ព្រមទាំងក្រុមការងារអេមហ្វតផងដែរ។ លោកនាយកកម្មវិធីនៃអង្គការមេត្រីអន្តរជាតិ (AIM SWAT) ក៏បានកោតសរសើរដល់សិក្ខាកាមតាមរយៈនៃការមើលវិដេអូ ដែលក្រុមការងារគ្រូឧទ្ទេសបានថតផ្ញើជូន និងសូមថ្លែងអំណរគុណដល់ក្រុមគ្រូឧទ្ទេសដែលបានចំណាយទាំងថវិកា ពេលវេលា កម្លាំងកាយចិត្តមកបង្ហាត់បង្ហាញជំនាញប្រតិបត្តិការ សម្រាប់ធ្វើការប្រយុទ្ធប្រឆាំងអំពើជួញដូរមនុស្សគ្រប់ទម្រង់។

តាងនាម ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ឯកឧត្តម ឧត្តមសេនីយ៍ឯក ជីវ ផល្លី ពិតជាមានសេចក្តីសោមនស្សរីករាយក្នុងពិធីបិទវគ្គបណ្តុះបណ្តាល ស្តីពី យុទ្ធវិធីប្រតិបត្តិការ សម្រាប់ធ្វើការប្រយុទ្ធប្រឆាំងអំពើជួញដូរមនុស្សគ្រប់ទម្រង់។ ឯកឧត្តមក៏បាននាំយកនូវការផ្តាំផ្ញើសាកសួរសុខទុក្ខពីសំណាក់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ដល់លោកអេរិក មេលឌ្រីម នាយកកម្មវិធី នៃអង្គការមេត្រីអន្តរជាតិ (AIM SWAT) និងសហការី និងលោកឧត្តមសេនីយ៍ វរសេនីយ៍ រួមទាំងសិក្ខាកាមដែលមានវត្តមាននៅពេលនេះ ។
រយៈពេល៥ថ្ងៃកន្លងទៅ គឺពិតជាលឿន ហើយសិក្ខាកាមបានឆ្លងកាត់វគ្គបណ្តុះបណ្តាល យុទ្ធវិធីប្រតិបត្តិការនេះទទួលបានជោគជ័យ ។

ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ បន្តថា ជាការពិតវគ្គបណ្តុះបណ្តាលស្តីពី យុទ្ធវិធីប្រតិបត្តិការ គឺមានសារសំខាន់ណាស់សម្រាប់មន្រ្តីនគរបាលយើង ក្នុងការចូលរួមប្រតិបត្តិការក្នុងគ្រប់កម្មវិធី គ្រប់ករណីដែលឆ្លើយតបទៅនឹងកិច្ចការពារខ្លួនក៏ដូចជាការបម្រើឲ្យការបង្ការ បង្រ្កាបបទល្មើសគ្រប់ប្រភេទ ពាក់ព័ន្ធទៅនឹងអំពើជួញដូរមនុស្សនិងអាជីវកម្មផ្លូវភេទ។ ការហាត់ពត់លុតដំខ្លួនតាមរយៈការហាត់ក្បាច់គុន ក៏ដូចជាការបង្កើននូវសមត្ថភាព ផ្នែកវិជ្ជាគុន ចាប់ចង គឺចាំបាច់ណាស់សម្រាប់មន្រ្តីនគរបាលយុត្តិធម៌ ព្រោះបើយើងមិនមានកាយសម្បទារឹងមាំ ការបង្រ្កាបបទល្មើសក៏មិនទទួលបានជោគជ័យនិងគ្រប់ជ្រុងជ្រោយដែរ។

ឯកឧត្តម ឧត្តមសេនីយ៍ឯក ជីវ ផល្លី សង្ឃឹមថា សិក្ខាកាមទាំងអស់ នឹងយកវិជ្ជាគុន យុទ្ធវិធីប្រតិបត្តិការ ចំណេះដឹងទាំងនេះ យកទៅប្រើប្រាស់ឲ្យបានត្រឹមត្រូវ ឲ្យចំគោលដៅ ជាផលប្រយោជន៍សម្រាប់ជនរងគ្រោះ និងជាកិច្ចការពារខ្លួនក្នុងការទប់ស្កាត់ប្រយុទ្ធប្រឆាំងជាមួយជនល្មើស បន្ថែមទៅលើការយល់ដឹងផ្នែកច្បាប់ប្រយុទ្ធប្រឆាំងអំពើជួញដូរមនុស្សផងដែរ៕